اسهل طريق لبورسعيد سوبر جيت او شرق الدلتا من رمسيس أو الماظة وانت بتحجز ذهاب احجز للرجوع كمان لأن لو استنين لما تخلص يومك هناك تروح تحجز مش حتلاقى اماكن ساعتها حتضطر تركب ميكروباص او بيجو احنا رحنا بورسعيد وصلنا نزلونا عند النادى المصري ركبنا تاكسى وهناك الاجرة ماتزيدش عن 10 ج . ركبنا وقلناله يودينا لأول محطاتنا:

1- المعدية : وجمال المعدية خصوصا لو معاك عيش فينو وترميه لطيور النورس وحظك جميل لو صادفت المعدية اللى بدورين تطلع تقعد فى الدور التانى وتتفرج على جمال بورسعيد بتعدى المعدية قدام مبنى قناة السويس تحفة معمارية بس مغلق بتشوفهوه من بره، ممكن تفضل رايح جاى فى المعدية ، وعلى فكرة المعدية ببلاش
2- بورفؤاد : المعدية بتربط بين بورفؤاد وبورسعيد يعنى بتربط بين قارتين ، بورفؤاد فى قارة اسيا وبورسعيد فى قارة افريقيا يعنى انت عبرت قارتين فى يوم واحد فيه بيوت بورفؤاد جميلة واتصور هناك مسلسل ليالى اوجينى بس البيوت مش كتيرة احنا لفينا لحد ماوصلنا لمجموعة منهم. كمان بورفؤاد فيها مسجد الكبير ببورفؤاد . وفيه شواطىء لنوادى عديدة هناك ممكن تكمل يومك فى بوفؤاد.
3- الممشى السياحى ببورسعيد: رجعنا بورسعيد للممشى السياحي (زى كورنيش النيل عندنا فى القاهرة ) وفى اخره سور عليه اقفال ملونة يطلق عليها اقفال الحبيبة . ثم فى نهاية الممشى قاعدة تمثال فرديناند ديليسبس .
4- بعدين طلعنا على شارع طرح البحر : ممكن تختار اى مكان على الشاطىء وتكمل يومك هناك على البحر . بيختلف سعر كل مكان بحسبب الجودة والخدمة المقدمة من حمامات واماكن للجلوس وسيرفيس …الخ.
5- تخلص يومك هناك تطلع على علوش بيبيع الشيكولاتة اللى قربت صلاحيتها تنتهى باسعار رخيصة وانت بتشترى بص على تاريخ الانتاج .
6- ممكن تروح بعد كده على الشارع التلاتينى وشارع الجمهورية والتجارى تشتروا لبس وحاجات وكده او تطلعوا على البازار وتشوفوا محلات السمك وتاكلوا هناك او تشترى من سوق السمك سمك فريش وتروح اى محل يشويه ليك وتاخده وتروح تقعد على البحر.
7- ماتنسوش تعدوا على سلسبيلا: وتاكلوا اجمل حاجة اسمها الكاساتا شبه الايس كريم بس تحفة ومش غالية احنا جبناها ب 8 ج . وجنبه على طول محل بيعمل حواوشى تحفة بيعمل عجينة الخبز قدامك بس مش فاكرة اسمه. فيه حلويات تانية اسمها تمرية وسمنية بس مش جربناها للأسف.
8- متحف بورسعيد الحربى: عبارة عن قاعتين وبيعرض قصص الحروب اللى خاضتها مصر عامة وبورسعيد بصفة خاصة وبعض من متعلقات الاعداء أثناء الحرب والاسلحة اللى استخدموها ولوحة شرفيه بالأبطال المصريين . تذكرة دخول المتحف خمس جنيهات.
9- حديقة المسلة ومتحف النصر : بينه وبين متحف بورسعيد خمس دقائق مشى: دى الحديقة اللى كان الرئيس جمال عبد الناصر بيقول خطابه للجماهير منها. دخولها ببلاش لأنها حديقة مفتوحة وبها كراسى للجلوس واسفل المسلة فيه متحف النصر أيضا.
10- وبكده اليوم خلص وتلحقوا تاخدوها جرى لحد السوبرجيت عشان مش يفوتكم المسافة بين القاهرة لبورسعيد بين ساعتين ونص او ثلاثة بحسب الطريق والزحمة والاستراحات فى الطريق. انا عايزه اضيف ان الشعب البورسعيدي شعب مضياف وودود وطيب وكنا لما نحتار المكان دا نروحه ازاي كانوا بيوصفوا الطريق لينا ومش بيزهقوا من اسئلتنا الكتيره وكمان التاكسي هناك ملتزم بالاجرة ومش بيزود علينا اكمننا مش بورسعيديين