رأس شيطان دهب السعادة والروقان

رأس شيطان دهب السعادة والروقان

رأس شيطان
ازاي تعمل ميدتشن لـ حياتك وتفصل منها،
وتعيش استجمام مش هتلاقيه في مكان تاني.. بس افصل دماغك وعيش معايا
الموضوع ده هيلخصلك كل تفاصيل السفريه مش هتحتاج تدور بعده. .. اسمع مني دي خلاصة المكان هناك
واهم قاعده تعرفها انك. هتعيش هناك، بقوانين وحياة رأس شيطان مش بحياتك انت.
ولازم توافق علي كدا، قبل ما تسافر.
تعالوا نبدأ-
◾فين راس شيطان :
شواطئ خليج العقبة بين مدينتي طابا ونويبع جنوب سيناء
◾ازاي توصلها :
– المشوار بياخد 6 ساعات لو بعربيتك الخاصه ودا بيكون انسب حل للسفر ليها.
– لو عدد صحاب يبقي الافضل تاخد ميني باص وتتفق معاه يوديك و يجيبك.
– لو لوحدك هتحجز تكت باص نويبع من شرق الدلتا او جو باص او بلو باص… وتعرف كويس اسم المكان اللي حجزت الكامب عشان هتنزل علي الطريق.
◾الأقامه :
اماكن الاقامه هناك نوعين
النوع الاول ☝ : (خيم مشدوده علي رمله او اكواخ اكشاك من بوص فقط) وبيبقي الحمام مشترك ونضيف طبعا لان المكان سياحي للسياح اجانب اكتر.
ونوع التاني✌: اكواخ مبنيه من الطوب ومتحوطه بالخوص وفيها حمام خاص وتكييف.
واغلب الاقامه علي البحر علي طول او علي تلال قصاد البحر،
كل الاختيارات عموما مريحه بس الفكره ف التعود والقابليه هل هتقبل تتجرد من كل الرفهيات وتبقي متعتك كامبينج ونجوم وبحر،
ولا محتاج شوية رفاهيه مع النجوم والبحر… الموضوع كله بيرجعلك انا
– اغلب الاقامات بتبقي شامله كافة الوجبات او فطار وعشاء… ولو هتحتاج اي حاجه تجبها معاك وانت جاي.
الاسعار تبدأ من 100 جنيه في الليله الي 600 جنيه ودا سعر المتوسط للكامبات وعلي حسب اختيارك لنوع الاقامه والوجبات.
◾قوانين راس شيطان:
ركز بقي عشان دا المهم ❗
طبعا رأس شيطان من افضل الاماكن للسياحه البحريه ودا ليه…بسبب سحر البحر اللي مخليها مكان مميز للغطس والسنوركلينج… بسبب كثرة الشعاب المرجانية وأسماك بمختلف الوانها وانواعها والكائنات البحريه، وغنية بشقائق النعمان بمختلف أشكالها وألوانها. ودا خلى المنطقه السياح فيها اكتر من المصريين.
– اول قانون في الحياه هناك انك تفصل الشبكه عن موبيلك تماما.. وتستمتع بالعزله عن حياتك الي انت سيبها لمدة 4 ايام. موبيلك للتصوير فقط..
– لازم تنام بدري عشان تصحى بدري… معروفه يعني .. لأن الحياه هناك مش ليليه تماما ولو سهرت هيضيع عليك انشطة الصبح.
-الكهرباء هناك بمولدات بتفصل علي منتصف الليل.. بليل بيكون في حلقه بدويه عباره عن نار وبتتجمعوا حوليها وعلي حسب انشطة كل كامب من اغاني او عروض بدويه. ف هات شموع معاك بقى يا معلم لو انت عاوز تختمها رومانسيه (اوي😉).
– حاول تنزل الموسيقي اللي هتسمعها بليل وانت لوحدك قاعد علي البحر و منك للسماء (ومتنساش الشيشه بتاعتك😌 ، والكتاب، ومشروبك السخن المفضل خيااال ) مش عاوز اقولك الشيشه علي البحر عامله ازاي بالاخص مع الجو دا، الكراسي هناك. مرصوصه علي البحر مباشرة. لو معاك شيشه الكماين هترزل عليك شويا.. ولكن هتعيش كام مره هاتها معاك.
◾ الانشطه في رأس شيطان :
– لازم تصحى بدري…. 🙋‍♂️
وقت الصوبحيه دا بقي :
– اول حاجه هناك الانشطه البحريه طبعا.. هناك هتقدر تعمل غطس وتشوف احلي انواع سمك في العالم كله… ولو مش عاوز خد البس الماسك دا واعمل الاسنوركلينج اللي هيخليك ف طاقة ايجابيه مختلفه من ابداع ربنا في خلقه في البحر.
وتقدر تعمل جوله بحريه بالمركب وتشوف لوحه فنيه من الجبال في حضن المياه من بعيد.
– كل كامب بيتميز بأنشطه بين كرة التنس الشاطئيه وشد الحبال والعاب كتيره بتبقي علي البحر لو شله هتستمتعوا ولو لوحدك الكل بيتجمع ويتفرج ويلعب ويشارك.
