الحسين
عارف ان مفيش حد ف مصر ماكنش هناك ف يوم من الايام بس المكان دة قمة البهجة بالنسبالى ❤
حبيت اروح اقضي يومي هناك انا وواحد صاحبي وصلت هناك الساعه ١١ و دخلت جامع الازهر و اتصورت فيه متتخيلش انه بالجمال ده بعد التجديد
بس صدقنى هيحصلك أنبهار زى دة ??? لما تروح وتشوف الجمال ده
ما بين الصلوات بيبقى فى جنسيات مختلفة وتقريبا مفيهوش مصريين
شايف الاجنبى بيقدر جمال بلدنا عننا أزاى
بعد كده صليت الظهر و طلعنا علي خان الخليلي المكان بيدي راحه نفسيه تلقائيا اول ما بتروح وبيخليك تلف تلف بالساعات و انت منبهر سواء كنت مصري او من اي مكان ف العالم لازم تزوره المكان ميتفوتش. لقيت الساعه لسه ١ قلت اروح المعز و امشي فيه شويه نزلت شارع المعز
شارع المعز من اجمل الاماكن اللي ممكن تزورها في مصر .. وانت هناك بترجع بالزمن وتعيش كل الحكايات اللي سمعتها عن مصر القديمه.
و بعدين كنت حابب اقعد لحد بليل عشان اشوف المنظر بليل بيقي جميل جدا ف كنت عاوز اقعد ف مكان حلو لحد ما الوقت يعدي سألت الناس علي مكان اقعد فيه وواحد قالي علي مكان اسمه زينب خاتون خروجة للناس اللي بتحب القعدة العربي في اجواء تاريخية،
لما دورنا على النت لقينا ان الكافيه ده معمول في بيت قديم بيرجع للتراث المملوكي، صاحبة المنزل ” زينب ” وكانت احدى خادمات ” محمد بك الألفي ” وده واحد من كبار الامراء المماليك، وبعدين اعتق زينب وبقت حرة وتزوجت أميرا يدعى ” الشريف حمزة الخربوطلي ” ، ولانها تزوجت امير تم اضافة كلمة خاتون بجوار اسمها واللي معناها المرأة الشريفة .
البيت يعتبر واحد من النماذج العظيمة الموجودة في مصر على الطراز المملوكي، ومن سنوات قليلة تم تحويل الساحة الصغيرة اللي على يسار المنزل لكافيه بقعدة عربية، بيقدم كل انواع المشروبات، واسعاره بتبدأ من 10 جنيه .ده هتلاقيه
في شارع محمد عبده – الدرب الاحمر ، خلف مسجد الأزهر
قعدت فيه لحد الساعه ٧ بليل و بعدين نزلت الف تاني ف الحسين الحسين بليل حاجه تانيه خالص المكان كله منور و فيه بهجه كده طبعا روحت اتصور و مشتريتش حاجه بس كفايه جمال المكان ?
بعد كده قعدنا علي الفيشاوي بليل وكملنا سهرتنا. كان يوم جميل جدا و مكلفناش كتير انت كمان ممكن تاخد صاحبك او صاحبتك ? و تقضوا يوم جميل هناك .