من احسن اماكن للخروج في المعادي يبقى محمية وادي دجلة
نفسك تقعد في قلعة و تشوي مع نفسك و تنزل كانيون و تنبسط انت و اصحابك او انت و اسرتك
اجمل اماكن المحميه عشان فيها القلعه و فيها الكانيون.
ازاي توصل لمكان ده؟
في طريقتين:-
1 – تتمشي علي رجلك 12 كم من بوابه المحميه ناحيه منطقة زهراء المعادي او ممكن بالعجله بس من اعلي منطقه الجبال.

2 – تاخد عربيتك وتمشي اتجاه العين السخنه هتلاقي يفطه مكتوب عليها “العين السخنه 99كم” هتلاقي طريق يمين تدخل فيه هتمشي بالعربيه 200 متر هتوصل تلاقي قلعه كبيره اركن قصادها وخش استمتع من غير اي مصاريف ولا تكت.
الطريق متسفلت و في مكان لركن العربيه فمتخفش عليها و في غفير لقلعه ديه فالدنيا امان.

هتدخل القلعه هتلاقي في اماكن لقعده و لو معاك شوايه هتلاقي مكان تشوي فيه و هتلاقي كافيتريا مقفوله ممكن تاخد منها كراسي او طربيزه بس استاذنك تخلص وترجعها مكانها.
هتشوف المحميه من اعلي نقطه ليها و الميزه ان في سلالم لنزول اسفل المحميه و الطلوع ليها و علي بعد 50 متر من القلعه هتلاقي الكانيون.
هناك ممكن تعمل حاجات كتير جدا ركوب العجل او تلعب كوره او راكت او تشوي او تعمل شاي فحم من الاخر هتعيش حياه بدائيه و هوا نضيف.
المحميه ممكن تزورها لحد الساعه 5 المغرب و ممكن تقعد في القلعه لحد بعد 5 لكن لو هتنزل تحت مش هينفع غير لو معاك تصريح بيات بتحيبه من بوابه المحميه ب 25 جنيه وبتديه لغفير اللي عند القلعه.
الجو في الوقت الحالي يعتبر انسب جو لزياره فاستغلوا الجو ده جدا وابعدوا شويه عن جو الكافيهات والمطاعم.
ملحوظه مهمه جدا
لو سمحتهم خلي معاك كيس ترمي فيه مخلفاتك بلاش تلوث الدنيا او تشغبط علي القلعه زي “هنا يرقد حب سوسن و سعاد” و الجو اللي بنشوفه عن الاهرامات و منطقه عجيبه في مرسي مطروح خلينا نحافظ علي الحاجه نضيفه عشان غيرك يرجع ينبسط زيك