⛔ -لازم تصحى بدري…. 🙋‍♂️
– بيبقي في كل كامب مجموعه بتطلع تتسلق الجبال اللي حولين الكامب بتقدر تسال عليه قبل ما تحجز.
– وادي الوشواشي: رحله بتطلع مع مجموعه بيبقي عباره عن ثلاث بحيرات عذبه (كل بحيرة لها لون مختلف، فهناك البحيرة الزرقاء بلون السماء، والبحيرة الفيروزية، والبحيرة الخضراء.) تحيط بها الجبال،
بتتسلق الجبال وبتبدي تنط في البحيره، دايما شتاء او صيف درجة الحراره دافيه وتجربه عمرك ما هتجربها في اي مياه تانيه وافضل وقت بعد الشتاء علي طول لانها تجمعات من الامطار، بتخرج كل ارهاق السنين اللي شفته الجبل بنفسه حضنك 😌
– الوادي الملون.. ودي رحله لعشاق تسلق الجبال ونادر حد يطلعها الا لو هاوي… مجموعه من الجبال المتعدده الوانها ومتاهات.. وجبال مرتفعه يتم تسلقها.
تخيل كدا معاك براد الشاي وانت علي جبل ملون انت وصحبك وشايف السحاب.
وقت العصاري :
– بتاكل وجبة الغداء الخاصه بيك وتستمع بمنظر الغروب والالعاب الفرديه علي البحر ….
🌔🌔وقت الليل طل:
يبدأ النشاط الليلي اللي بيكون ف الكامب حلقة النار والانشطه من الاغاني البدويه مع حفلة الشواء او وجبة العشاء
– ووقت الليل مع الشيشه بتاعتك، وتنام علي صخره، وسامع صوت البحر مع موسيقى هاديه، وكوباية قهوتك او الشاي المرمريه… وباصص في السماء وتعد النجوم حرفيا هتشوف صورة فوتوشوب من النجوم وجمالها ودا بسبب انعدام الضوء ف المنطقه كامله ف بتقدر تشوف 99% من النجوم. لحد وقت النوم… هحطلك صوره قريبه للوضع دا من تصويري تحت 👇
الأكل : الاكل هناك طبعه بدوي ف هيعجبك جدا خصوصا لو الكامب سمعته محترمه
-الفطار :بيض وعيش بدوى وفول وزبده وبطاطس محمره وجبنه بطماطم و شاي المرمريه البدوي
-العشاء : نصف فرخه او قطع لحم مشويه او اسماك مشويه علي حلقة شوي ليليه بالطريقه البدويه ودي بتبقي افضل اكله.. بيجلك معاها طاجن خضار في الفرن والاطباق الجانبيه (بتختلف من كامب لأخر ف بتسال قبل الحجز)
-افضل الاكلات المأكولات البحريه التي يتم اصطيادها مباشرة من البحر اكله هتفوتك. بالاخص وهيا مشويه.
⛔ لازم قبل ما تحجز تعرف حجزك شامل ايه.. واسعار الوجبات والمشاريب ايه مهم جدا
◾تسمية راس شيطان😈:
يرجع سر تسمية الجزيرة براس شيطان إلى أن السياح الاجانب كان يصعب عليهم نطق الاسم الأصلي وهو (راس الشطآن) ومع الوقت تحولت لراس شيطان .
◾الوقت الأفضل للسفر
الوقت الحالي من نزول الموضوع 😔 من 15-5 الي 15-7. دا وقت التان تفضل في المياه لحد ما تبوش عشان الشمس وتاخد التان الدهبي..
و في الشتاء بتقدر تاخدها استراحه في صعود سانت كاترين.
وتقدر تسافر ف اي وقت ولكن دي افضل الفترات ل رأس شطان
⛔وتخلي بالك في الشتاء تحفه لو هتروح بس لازم تجيب دولاب معاك خصوصا لو حجزت خيمه
◾ النصائح :
– لو عاوز تعمل غطس اسأل علي كامبات الغوص لان يوجد مناطق مبتدئين و محترفين فقط
– لازم تجيب معاك كشاف طوارئ احتياطي.
-لازم يبقى معاك فوطه ومناديل والبطاقه طبعا او جواز السفر
-وكوتشى لو حابب تطلع الجبل
-بيرسول و OFF اللى بيترش على الجسم
– باور بانك وتشحنه ف الوقت اللي في الكهرباء قبل ما تفصل.
– ادوات الاسنوركلينج اشتريها وجزمة البحر.
-كاميرا بروفشنال
– اسأل علي الانشطه في الكامب قبل الحجز واحجز قبل التحرك.
-خلي بالك في اكذا طريق للوصول اسال قبل ما تتحرك.
-اسال صاحب الكامب هتنزل فين لو راكب الباص

قبل ما تتفرج علي الصور بنرشحلك المكان ده
نصائح السفر الى دهب

وسم :

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*