برنامج خروجة رمضانية جميلة وغير مكلفة انصحكم بيها عشان تستمتعو بجو رمضان الرائع وتعيشو رمضان مصرى اصيل .. اليكم البرنامج .

جمعو اصحابكم واقاربكم واحبابكم واتقابلو قبل الفطار يعنى على العصر (ممكن تصلو العصر فى جامع المؤيد شيخ عند باب زويلة) وبعدها اطلعو مأذنة باب زويلة هناك تكت ب ١٠ ج واتفرجو على القاهرة من اعلى ٤٠ متر فوق مئذنة جامع المؤيد شيخ ال على باب زويلة . وانصحكم تروحو تلفو شوية فى منطقة الخيامية اخر شارع الغورية وخلف مديرية امن القاهرة ( ورش العمال اجازة يوم الاحد من كل اسبوع) واشترو هدايا من هناك والاسعار هناك رخيصة ومنتجات شغل يدوى رائع وكمان الشارع هناك مليان جوامع واثار والشماعين والنحاسين ومنطقة كلها خير .. بعد كدا على الساعة 5.30 كدا ابتدو اتحركو عشان تروحو تفطرو مع بعض فى اى مطعم فى منطقة الحسين او المعز او الازهر (ومش هحدد اسماء مطاعم والمنطقة هناك مليانة مطاعم كتير بس للامانة اغلب المطاعم هناك اسعارها غالية خصوصا فى رمضان ) بس يفضل يكون فى حجز مسبق مع المطعم عشان تلاقو اماكن عشان الزحمة طبعا .. وممكن كمان تخدو فطاركم معاكم وتقعدو فى جامع الازهر او فى جامع الحاكم بامر الله فى الساحة بتاعتهم وتروحو تفطرو هناك او تقعدو فى اى كافية ومعاكم فطاركم .. خلصتو فطار خلاص وخدتو السيلفى المتين .. استعدو بقى للخروجة ال مش هتنسوها طول عمركم ..

و الساعة ..8.00 م تطلعو على وكالة الغورى ورا الجامع الازهر وال مكانها خلف مطعم جاد بالضبط من شارع الازهر عشان تلحقو تحجزو عرض التنورة الرائع ال مالوش مثيل ب ١٢ جنيه الفرد .. وهيبقى معاكم وقت قبل العرض لو هتصلو العشا عندكم مسجد سيدنا الحسين وعندكم الجامع الازهر . والاتنين قريبين منكم .. وبعدين ترجعو تانى للوكالة العرض بيبدء 9.15 وبيخلص حوالى 10.30 تقريبا بس خدو بالكم العروض بتكون ايام (السبت والاتنين والثلاثاء فقط) من كل اسبوع … وعلى فكرة العرض شغال فى غير رمضان طول ايام السنة فى نفس الايام بس الساعة 7 م فى غير رمضان . وممكن بعد ما تحجزو التذاكر هتطلعو من التنورة فى الوكالة وتعدو الشارع فورا عشان تروحو تتصورو فى شارع المعز لدين الله الفاطمى بالليل مع اضواء الجوامع والالوان وتتمشو فى اكبر متحف اسلامى مفتوح فى العالم كله (ودا دخوله مجانا) .. ودا هتقدرو توصلو له بعد ما تعدو الشارع من وكالة الغورى اخر كوبرى الازهر وتدخلو شارع الصاغة لاخره هتلاقو نفسكم فى المعز .. طيب بعد ما تتمشو خلاص كدا خلص اليوم ؟؟ لا طبعا .

اطلعو عن سبيل كتخدا فى نص شارع المعز عشان تشربو احلى واكبر كوباية تمر هندى وسوبيا ومانجو ساقعة مشبرة وعينك هتطلع عليها (التمر هندى ب 5 ج / السوبيا 5 ج / المانجو ١٥ ج ) خلصتو شرب ومشى وتنورة خلاص نبتدى بقى ندخل شارع الجمالية من عند بيت السحيمى على طول عشان نستعد نطلع للزحمة ال مالية شوارع وحارات خان الخليلى ودا هتلاقوه بعد ما تخلصو شارع الجمالية وتدخلو من جمب مسجد سيدنا الحسين تلفو فى خان الخليلى وباب الحارة واجمل واعرق شوارع فى مصر وسوق عمره اكثر من 600 سنة .

