زيارة بورسعيد
ياجماعه بحس الناس اللى بتيجى بورسعيد ما شفتش ربع بورسعيد ولا استمتعت كفايه
اعتقد معظم اللى بيزور بورسعيد مش بيستمتع بالتجربه كامله لانها بتكون تجربه سريعه ومضغوطه
علشان تستمتع بزيارتك بورسعيد على الاقل هتحتاج ليومين تلاته
ليه بقى زيارة بورسعيد مميزه ( علشان مجموعة عوامل هكلمك عنها )
اولا بورسعيد جوها جميل ومعتدل حتى فى عز البرد هتستمتع ( ما بتكونش تلج لدرجه انك تتجمد ) الشتا فى بورسعيد ممتع جدا وفى الصيف هتلاقى الرطوبه عاليه شوايه بس باردو هتتبسط
2- تانى حاجه ودى مهمه جدا جدا اسعار كل حاجه فى بورسعيد معتدله جدا وارخص من محافظات كتير ( اكل – وشرب وفنادق واهم حاجه المواصلات داخل المدينة وحط تحت مواصلات دى مليون خط احنا بصراحه بنستغرب من اسعار المواصلات لما بنذور اى محافظه تانيه اغلى تاكسى يا جماعه لاى مكان ب 10 جنيه )
3- مدينة هاديه جدا واهلها طيبين (طبعا مش ملايكه علشان بس لو اتعملت مع حد وماعجبكش ففى الغالب هو مش بورسعيدى ومجرد مقيم لان اكتر من نص سكان المدينة اساسا مش بورسعيدية والناس اللى جت بورسعيد فى الاعياد هتحس بفرق كبير فى الموضوع ده لاكن معظم سكان بورسعيد محترمين جدا ومتعاونين جدا مع اى حد
4- الشوبينج فى بورسعيد اكتر من رائع ومتنوع وفى اماكن كتيره جدا محدش كتير من اللى بيزور بورسعيد بيذكرها يمكن لانهم مش يعرفوها ذى مثلا سوق التجارى او الحميدى او الشرقيه ودى كلها اسواق جنب بعض كل سوق عبارة عن شارع للمحلات فقط بطول كيلو تقريبا او اكتر وفى كل حاجه باسعار معقوله كمان فى مول (صن مول) ودا فيه محلات للجينز بتعمل عروض رهيبه جدا وفى محلات كتير لمستلزمات المكياج والميك اب والعطور ( البنات هتتبسط هناك ?) او شارع الثلاثينى وده فيه محلات مهمه جدا لو انتى بنوته وبتجهزى بيتك للجواز علشان فى محلات رائعة لتجهيز العرايس وادوات البيت والمطبخ وطبعا كلها مستوردة
5- المعديه ومدينة بورفؤاد
فى الحقيقة بورفؤاد مش واخده حقها ابدا لاى حد بينزل بورسعيد مع انها رائعة جدا وهاديه وفيها شاطئ من اجمل شواطئ مصر ويحتاج زيارة فنصيحه زورو شاطئ بورفؤاد ولو عجبكم قضو عليه يوم كامل وفى كافتريات هناك ممكن تظبكم فى اكله سمك كويسه باسعار كويسه ( علشان كدا بورسعيد تحتاج اكتر من يوم )
كمان ودى حاجه مهمه جدا وتجربه جميله وهى انك تشترى عيش اى كان نوعه علشان وانت راكب المعدية تاكل طيور النورس وهتشوف منظر اوروبى جدا ورائع وهتاخد كام صورة كانك فى اوروبا بدون مبالغة
طبعا دا بيكون فى فصل الشتا
وفى مطعم اول ما تدخل بورفؤاد اسمه الجندى ( مطعم اسماك )
ممكن تروج تطلب اللى انت عاوزه وتروح تقعد على البحر والمطعم يوصلك الاكل فى مكانك دليفرى وتاكل على البحر ياباشا
وحاولو لما تنزلو من المعدية تمشو فى طريق الفلل اللى بيودى على الشاطئ منظر رائع وهتحسو انهم فى فرنسا لان اللى بناها فرنسيين فعلا وما تنسوش تشوفو فيلا السادات اللى كان بيحب يقعد فيها وكان بيحب بورفؤاد جدا على فكرة
كمان نسيت اقولك لما تنزل بورفؤاد تسال ع محل اسمه اسواق حمام
وده محل للملابس بيبعها بالكيلو والملابس عنده عبارة عن استوكات مستورده يعنى ملابس جديده بس هو استوردها بالكيلو فبيبعها بالكيلو ولو حظك حلو ودورت كويس هتلاقى ماركات غاليه جدا ومحترمه جدا بتتباع بالكيلو تجربه حلوه مش هتخسر لو جربتها خصوصا انها فى طريقك ومش هتحتاج تركب مواصلات
كمان فى اماكن كتير محدش بيذكرها ذى مثلا الممشى السياحى على القنال او ممشى ديليسيبس او فنار بورسعيد ودا اثرى جدا ومن اقدم فنارات العالم الحاليه واول فنار فى العالم مبنى من الخرسان
بالنسبة للناس اللى بتحب الاماكن التاريخيه وغاويه تصوير وكمان اخواتنا الاقباط
فبورسعيد فيها اقدم مجموعة كنائيس فى مصر معظمهم تم بنائهم من اكتر من 100 سنة ومعمارهم مميز جدا من الخارج والداخل وهتلاقيهم فى حى الشرق اللى كان اسمه زمان حى الافرنج لان زمان بورسعيد حيين اتنين حى الافرنج للاجانب وحى العرب للمصرين تاريخ بورسعيد ثرى جدا وفيه تفاصيل رائعه جدا

الاكل : ?

