مطروح السحر والجمال?
كل اللي ممكن تحتاج تعرفه علشان رحلتك تكون سهلة وممتعة.? ناس كتير بعتت تسألني عن تفاصيل زيارة مطروح فحبيت اكتب مراجعة سريعة شاملة ممكن يكون فيها إجابة علي كل الاستفسارات وكمان تكون تشجيع للناس انها تزور البلد التحفة دي اللي فيها اجمل شواطئ العالم بجد .. ودعوة للخروج والاستمتاع بكل لحظة مع اخد كافة احتياطات الوقاية والأمان..

معلومات سريعة عن مطروح :
المكان : مدينة مرسي مطروح – محافظة مرسي مطروح ( الحدود الشمالية الغربية لمصر – البحر الابيض المتوسط شمالاً وليبيا غرباً) تحدها الاسكندرية والبحيرة والجيزة شرقاً والوادي الجديد جنوباً. تاني اكبر محافظة من حيث المساحة “212 ك م م” بعد محافظة الوادي الجديد، وثالث اصغر محافظة من حيث عدد السكان “330 الف نسمة”.

? التوقيت: أجازة 5 أيام شهر يوليو 2020. (ده أحسن توقيت ممكن تروح فيه وكمان خلال شهر اغسطس لان قبل كده وبعد كده الجو بيكون شوية برد)

حالة الطقس ودرجات الحرارة :
من 29- 31 نهاراً الي 22- 24 ليلاً. (حر شوية في النهار بس معقول جداً مقارنة باماكن تانية في نفس التوقيت ده من السنة زي شرم والغردقة). نسبة الرطوبة قليلة نوعاً ما عن اماكن ساحلية مجاورة زي اسكندرية. خلي بإستمرار معاك كابك ونضارتك الشمس وقزازه ميه ? معاك طول الوقت في النهار.

المواصلات وحالة الطرق والخدمات :
لو مسافر من القاهرة ومعاك عربية ? تقدر تروح بيها وانت مش قلقان من حاجة لان الطرق حلوة جداً خاصة طريق الضبعة الجديد – المسافة حوالي 450 كم من القاهرة وحتي مطروح اخدناها في حوالي 6 ساعات بالريست في النص.
واحنا رايحيين اخدنا طريق العلمين “وعلي اوله عدينا علي منفذ بيع للقوات المسلحة بيبيع خضروات وفاكهة طازة اخدنا معانا بطيخة طعمها طلع وهمي وكيلوفلفل اخضر وكيلو فلفل الوان وكيلو خيار ب 39ج نفعونا جامد بصراحة ?:D” ?
واحنا راجعين اخدنا طريق الضبعة الجديد مكنش عليه خدمات كتير لكنه طريق تحفة.
يفضل طبعاً انكوا تسافروا في النهار مش بالليل تجنباً لأي مفاجآت ممكن تقابلكم في الطريق وكمان الرؤية بتكوت أفضل كتير من بالليل.

لوهاتسافر مواصلات من القاهرة :
سوبر جيت ? من موقف الماظة او عبد المنعم رياض من 190- 230 ج علي حسب نوع الاتوبيس.(ذهاب)
اتوبيسين 2:05 ص و 6 ص. ونفس الكلام من مطروح للقاهرة من 190- 230 ج علي حسب نوع الاتوبيس. ( عودة ). 5 اوتوبيسات 11 ص و 12و2 و4 و11 م.
ميكروباص مكيف من موقف رمسيس او الجيزة )مشعل) او الترجمان ب 150 – 200 ج.
قطار ? القاهرة مطروح(999) – يتحرك الساعة 5:55 ص يوصل الساعة 1:30 م مكيف درجة اولي 120ج – درجة تانية70ج .. وقطار العودة من مطروح(943) : الساعة 3:15 عصراً يوصل 10:30 م.
طبعاً ده أوفر نوعاً ما بس مدته اطول حوالي 7 ساعات ونص.
قطار النوم القاهرة -مطروح ( 773) يتحرك الساعة 11:30 مساء ، يصل إلي مرسي مطروح الساعة 6:32 صباحا.
قطار النوم مطروح – القاهرة ( 755) يتحرك الساعة 10 مساء ، يصل إلي القاهرة الساعة 5:40 صباحا. سعر التذاكر الحجز بيكون من مكتب عربيات النوم بمحطه مصر حجز الذهاب والعوده ايضا الذهاب من القاهره ايام السبت والاتنين والاربعاء والعوده من مطروح يوم الاحد والثلاثاء والخميس. الكبينه المزدوجه ب2سرير سعر الفرد 180جنيه +وجبه عشاء خفيفه فى حاله 2هيقعدو فى الكابينه لو هتاخد الكابينه مفرد الفرد بيكون 220جنيه .ولو فى اطفال الطفل من سن 4سنين يدفع له 150جنيه ويكون له سرير ووجبه.
أرقام حجز مكتب قطار النوم: 01222699880 – 0225761319 – 0225761954 طبعاً لو انتوا عيلة كبيرة او شلة صحاب كبيرة هايكون أفضل لو تتفقوا مع ميكروباص مكيف يوصلكم ويرجعكم هاتكونوا علي راحتكم اكتر.. في شركات كتير بتقدم ده.
فيه طيران داخلي ✈️ من مطار القاهرة الي مطار مرسي مطروح الدولي مرتين اسبوعياً – المدة بتكون اقل من ساعة – وسعر التذكرة من 1500ج – 2000ج ذهاب وعودة للفرد. (في الوقت الحالي متوقف) لوهاتسافر مواصلات من الأسكندرية : (3 ساعات تقريبا )

