ازاي تعمل مغامرة في أضيق واعمق سراديب فرعونية ب ٧٠ ج بس
اولا هتركب المترو من أي حته وتنزل المنيب التذكرة من ٣-١٠ج حسب المسافة
هتركب من المنيب دهشور ب ٧-١٠ج
هتاخد توكتوك لحد منطقة آثار دهشور ب ٥ ج
هنقطع تذكرة دخول ب ١٠ ج
اعمل حسابك انك داخل منطقة مفتوحة زي المحمية الطبيعية ياعني هتمشي كتير فخد معاك ( مية كتير + اكل قليل + طاقية + كوتشي مريح في للمشي) وفي حمامات هناك نضيفة ما تقلقش
هناك الطريق ممهد ياعني مش هتوه في الصحراء هتمشي مع الطريق وممكن تشاور لأي عربية داخلة وتركب معاهم عادي جدا
اول حاجة هتقابلها هي الهرم الاحمر ومش محتاجة فكاكة اسمه أحمر علشان لون حجارته حمرا
الهرم ده اول هرم في التاريخ معمول بشكل هرمي سليم مش زي هرم ميدوم اللي عبارة عن مصاطب فوق بعضها
و ده يعتبر تالت أعلى هرم في مصر بعد خوفو وخفرع
هتطلع على سلم صناعي لحد فتحة دخول السرداب اللي بتدخلك جوه الهرم السرداب ارتفاعه ٦٠ سم و عمقه ٨٠ متر والنزول ليه مش على سلالم بتنزل على لوح خشب و انت مقرفص فلازم تاخد بالك على راسك وتنزل على مهلك علشان ماتتعورش لما بتخلص السرداب ده وتنزل ٨٠ متر بتطلع على سرداب تاني لفوق بيدخلك غرفة كبيرة جدا مربعه و لكن صقفها هرمي وبكده تبقى في نص الهرم بالظبط طبعا الأوضة مبنية بالسنتي طولها قد عرضها و صقفها غريب الشكل بعدين بتطلع سرداب صغير وتطلع على سلم ٨٠ متر لفوق و بكده تكون وصلت غرفة الدفن اللي فيها تابوت الملك طبعا مش هتلاقي تابوت لأنه في المتحف بس هتلاقي الغرفة
الناس اللي عندها فوبيا الأماكن المغلقة ما تخفش جدودك كانوا عاملين حسابهم وهتلاقي نفسك طبيعي ودرجة الحرارة معتدلة جدا صيف او شتاء وفي إضاءات في كل مكان
طبعا شكل السراديب والغرف كانك في فيلم اجنبي من أفلام انديانا جونز رهبة وخوف و فخر وإعجاز و مشاعر كتير في قلب بعضها
بعد ماتطلع من الهرم الأحمر هتمشي بتاع كيلو لحد الهرم المنحني و ده اهم حاجة في الرحلة كلها الهرم المنحني ده اول محاولة بناء هرم بشكل هرمي صحيح و لكن جدودنا طلع بالهرم من قاعدته لحد نصه بشكل صحيح بزاوية ٦٠ لكن لقوا ان الجدران هتقع فغيروا الزاوية على قمة الهرم ل ٤٥ درجة فطلع بشكل مربع عليه قبة من فوق فسموه الهرم المنحنى
وأهميته ترجع لأنه كان عبارة عن تجربة علشان يعرفوا ازاي يبنوا هرم بشكل صحيح ومع ذلك الهرم من جوه أسطوري رغم انه كان تجربة في رهبة غريبة جواه و الدخول في سراديبه صعب جدا وعايز بطل عضلاته قوية
انت بتحس انك دخلت في عالم الجن عالم غريب عمرك ما شفته
اول ما بتوصل لمدخل الهرم بتلاقي سرداب نازل لتحت حوالي ١٠٠ متر وارتفاعه ٦٠ سم نفس السرداب في الهرم الأحمر بس اطول و اضيق غالبا هتدحرج وانت نازل
المشكلة انك بعد ما بتنزل بتطلع سرداب تاني أضيق من الاول بس الطلوع بيكون اسهل من النزول بكتييييييير
هتلاقي نفسك بعدها في سرداب غريب مسدود و فيه فاتحه شمال وفاتحه يمين
اليمن ده اسمها الفاتحة الغربية بتطلع على سرداب املس جدا وبزاوية ٦٥ درجة وفي حبل بتطلع بيه و ده عايز واخد متسلق جبال ومش بيخاف وقلبه ميت لان السرداب ضلمه كحل لحد نصه بعدين تور الشمس بيظهر
اما بقى لو دخلت شمال فهتطلع على سلم عادي لحد غرفة دفن الملك و ماتسغربش لو لقيت ناس متربعة و قاعدة بتلعب يوجا ده عادي الغرفة دي فيها سكينة غريبة اساسا وهدوء وسلام نفسي غريب والأجانب بيجوا يخرجوا الطاقة السلبية بتاعتهم فيها وطبعا السراديب كلها جيدة التهوية والاضاءة ياعني كله تمام
هو الغريب بس ان الاهرامات دي كلها مالهاش مداخل كل مداخلها سراديب
فازاي عملوا الغرف دي وازاي دخلوا التوابيت العملاقة و ازاي عملوا التهوية الطبيعية دي وازاي حفظوا على درجة الحرارة ماتعرفش ومحدش عارف معتقدش ان في حد هيعرف دلوقتي
بعد ما بتخلص مغامراتك في سراديب الهرم المنحني وانت خارج تقدر تبص من فوق الهرم على ايدك اليمين هتلاقي هرم اسود و ده اسمه الهرم الأسود علشان كان مبني من طوب ني واتهد مع الزمن
اما لو نزلت من الهرم المنحني ولفيت وراه هتلاقي هرم صغير كده قد هرم منقاورع وتقدر تنزله ده عادي خالص وده هرم مجهول تقريبا المصريين القدماء بنوه وهما قاعدين يلعبوا كده ويتسلوا وقت الراحة
هترجع بقى تاني من عند الهرم المنحني لعند الهرم الأحمر هتلاقي حمامات نضيفة قوي اتشطف واستحمى لو حابب كمان و هتلاقي ست غلبانه وجوزها عم عبرحمان هيدوك مناديل و معاهم مية وشاي وحاجة ساقعة وبصراحة مش بيطلبوا مبالغ هو بيديك وانت بتدفع اللي فيه النصيب ليهم ياعني مش أسعار سياحية أسعار عادية بس انت ومقدرتك او انت وذوقك
هتخرج بقى من منطقة دهشور توقف توك توك وتقوله يوديك بحيرة الملك ب ٥ ج
بحيرة الملك دي من أغرب الأماكن اللي ممكن تشوفها في حياتك البحيرة دي في الصيف جافة وعبارة عن غابة وفي الشتاء مليانه مية وتنزل تعوم فيها ازاي معرفش هي كده ومحدش عارف اسمها بحيرة الملك علشان كان الملك امنحتب بيستحمى ويصطاد بط فيها ولا علشان كانت المكان المفضل للملك فاروق لصيد البط
بس هناك هتشوف طيور نادرة جدا مش موجودة غير في البحيرة دي وهتشوف نبتات أغرب و تقدر تستريح وتأكل وتنام هناك المكان أمن جدا ومليان ناس بتروح تقعد هناك تتأمل هتحس انك الغرب الأمريكي حرفيا وتقدر تاخد صور عظيمة او تراقب الطيور لو معاك منظار او تعوم لو في الشتا
قبل ما تتفرج علي الصور بنرشحلك المكان ده
جوله داخل هرم زوسر