طبعا بالنسبة للاكل والشرب فذى ما قلت بورسعيد مش غاليه فى الاكل خصوصا فى المطاعم العاديه ودى منتشر جدا ( مطاعم اللحوم والفراخ والشاورمه فى كل مكان فى بورسعيد واسعارهم كويسه وعاديه

بالنسبه للاسماك لو هتعرف تشترى اسماك وتفاصل فيها وتجيبها بسعر كويس فروح سوق الاسماك واشترى سمك وجمبرى واى حاجه بتحبها كله موجود وبالمناسبة سوق الاسماك لسه مبنى جديد ومنظم جدا وجميل وهناك فى مطاعم بتسويه وتطبخه مع ارز وسلطات وهتتبسط وانا بنصحك جدا تروح تشترى بنفسك السمك لان التجربه جميله وهتعجبك وهتوفر معاك كتير جدا خصوصا ان فى مطاعم هناك هتسويلك السمك اللى اشتريتو وهتعملك رز وسلطة وهتظبطك

وبنصحك تسوى الاكل فى سوق السمك وتركب تاكسى وتروح تاكله على البحر فى اى كافى على الشاطئ صدقنى التجربه هتعجبك جدا وهتتبسط من الفيو على البحر وانت بتاكل وهتوفر كتير . طبعا لو عندك وقت لو مفيش وقت ممكن تاكل فى المطعم اللى هتسوى فيه الاكل عادى

لو مالكش فى الموضوع ده وعاوز تاكل على طول فى مجمع المطاعم اخر طريق طرح البحر فى مجموعه مطاعم متخصصه فى الاسماك ممكن تختار اى مطع يعجبك وكمان اسال عن الاسعار قبل الطلب والفيو رائع من هناك وبنصحك لو هناك وحابب تاكل فهناك فى مطعم اسمه البجعه عندة وجبات باسعار محددة بتبداء من 100 الى 160 والوجبه لو انت وحش مش هتعرف تخلصها وبيكون فيها مجموعه مشكلة من الاسماك والسى فود وشوربة السى فود اعمل بحث عن مطعم البجعه للاسماك فى بورسعيد على الفيس وشوف بنفسك ( حاول تسال عن اى حاجه قبل الطلب ) الناس فى المطعم ده محترمين جدا بعد الاكل ممكن تتمشى على الشاطئ او الممشى او تعدى الشارع وتروح تاكل كساتا من عند سلسبيله هو قريب من مجمع المطاعم والكساتا دى اختراع بورسعيدى بس تقريبا اصله يونانى وهتعجبك جدا لو بتحب الايسكريم

لو كنت فى وسط المدينة هتروح البازار وده سوق معروف فى بورسعيد وهناك اسال عن مطعم اسمه عالم البحار وهو بالمناسبه مطعم من اقدم مطاعم المدينة وعريق جدا وهتاكل اكلة سمك مش هتنساها وهناك ناس محترمه واسعار معقوله وطبعا تقدر تنقى السمك بنفسك قبل ما تاكل وكمان تقدر تتفق معاهم على المبلغ النهائى اللى هتدفعه طبعا بعد ما بتخلص اكل السمك الجميل هتسأل على محل علوش وده قريب من المطعم وهناك صدقنى هتنسى اسمك لو كنت من عشاق الشيكولاته والحلويات علشان الاسعار وانواع الشيكولاتات هناك هتبهرك ( اسعارعلوش كويسه جدا فحضر محفظتك علشان هتشوف انواع شيكولاتات مستورده عمرك ما سمعت عنها قبل كدا? )
السكن والمبيت
انا بنصحك تكونو جروب واول ما تنزلو بورسعيد تحجزو فى اى قريه سياحيه فى بورسعيد ودى عبارة عن قرى تشبه الشاليهات محترمه طبعا كمبيت بس بدون اكل وانت مش محتاج غير المبيت وكمان اماكنها فى وسط البلد واسعارها بتكون تقريبا 750 للشاليه فى اليوم يعنى لو جروب ووزعتو المبلغ على بعض هتلاقى الموضوع موفر جدا
بس لازم انصحك تحجز بالتليفون قبل ما تنزل بورسعيد علشان تلاقى حجوزات
هكتبلك اسامى القرى السياحية وانت اعمل عليها بحث على جوجل وادخل اتصل بيهم (قرية الفيروز – قريه النورس – قرية الكنارى – قرية الكروان – قرية جنة النورس )
لو هتحجز فندق فالاسعار مش مبالغ فيها خصوصا انك مش هتحتاج غر اوتيل 3 نجوم مثلا للنوم فقط والفنادق متوفره كتير فى وسط المدينة
حاول تتصل بارقام التليفون قبل ما تنزل بورسعيد علشان تستعلم او تحجز
بورسعيد تجربه جميلة يا جماعة بس ذى ماقلت فى الاول ما تنفعش فى يوم واحد حاول تظبط مع اصحابك يومين تلاته هتعجبك جدا فى الشتا