سوبر جيت ?: جو باص من سيدي جابر او محرم بيك في اوقات 7 و7:30 و 8 ص من 100-110 ج حسب نوع الاتوبيس. وكذلك العودة من مطروح / الساعة 12:30 و 2 م – 110 ج
ميكروباص : من 90 – 150 عادي ومكيف من مواقف سيدي جابر او محرم بيك.
قطار : الذهاب – قطار رقم 300 من محافظة الإسكندرية في تمام الساعة 6:40 صباحاً ويصل إلى محافظة مرسى مطروح في تمام الساعة 12:00 م
العودة – قطار رقم 654 من محافظة الإسكندرية في تمام الساعة 1:20 مساءاً ويصل إلى محافظة مرسي مطروح في تمام الساعة 8:20 م.
مكيف درجة اولي 120ج – درجة تانية70ج

المواصلات الداخلية :
اي خط ميكروباص داخلي من 3-5 ج علي حسب المكان داخل مطروح.
التاكسي ? : فتح العداد 5 ج وكل كيلو ب 3ج أو حسب الاتفاق لو من غير عداد. ممكن في المسافات الصغيرة تتفق علي 10-20ج.
لو عددكم 5 او 6 اشخاص ممكن تشوفوا حد كويس بتاع عربية سزوكي ( التمناية وتاخدوا رقمة ويجيلكم ويوصلكم لاي حته .. اسعارهم بتبقي معقولة وحلوة وهاتبقي اوفر من التاكسي او الميكروباص.
الإقامة : فيه 4 انواع من الإقامة

فنادق كاملة التجهيزات ?: 4 و5 نجوم مطلة علي البحر لها شاطئ خاص وحمامات سباحة واماكن العاب للاطفال واسعارها تترواح من 1700ج حتي 9000ج الليلة شاملة الفطار.(زي البوسيت وقيصر باي وكارلوس بوريفاج وجاز كريستال)

فنادق عادية?: نجمتين او 3 نجوم في وسط البلد منها المطل مباشرة علي البحر ومنها ما هو بعيد عنه بدون اكل اسعارها تتراوح من 400ج وحتي 2800ج. ( زي رويال كراون وسيمراميس وكيلوباترا دول ع البحر مباشرة واسعارهم معقولة )، (وفيه ادريكتا وريو دول مش ع البحر بس يشوفوا البحر من بعيد ) واسعارهم كمان معقولة. شقق وشاليهات فندقية : غرفتين وثلاث غرف تسع من 4 الي 10 افراد منها المطل مباشرة ع البحر ومنها بعيدا عنه. اسعارها تتراوح من 450ج وحتي 1700ج الليلة بدون اكل. ( سانت ماري – سان جورج – سان جوزيف – …. )

شقق وشاليهات عادية ? : غرفتين وثلاث غرف تسع من 4 الي 10 افراد منها المطل مباشرة ع البحر ومنها بعيدا عنه. اسعارها تتراوح من 250ج وحتي 1700ج الليلة بدون اكل. ( درة الابيض و عروس الابيض دول في شاطئ الابيض علي البحر مباشرة بس بعيد شوية عن وسط البلد ) وفيه كتير قوي في وسط البلد . طبعاً الأسعار دي وقت ما انا روحت .. لكن طبيعي انها تختلف وتزيد شويتين خلال أيام العيد لان ده موسم. – طيب علشان تقدروا توصلوا للحاجات دي ازاي ممكن من خلال مواقع الحجز زي Booking وTripadvisor

