ازاى اقضى يومين فى وادي الريان ووادي الحيتان

ازاى اقضى يومين فى وادي الريان ووادي الحيتان

لأي حد حس بتعب او زهق وهو طالع الصحراء سواء مشوار صد رد يوم واحد او هيبات يوم في الصحراء ….. أحب أقول لك انت بس كنت طالع مع الناس الغلط! 😅
احنا أصحاب مع بعض طلعنا يومين مع نفسنا رحنا وادي الريان ومنه لوادي الحيتان وخيمنا هناك طول الليل ⛺️ والصبح طلعنا على جبل المدورة ومنه للبحيرة السحرية لا كلمنا شركة سياحة ولا جروب رحلات ولا أي حاجة أجرنا عربية 4*4 وابتدينا اليوم.
اول يوم وصلنا وادي الريان دخلنا منطقة البحيرات ومنها للشلالات قعدنا شوية وبعدها طلعنا على وادي الحيتان لفينا في المتحف المفتوح لحد ما تعبنا وبعد كده طلعنا نشوف مكان للتخييم وبعدها طلعنا أحلى شواية وعملنا أحلى أكل كان الليل بدأ يدخل وقضينا أجمل يوم تحت النجوم وتصوير كتير أوي.
تاني يوم بعد ما صحينا وفطرنا ولمينا الخيم طلعنا الجبل اللي هناك (أيوة متعب بس الفيو يستاهل) ونزلنا وروحنا طالعين على جبل المدورة مش الجبل نفسه بس المنطقة المقابله له اللي تخلينا كاشفين المكان كله بانوراما وبعد ما قعدنا واتصورنا كملنا الطريق للبحيرة السحرية كان مكان جميل جدا هناق بقى اللي حب يعوم عام واللي حب يلعب بالساند بورد لعب وانا صورت وبعد ما خلصنا كان اليوم التاني خلص والليل دخل تاني.
يومين مكنوش مكفيين والحقيقة الراجل اللي كان سايق العربية كان مظبطنا على الاخر أخد الطرق كلها off road وطلع بينا جبال ونزل منحدرات عجيبة لدرجة اننا قررنا نشتري عربية دفع رباعي ونبقا نطلع بيها حتى لو هنشترك فيها مع بعض 😁
ان شاء الله هنروح تاني لان في أماكن لسه مروحناهاش هناك ولسه في مطقة جبل قطراني شمال بحيرة قارون وان شاء الله متأكدين اننا هنتبسط تاني

قبل ما تتفرج علي الصور بنرشحلك المكان ده
كل حاجه عن قرية تونس الفيوم

وسم :

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*