اسعار دخول منطقة سقارة بالجيزة

اسعار دخول منطقة سقارة بالجيزة

منطقة سقارة الاثرية
كل ما تلاقوا نفسكوا عايزين تعملوا حاجة مختلفة روحوا اكتشفوا مكان في مصر
سقارة من أكتر الاماكن القريبة للقاهرة و مليانة معالم اثرية ومعظم آثار المنطقة دي من عصر الدولة القديمة من أول هرم زوسر المدرج أول هرم في التاريخ و ده إللي تم افتتاحه من كام شهر بعد ١٤ سنة ترميم
طبعا إللي جاي كلام بسيط آوي عن معالم اثرية ممكن تحسوه تاريخي بس فعلا لما تروحوا و تشوفوا جمال و عظمة الاماكن دي هيبهركوا و هتكتشفوا إن اهرامات الجيزة مش هي بس أحلى اهرامات عندنا في اهرامات تانية رائعة و ان سقارة منطقة مليانة حكايات كتير أحلى من بعض هتعرفوها في رحلتكوا وسط الاثار الموجودة هناك.
منطقة سقارة غير إن فيها هرم زوسر المدرج أول هرم في التاريخ فهي فيها معالم كتير زي :
– هرم الملك اوناس و من جوه الهرم ده تشوف نقوش على الجدران روعة بتحكى فيها أقدم النصوص الدينية في التاريخ لان المصري القديم كان بيعتقد بوجود حياة تانية فكانت النصوص دي إللي بتصاحبه في رحلته للحياه الأخرى ، بس خلوا بالكوا هرم اوناس الزيارة فيه لحد الساعة ١٢ الظهر بس فلو رحتوا متاخر ادخلوه الأول.
-منطقة البير الفارسي.
– منطقة بهو الأعمدة ودي تعبر مدخل منطقة الهرم و ده فيه حوالي ٤٨ عمود يقال إنه بين كل عمود و عمود كان في تمثال للملك بس حاليا إللي موجود العمدان بس .
– جبانة العجل ابيس (السرابيوم) دي من أحلى الاماكن ومختلفة عن معظم المقابر دي من المقابر إللي حيرت علماء الاثار من تصميمها إنها مقبرة مبنية جوة الجبل حسب اعتقاد البعض و موجود فيها عدة توابيت ضخمة للعجل أبيس (العجل المقدس) مصنوعة من الجرانيت الضخم و من الحاجات اللي حيرت الباحثين إزاي كان بيتنقل التابوت لجوة المقبرة برغم ان التابوت الواحد كان بيبقى قطعة واحدة وزنها اطنان ، ده غير إن المقبرة كلها سراديب تحت الارض منحوتة بكتابات فرعونية و قبطية وكان الرهبان المسيحيين بيستخدموها علشان يستخبوا فيها من اضطهاد الرومان والسراديب دي تحس و إنت ماشي فيها إنك في game of thrones بالممرات و رماد شعلات النار و آثارها عالجدران قصة لوحدها على الرغم إن مفيش أثار حوامل للنار.
– مقبرة مروركا ودي عبارة عن غرف مرسوم على جدرانها الحياة اليومية للمصري القديم زي صيد السمك و نقل المؤن و مظاهر كتير للحياه لما تتفرجوا عليها تحسوا كأنها فيلم تسجيلي لحياتهم وقتها مرسوم عالجدران .
و كمان في متحف جميل جدا متحف ايمحتب لازم تزوروه و ايمحتب ده كان المهندس إللي قام بتصميم الهرم والمجموعة الجنائزية و هو إللي اشرف علي البناء و كان أول من استخدم الحجر في بناء كامل . و شغل عدة مناصب ، منها كبير كهنة هليوبوليس والمهندس الفلكي والكاتب والحكيم ، و أمتد نبوغه الي الطب ، حتي عبد كاله للطب في عصر متأخر باعتباره ابناً للاله ” بتاح “.
روحوا و استمتعوا بنفسكوا و لو مش بتحبوا المشي الكتير يفضل يكون معاكوا عربية أو جايين بحاجة علشان منطقة أثار سقارة كبيرة و من مكان لمكان هتمشوا شوية حلوين و هتلاقوا في الصور لوحة أسعار تذاكر المزارات

قبل ما تتفرج علي الصور بنرشحلك المكان ده
جوله داخل هرم زوسر
الهرم الأحمر من الداخل
القرية الفرعونية من الداخل

خروجات حوزو
وسم : /

اترك تعليقاً

لن يتم نشر عنوان بريدك الإلكتروني.