• او التواصل مع الفنادق مباشرة من خلال مواقعها الالكترونية الخاصة .. او من خلال جروبات الفيس بوك هاتلاقوا كتير ناس بتعرض شقق وشاليهات للايجار.
• وفيه شركات كمان بتعرض رحلات كاملة بالمواصلات في شكل افواج من القاهرة لمطروح ..
• كمان هاتلاقوا ناس كتير داخلة تسأل عن اسعار واماكن واصحاب الشقق والشاليهات بيردوا عليهم بالسعر والصور وارقام التليفونات للتواصل.
• الجروبات علي الفيس بوك اللي ليها علاقة بالقصة دي / جروب مصيف مرسي مطروح – الجروب الرسمي، جروب مرسي مطروح الان ، جروب مصايف مرسي مطروح .. هاتلاقوا عليهم كل حاجة.

?ملاحظتين مهمين جدا:
مهم جداً تقروا مراجعات الناس عن المكان قبل ما تحجزوه .. ده بيدي مصداقية شوية للمكان ..
كمان بعض الناس بتبالغ جدا في اسعارها بنوع من الاستغلال خاصاً لو حس انك اول مرة تروح ومتعرفش حاجة .. هاتلاقيه بيقولك كلمني ع الخاص والتواصل واتس اب والكلام ده .. اللي زي دول لما يقولولك كده فاصل
معاهم علي قد ما تقدر وقارن اسعارهم باسعار ناس تانية عندهم نفس المواصفات في شققهم او شاليهاتهم.

? الأكل :
فيه اماكن اقامة بتوفر كل الوجبات ودي هاتكون غالية .. وفيه اماكن تانية بتوفر وجبتين فطار وعشاء اوفطار وغداء ودي بتكون ارخص شوية وفيه اماكن بتوفر فطار بس ودي بتكون ارخص كمان .. طيب لو المكان اللي اخدته مفهوش اكل .. بتروح السوبر ماركت (افضلهم اولاد فتح الله هاتلاقي كل اللي محتاجه من الابرة للصاروخ باسعار اقل من اي حته بره لانهم جملة ) وتظبط دنية الفطار والعشاء والاسناكس في اللذيذ .. تيجي للغداء ودي اما انك بتجيب طلباتك وتعمل غداك بنفسك في الشقق والشاليهات لو مجهزة بمطبخ بادواته او انك تتطلب دليفري او تروح بنفسك تاكل كل يوم من مكان بحيث انك تجرب مطاعم وانواع اكل مختلفة.( مشويات كمنة – اسماك مجدي – مشويات سحر – سندوتشات عزت – القرية البدوية – وكتير غيرهم اكلهم حلو ونضيف )?????

جرب البطيخ والتين البلدي والتين الشوكي والعنب والمانجو المطروحي .. اسعارهم حلوة جداً وطعمهم حاجة تاني .?? جرب تجيب لب ومكسرات وسناكس من النصر.

الانشطة ليك ولأطفال:
صباحاً:
الاستمتاع بالبحر? : اجمل حاجة انك تستمتع بجمال الشواطئ هناك والهوا وتنزل المياه وتريلاكس علي قد ما تقدر.. عينك وذهنك هايصفوا جدا .. جسمك كمان هايرتاح.
ممكن تاخد رحلة بحرية ? ساعتين باليخت ودي موجودة في كل حتة ب 80ج الفرد.
ممكن تاخد بنانا بوت أو منطاد او موتسيكل بحر من الشاطئ وبأسعار معقولة.
هات طيارة Kite وطيرها انت والاولاد هايتبسطوا قوي.
انزل مع الاولاد الميه والعب معاهم في الرملة وطلع الطفل اللي جواك ? ?‍♀️?

مساءاً:
اتمشي ?‍♂️ واستمتع بالهوا النقي ع الكورنيش وهات لب وترمس ودره مشوي وتين شوكي وايس كريم وفريسكا وعيش حياتك .. بس علشان خاطري خلي معاك كيس صغير تحط فيه اللي القشر وبعدين ترميه في اقرب باسكت زبالة من الكتير الموجود ع الكورنيش.
اطفالك ممكن يركبوا عجل وعربيات كهربائية واحصنة وجمال ? ع الكورنيش في اكتر من مكان.. كمان في زي قطر او طفطف بياخدك جولة صغيرة علي الكورنيش ..من الاخر اولادك هايتبسطوا.
في سيرك وملاهي وسينما باسعار من 20 – 40 ج بس مقفولة حالياً. ???

