ازاى تسافر المغرب اسبوعين وتزور 9 مدن ب 8000 جنيه

ازاى تسافر المغرب اسبوعين وتزور 9 مدن ب 8000 جنيه

سافرت المغرب ١٦ يوم وزرت حوالي ٩ مدن هناك ب ٨٦٠٠ ج
المملكة المغربية عامله زي بلاد العجايب أو ألف ليله وليله
كل مدينه هناك كأنها بلد جديده ، بأهلها ومعالمها وكل حاجه فيها ، تنتقل من بحر لمدينه فيها ثلج لصحراء لغابات لجبال ووديان وشلالات
ميزه المغرب أن الدرهم المغربي بيساوي أقل من اتنين جنيه ١.٨ ج
الطيران كان ب ٣٧٠٠ ج + رسوم الفيزا ٤١٥ج
وسعر الطيران الحالي حاطاه في اخر صوره
الإقامه عشر أيام ١٨٠٠ ج في فنادق وهوستيل
المواصلات الداخليه حوالي ١٠٠٠ ج
وقعدت ٦ أيام زياده، ثلاته منهم كانت استضافه من مهرجان سينمائي و٣ عند صديقتي الشفشاونيه اللي اتكلمت عنها البوست اللي فات .
والأكل هناك مش غالي يعني من ١٠٠-١٥٠ج يكفوا فطار وغداء وعشاء ووشاي وقهوه وحلويات ولو عاوز فاكهه ممكن تجيب كمان
أول مدينه نزلت عليها هيا طنجه قعدت فيها حوالي ٣ ايام موجوده علي البحر على طول ومافيش بينها وبين أسبانيا غير حاجه بسيطه جدا وتقدر تشوف معالم أسبانيا وأنت واقف علي البحر هناك .
بعدين روحت تطوان بعيده بساعتين ، مدينه عريقه تراثيه جدا ، أول ما المسلمين نزحوا من الأندلس نزلوا عليها فتلاقي هناك كل المعمار الإسلامي في البيوت الأندلسيه القديمه ،كنت قعدت هناك في بيت اندلسي قديم جدا والسوق هناك رائع ، لو نزلتوا وسط البلد بتلاقي ناس كتير واقفه عشان تتفرجك علي معالم البلد كلها وممكن تديلها من ٢٠-٣٠ درهم
وبعدين اتحركت على شفشاون وكانت تلك المدينه اللي أسرت قلبي ، أو بيسموها الجوهره الزرقاء عشان كل بيوتها وشوارعها زرقاء ويقال أن أهلها أحبوا زرقه السماء فطلوا بيوتهم باللون الازرق وهناك في شلالات ووديان وفي قريه بعيده عنها حوالي ساعه اسمها أقشور فيها شلالات وطبيعه خياليه في وسط الجيال والوديان مممن تروحوا تتغدوا هناك وتقضوا اليوم هناك.
بعد زياره مدن الشمال والجبال اللي كلها أشجار والشلالات والوديان ، روحت لمدينه فاس ومدينه فاس واحده من أقدم المدن في العالم وأكتر حاجه بتميزها المعمار اللي فيها وأشهر المعالم فيها باب أبي الجنود ومسجد القرووين والأندلسين وسور بفاس البالي والبرج الشمالي وكمان أبواب فاس اللي موجوده في كل مكان.
وبعيد عنها بساعه في مدينه اسمها مكناس شبهه فاس بردوه بس ليها جو مختلف
وبعدين روحت كازابلانكا أو الدار البيضاء ، هيا جوها زي المدن بالضبط ومولات وكده بس الحلو فيها أنها على البحر على طول ، ماحبتهاش اوي الحقيقه وحسيت في مدن تانيه في الجنوب كلنت تستحق الزياره اكتر
ومن كازابلانكا اتحركت بعربيه خاصه لمدينه بيسموها سويسرا الشرق وهيا فعلا عامله زي اوربا في المعمار بتاعها وكلها متغطيه بالثلج على الجبال وممكن تروحوا تتزحلقوا عاي التلج هناك وناس بتأجر تلاجات للتزحلق وفيها كمان غابات رائعه
وفي الطريق بين فاس والدار البيضاء عديت على مدينتين بس كانوا صغيريتين ولا يستحقوا الزياره
بس في مدن في الجنوب كان الواحد يتمنى يزورها زي صحراء ورزازات اللي اتصور فيها أفلام عالميه وليها سحر خاص في غروب الشمس وبني ملال والصويره ومراكش بس الحقيقه الوقت مااسعفنيش .
بالنسبه بقى للحاجات اللي لازم تدوقها هناك ، الطجين المغربي طبعا ( اللحم بالقراصيا) والكسكس بالفراخ والخضار والشاي الاهضر بالنعناع والجبنه الطازه بتاعتهم اللي طعمها يجنن والحريره والبسطيله
بالنسبه تشتروا ايه ، لازم تشتروا شنطه من شنط الجلد الطبيعي والشاي الأخضر وطبعا المشغولات المغربيه والمكسرات عندهم رخصيه مقارنه بمصر المغرب العربي من الدول اللي أي حد بيحب السفر لازم يروحها مش بس عشان سعرها مناسب وكمان عشان ثقافتهم وعاداتهم قريبه مننا وخصوصا للبنات لو أول مره تسافر ، غير أنهم مضيافين بشكل غريب ومرحبين جدا بالمصريين ومحبين ليهم بزاف بزاف 😃

قبل ما تتفرج علي الصور بنرشحلك المكان ده
ازاي تعيش في 3 جزر في اندونيسيا باقل التكاليف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*