طيب قربنا بقى على وقت السحور .. هنتسحر فين ؟؟ عندك حل من اتنين … يا اما تغامر وتطلع على الروف بتاع فندق الحسين هتلاقى هناك مطعم فوق الروف حلو جدا وقعدة مكشوفة فى الهوا وهتتفرج منه من فوق على الازهر والحسين والزحمة ودا اسعاره كالاتى من ٦٠ ل ١٠٠ ج السحور شامل المشروب .. او تختار اى عربية فول فى الحسين او المعز وتتسحر عليها ومش هتكلفك اكتر من ٣٠ جنيه بالكتير .. خلصنا سحور وتصوير وانبسطنا .

اختم يومك بانك تصلى الفجر فى مسجد سيدنا الحسين او الجامع الازهر وبعد كدا هتطلع هتلاقى المواصلات شغالة وعربيات اجرة وتاكسى كتير توديك اى مكان انت عاوزه
رمضان فى مصر غير اى رمضان فى الدنيا كلها .. ودى دعوة كمان لاخواتنا العرب ييجو يزورو مصر فى رمضان ويشوفو الاجواء الرمضانية المصرية والبلد ال مش بتنام وشوارعها كلها روحانيات وفرحة وبهجة وحب وانوار وزينة
يارب يدوم علينا عاداتنا الحلوة وتراثنا ونتمسك بيه اكنر واكتر وربنا يحفظ مصر والمصريين من كل سوء ? ملحوظات مهمة .. ياريت لو مجموعة بنات وهتسهرو فى شارع المعز للصبح تخدو معاكم احد الاقارب الشباب او اخ عشان تكونو براحتكم اكتر وعشان الزحمة ال مالية الشارع هناك طول الليل .

ياريت نخد بالنا ان شارع المعز والمحلات والمطاعم هناك بيكونو زحمة يوميا يعنى طوال شهر رمضان المنطقة هناك زحمة اوى ولو مش بتحب الزحمة والاجواء دى مش هتنبسط ولكن حاول تروحو فى يوم وسط الاسبوع لان ايام الخميس والجمعة والسبت بيكونو زحمة جداااااا اكتر من الايام التانية .

بالنسبة للافطار والسحور عندكم هناك فى المعز فى مكان اسمه الربع اسالو عليه دا عبارة عن مكان بيتعمل فيه حفلات تراثية وانشاد وكمان ممكن تخدو اكلكم وتروحو تفطرو على الروف بتاعه مكان حلو اوى واسعاره مش غالية بس لازم تخد اكلك معاك .. دا طبعا غير المطاعم المنتشرة فى الحسين منها الغالى زى الدهان مثلا ومنها المتوسط زى جاد وفى مطاعم تانية كتير جدا .

بالنسبة لتكلفة اليوم .. انت تقدر تتحكم فى مصاريفك .. يعنى ممكن تفطر باقل المصاريف او حتى تخد اكلك معاك من البيت .. وممكن تفطر بمبلغ كبير .. وهكذا المواصلات ممكن تركب تاكسى وممكن تركب مواصلات عامة من ادام جامع الفتح برمسيس او من عند العتبة ميكروباصات هتوديك لحد الحسين والازهر والغورية ب ٤ ج وهكذا فى ناس بتحب تقعد فى كافيهات وهناك الكافيهات غالية وفى ناس بتحبط تلف وتتفرج وتزور اماكن اكتر ما تقعد فى كافيه .

لو انتو عندكم اجازة من اول اليوم وفاضيين انصحكم جدا تنزلو من الصبح بدرى وتخدو مزارات شارع المعز (لازم الصبح لحد الساعة 4 لانها بتقفل بعد كدا ) عندك اكتر من 15 مزار واضحين ومتاحين فى شارع المعز وكلهم بتكت 10 ج .. مجموعة السلطان قلاوون ومجموعة السلطان محمد ابن قلاوون وجامع الظاهر برقوق وحمام اينال وقصر الامير بشتاك وجامع الحاكم بامر الله وبيت السحيمى وجامع السلحدار . الجولة دى هتبسطكم اوووى وهتبقى فسحة جميلة .

قبل ما تتفرج علي الصور بنرشحلك المكان ده
أحلي خروجة في وكالة الغوري