أهم الشواطئ :
شاطئ عجيبة ، رومل ، العوام العام ، الليدو ، الابيض العام ، كليوباترا، الغرام ، الرميلة مينا حشيش، البسنت ، الجونة ، بلو بيتش ، دريم ، الفيروز ، زمردة ، أم الرخم ، باجوش ، سيدي حنيش.
معظم شواطي مطروح بتتميز بنضافتها وهدوئها وجمالها بألونها الفيروزية الساحر ورملتها البيضه الرائعة.
معظم ان لم يكن كل الشواطئ الخاصة مفتوحة الي بالاضافة الي شاطئ العوام العام والأبيض العام وعجيبة.

? أهم اماكن ومعالم البلد المشهورة واللي ممكن زيارتها :
شاطئ عجيبة
حمام كليوباترا – صخرة كليوباترا- الممشي الزجاجي.
شاطئ الغرام – صخرة ليلي مراد.
متحف رومل .. وده فيه بعض مقتنيات عاصفة الصحراء رومل من الحرب العالمية التانية.(مقفول حالياً)
متحف اثار مطروح .. وده فيه كتير من الاثار الفرعونية للملك رمسيس التاني والملك نخاو من الاسرة ال26
للمهتمين بالاثار مفتوح يوميا من 9ص-3 م.

? اماكن الخروجات والتسوق والكافيهات:
منطقة العوام كلها : احلي واجمل كورنيش ومطاعم وكافيهات حلوة واسعارها معقولة.
سوق ليبيا : احلي زيتون وتوابل واعشاب بدوية وشاي ليبي.
شارع اسكندرية : هريسة احمد حسنين والدمياطي ومحلات لبس كتير ازواقها حلوة.????
شارع علم الروم : مقلة النصر – أحلي لب مطروحي.

?الميزانية :
طبعاً انت بتعمل اختياراتك في كل حاجة من دول سواء مواصلات او اقامة او اكل او انشطة علي حسب ميزانيتك وتفضيلاتك ومرونتك في الاختيار والتوفيق ما بين كل ده ..
انت تقدر تقضي اجمل 5 ايام بمبلغ 1200 ج شامل كل حاجة بأحسن اكل واحسن مكان اقامة واحسن فيو واحسن مواصلات مكيفة وتقدر تعمل كل ده بس بمبلغ اكبر(50 الف جنيه ) علي حسب ما انت عاوز ..
كمان ده متوقف علي كونك رايح لوحدك ولا مجموعة .. طبعا كل ما روحتوا مجموعة التكلفة بتتقسم فبتقل جدا تكلفة الفرد.

التوصيات :
حاول بالمعلومات دي ترتب رحلتك هناك من قبل ما تسافر بحيث انك تقدر تحضر ميزانيتك وكمان تستغل وقتك بشكل صح لانك مش هاتروح مطروح كل يوم بمعني انك تعمل خطة بالاماكن اللي نفسك تروحها وتوزهعا علي الايام اللي هاتقعدها هناك وترتبها بحسب بعدها او قربها من مكان اقامتك وجوجلك وجي بي اسك معاك وانطلق .. وخليك مرن علي قد ما تقدر.
خد معاك كاميرا او موبايل بكاميرا حلوة .. لانك هاتندم لو معملتش كده جمال المناظر هناك يستحق انك تصوره وتصنع احلي ذكريات تدوم معاك.
لو معاك أطفال وعاوز تاخدهم للبحر من غير ما تكون خايف عليهم من الامواج .. يفضل تروح شواطي زي الغرام وكيلوباترا وروميل والبسنت مطروح العام والليدو والنخيل. ( اللي مفتوح وجربناه – شاطي فندق ايجلز الخاص علي خليج الغرام ب 100ج للفرد استخدام الشاطي ومنظقة الالعاب و200ج لو هاتستخدم البيسين .. بيديلك شمسية و4 كراسي – ميزته انه نضيف ، هادي ، ومفيهوش امواج) لو حصل وانك نسيت اي حاجة من متطلبات المصيف لبس او ادوات متعولش هم لانك هاتلاقي كل حاجة هناك متوفرة وبأسعار رخيصة جداً.?
اخيراً .. اذا كنت عاوز رحلة ممتعة وغير مكلفة وبميزانية بسيطة فمتترددش في انك تروح مرسي مطروح فى الصيف انت واصحابك او انت وعيلتك وتستمتع.
? ملحوظة صغيرة : اكيد اكيد فيه ناس كتير قوي عندي راحت مطروح قبل كده وليها تجربة وخبرة حلوة بالبلد فممكن يصححولي لو كتبت حاجة مش صح او يضيفوا لو نسيت حاجة .. خاصة ان دي اول مرة ليَّ وكمان روحت اثناء الكورونا فكتير من الاماكن كانت مقفولة!

قبل ما تتفرج علي الصور بنرشحلك المكان ده
مالديف مصر مرسي مطروح