أجمل خروجة في القاهرة هي خروجة الأهرامات بس برضو ممكن تكون اوحش خروجة
ازاي تقدر تخليها اجمل خروجة اليك التفاصيل ونصائحي لقضاء اجمل يوم هناك بالتفصيل..
اولاً: تصحي بدري وتوصل الاهرامات ٩ أو ١٠ الصبح بالكتير
ثانيًا: تروح علي بوابة الدخول الرئيسية وتقطع التذاكر للمصري ب١٠ج وللعرب ب٣٠ ج وللاجانب ب٢٠٠ج ومتقفش ولا تسمع لحد ولا تروح مع حد نهائي طول الطريق..
ثالثا: في بتوع خيل بعربية كثير ودي تاخذ شخصين، تتمشي وتختار واحد تتفق معاه يطلعك فوق تتصور مع ال٣ اهرامات وينزلكم عند ابو الهول ب ١٠٠ج قبل ما تركب وماتدفعش غيرها وهيتخانقوا عليك ويقولولك ب٥٠ ج كمان.
طول ماانتم ماشيين بالخيل منظر جميل للاهرامات ممكن كل شوية تقولوا يقف تتصوروا.
رابعًا: لما تنزلوا عند الاهرامات والرحلة تخلص مع الخيل اتصوروا مع ابو الهول واي حد يقولكم اصوركم او اعمل ايدك كدة او تعالي من هنا متسألوش في حد خالص وصوروا نفسكم وبعض فقط متخلوش حد يتدخل!
بعد التصوير مع ابو الهول اقفوا قدامه واتصوروا معاه هو والهرم اللي وراه شكلهم حلو وصور روعة
خامسًا: بعد كدة هتخرجوا من البوابة هتلاقوا كنتاكي وبيتزا هت وابو شقرة في جمبهم عدة كافيهات ومطاعم في الادوار الاخيرة من العمارات او الفنادق كلها تطل علي الاهرامات انا روحت egypt pyramids inn مثلا الدور الاخير خالص في هناك فطار ب١٠٠ جنية للشخص شامل فطار ومياه معدنية ومشروب من اختيارك. ولو بعد الظهر هتتغدوا او تتعشوا في مينيمام تشارج ١٥٠ ج. ودي اسعار معظم الكافيهات والمطاعم هناك واطلع اسأل برضو.
وتقدروا تاخدوا احلي صور من المطاعم والكافيهات اللي فوق باصة علي منظر الاهرامات شوفوا الصور فيها كل اللي اتكلمت عنه
و لو شخصين كل ده اجمالي تكلفة الفرد الواحد حوالي ١٤٠ جنية