خروجة بورسعيد رايح جاي سافرنا صد رد في يوم

خروجة بورسعيد رايح جاي سافرنا صد رد في يوم

خروجة بورسعيد رايح جاي في يوم ❤
بورسعيد من المحافظات الصغيرة ورغم ذلك قادرة جدا جدا تسعدك ومتحسش فيها بملل ابدا ومش مكلفة ابدا .
بورسعيد فيها معادلة صعبة متحققة مستحيل تلاقيها في اي محافظة تانية . بما اني بترردد عل محافظات كتير قبلي وبحري فشفت المعادلة ديه .
ازاي يعني واي هي المعادلة !؟
أكل نضيف بفلوس معقولة موجود . هدوم مستوردة وحلوة بفلوس معقولة . فسح وجناين والمعدية موجودة من غير فلوس . حلويات وشيكولاتات موجودة بأسعار خيالية . قهاوي كتير ورخيصة . مواصلات رخيصة اوي اوي اوي.
ازاي ننطلق ونتبسط ؟
اقرأ
في كل محافظة في مواقف سوبر جيت وتيوتات ومواصلات بتروح وبتسافر كل حتة .
اركب المواصلة اللي بتودي بورسعيد
سعر السوبر جيت من القاهرة 60ج ومن اسكندريه 70ج
بيتحرك وبيوصل بورسعيد بينزللك الموقف . شوف نفسك تفطر فين وهرشح اماكن للفطار

. أولهم عند اكسبريس الفار
. العيوطي
ولو فطار فرنساوي ودلع يبقي
Taby’s Bakes
أو جيانولا ش الجمهوريه
تفطروا وترتاحوا واشربوا الشاي عشان تستعدوا للفة الحلوة
بس قبل اللفة احجزوا الغدا
منين .
من سوق السمك الجديد دة مشهور جدا اي حد هيوصللك عنده وادخل السواق بوابة 9 ادخل شمال هتلاقي سماك كبير اسمه بتاع سمك عنده كل الانواع اختاروا اللي تحبوه وقوله هنيجي عل الساعة كذا ناخده .
بعد كدا اتحركوا عل المعدية من غير فلوس ها وخدوا معاكوا كيس في فينو متقطع واكلوا طيور النورس هتلاقوها كتير اوي والجو جميل والمنظر يرد الروح والله .
هتنزلوا منها عل بورفؤاد . حتة من أوروبا بس في مصر🇪🇬
كل المباني اللي هناك عل الطراز الفرنسي شغل انجليزي يسعد القلب ويغير مودك والله .
اول ماتنزلوا هتلاقوه المسجد الكبير اتصوروا عنده
و اتمشوا واتفرجوا عل الفيلل الموجوده يمين وشمال وبالمناسبة ليالي اوجيني متصور هناك . وكمان هتلاقوه فيلا بطل الحرب والسلام الزعيم الراحل السادات رحمة الله عليه.
ارجعوا بالمعدية وكملوا فرجة عل بلدنا الحلوة والبحر والسفن المحملة شغل وخير .
هتنزلوا روحوا اعملوا شوبينج هدوم من منطقة البالة
ولازم تعملوا شوبينج من عند محمود الفار مكانه في طرح البحر جنب قرية مرحبا وبافلو برجر عندهم شيكولاتات بتاعة بلاد برا
بعد اللفة ديه روحوا خدوا السمك واركبوا تاكسي قولوله الشاطئ من جنب مسجد السلام .
وصلنا البحر هتدخلوا وتاخدوا ترابيزا وكراسي وتاكلوا سمك عل البحر مع ريحة اليود وقلبك بيتخفف من عليه كل هموم الشغل واعباء الحياة .
بعد السمك يا تحبسوا بشاي يا اما ليمون نعناع في قهاوي كتير وكافيهات
ومتنسوش تاخدوا كاستا من عند سلسبيلا
ولو في حد عايز يزود متعة يشتري فينو سخن ويعدي عل محل حميد في ش صلاح الدين يعمل سندوتش بطارخ مملحة عشان يحس بإحساس الجنة
بالنسبة بقي الاسعار .
اكلة سمك محترمة من السوق ل 8 افراد بتكلف 500ج
جمبري سبيط بوري . يربون مقلي . رز . سلطات
حساب الفرد 62 ج في الاكلة .
الشاي في اي قهوة ب 5 ج
.
التاكسي بيلف البلد كلها ب 10ج
المواصلات العادية ب 2ج ونص
. المعدية والجناين بدون فلوس .
في حاجة حابة اقولكم عليها وانت جوا البلد لو انت مش عارف عنوان محل أو مطعم او حاجة اسال اي حد كل الناس هناك عارفة بعضها. ولو معاك عربيتك شغل ال GBS باسم المكان هتوصل .
مافيش حاجة صعبة والله وكلها سهلة بفضل ربنا ❤
شكرا لكل اهل بورسعيد اللي بيرحبوا بيا واللي بشتغل معاهم واللي حرفيا بيشلوني من عالارض

السفر من القاهرة الى بورسعيد سوبر جيت
اماكن التسوق والمطاعم والخروج فى بورسعيد
أروح فين في بورسعيد بأقل التكاليف
ازاى تقضى يوم فى بورسعيد
‫أماكن الخروج و الشوبينج في بورسعيد

وسم :

اترك تعليقاً

لن يتم نشر عنوان بريدك الإلكتروني.