أسوان بلاد الدهب بلاد العشق والجمال

أسوان بلاد الدهب بلاد العشق والجمال

 تجربتي هنا قبل مسافر الأقصر ونبدأ بسم الله
أسوان بلاد الدهب بلاد العشق والجمال
أسوان ليها ألقاب كتير وهيا تستحقهم كلهم بصراحة وعن جدارة
مبدئياً كدا انا مسافر الرحلة دي تبع معسكرات وزارة الشباب والرياضة
وهحكي عن تجربتي في الأماكن اللي زرتها

المتحف النوبي
أول مكان زرناه في أسوان
المتحف كبير وفي قطع اثرية نادرة وءاية في الجمال
بيكون معانا tour guide بيلف معانا المتحف حتة حتة وبيحكي عن قصة كل أثر وتمثال
في المتحف دا هتلاقي حاجات من عصور مختلفة
مثلاً من أول الفراعنة بحياتهم إلي بداية اليهودية والمسيحية والإسلام ومتعلقات كل حقبة من دي
مروراً بقا بالدولة الفاطمية والمماليك والعصر العباسي وكدا.

السد العالي
واحد من أعظم مشاريع أسوان الحديثة
وطبعاً كلنا عارفين أد ايه هو مصدر مهم لتوليد الكهرباء
علشان هتلاقي حواليه محطات كبيرة لدا
إحنا نزلنا مطولناش هناك تقريباً تلت ساعة ودي كافية جداً
لأنك تقريباً هتتصور بس ومفيش حاجة تانية هتعملها.

جزيرة ومعبد فيلة
بتوصل للمعبد دا عن طريق مركب في النيل وهوا مميز جداً في مكانه اللي في وسط النهر
ونحت التماثيل فيه ونقوشاته اللي علي الجدران خيال

متحف النيل
في نموذج للحياة البرية في دول حوض نهر النيل
وهوا زي هولوجرام كدا لبعض الشخصيات هناك زي علي باشا مبارك بيتكلم ويقول انجازاته وكدا
وفي مجموعة لوحات فنية أهداها فنانين شعبيين للمتحف
بس متحف النيل مكنش أحسن حاجة زرتها أوي

القرية النوبية
دي بقى الجمال كله في مكان واحد
البيوت هنا ملونة شبه البيوت اللي في بكار كدا
بنروحلها بمركب وبتمشي شوية في النيل وتستمتع بالمناظر اللي حواليك وممكن تملي مياه وتشرب من النيل
المياه هناك نظيفة جدا ملهاش طعم ولا لون ولا ريحه غير بتاعت النيل في مصر خالص (بس خليك ناصح وابقي املي من وسط النهر مش الشط)
ومن الحاجات المشهورة اللي هتعدي عليها فندق old cataract اللي اتصور فيه جراند أوتيل
وقصر محمد منير وبالمناسبة وأنت ماشي في شوارع النوبة هتسمع أغانيه في المحلات ووسط الناس
أول موصلنا بقااا استقلبنا بيت الحاج ناصر وشربنا الشاي النوبي الجميل وفرجنا علي التماسيح اللي مربيها في بيته
واتصورنا عنده مناطق جميلة تحس إنها حتة من فيلم كدا
وبعدين خدنا الجولة بتاعتنا في القرية نشتري الهدايا
ومن غير ماتشتري كفاية بس إنك تمشي في البلد وتتفرج علي بيوتها وأهلها وناسها الجمال الطيبين

قبل ما تتفرج علي الصور بنرشحلك المكان ده
رحلة إلى قبة الهوا او جبل ابو الهوا بأسوان

وسم : /

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*