أحلي خروجة في وكالة الغوري

أحلي خروجة في وكالة الغوري

دى خروجة مصرية جميلة فيها روح رمضان هتبسطك ومش هتتكلف اكتر من ٢٠ ج تقريبا
نصيحة مصر فيها خروجات جميلة وممتعة وغير مكلفة كمان فحاول تخلى لخروجتك حاجة مختلفة وممتعة ومفيدة ☺
دا عرض التنورة بيتعمل كل سبت واتنين واربع من كل اسبوع . بتروح عند وكالة الغورى فى شارع الازهر مكانها اخر كوبرى الازهر خلف مطعم جاد الحسين وممكن توصل لهناك عن طريق المترو وتنزل العتبة ومن عند مترو العتبة تخد عربية الغورية لحد هناك . او من عند جامع الفتح فى رمسيس اركب عربية الغورية برضو وانزل اخر كوبرى الازهر عند الغورية . ولو جاى بعربيتك ممكن تيجى من عند صلاح سالم وتركن فى جراج الدراسة عند مستشفى الحسين الجامعى وتتمشى الخطوتين دول . هتقطع تكت ب ١٢ جنيه بس للمصريين وهتحضر حفل تنورة عاااالمى ومش مبالغة ان الحفل فعلا عالمى لانه بيقدم فن مصرى راقى ومميز جدا مبهر ومحترم ومناسب لكل الناس مصريين وغير مصريين . عشان تروح وانت مطمن يفضل تكون على بوابة الوكالة (المكان ال بيتعمل فيه الحفل) الساعة 7.30 بعد الفطار على طول بتقطع التكت وقت الدخول ب ١٢ ج والعرض بيبتدى الساعة 9 م تقريبا وبيستمر لمدة اكتر من ساعة ونص من الاداء المتواصل لفنانين تابعين لوزارة الثقافة يرتقو للعالمية . دا غير انك هتبقى قاعد فى مكان بيعيشك عبق التاريخ العتيق (وكالة الغورى) . ريحة الماضى حواليك فى كل مكان .
خروجة محترمة وراقية وممتعة مش هتكلفك اكتر من ١٥ ج بالكتير ومصاريف مواصلاتك بس . وياريت تروحو الساعة 7.30 لان القاعة لها عدد محدد من الناس وبعد ما بتكتمل مش بيدخلو حد . تقريبا ٣٠٠ فرد . واوعدك انك هتغير مودك تماااما وهتخرج مبسووط جدا وفرحان ☺
نصيحة لو عندك اطفال صغيرين اقل من 5 سنوات ياريت تسيبهم مع حد فى البيت لان فى الغالب العرض مش مناسب ليهم لان ال هيستوعبه هما الكبار وبس وفى نفس الوقت الاطفال ممكن يسببو ازعاج للناس المندمجين فى العرض وهيسببولك احراج . الاطفال مسموح بدخولهم عادى على فكرة بس كتير بنلاقى الاطفال مش منسجمين مع العرض ومش مبسوطين . واكيد انت عاوز تنبسط وتخلى ال حواليك كمان ينبسطو .. فلو عارف ان اولادك هاديين وهيلتزمو فى المكان ومش هيسببو ازعاج لحد خدهم معاك .
العرض عبارة عن ثلاث فقرات الفقرة الاولى استعراض للفرقة وامكانياتها .. الفقرة التانية عرض تنورة صوفية وفرقة المزمار بالاضافة للانشاد الصوفى فى مدح النبى محمد صلى الله عليه وسلم .. الفقرة التالة والاخيرة عرض الثلاث تنورات مع كل الفرق ودى اجمل فقرة فى الفقرات واروعها ?
العرض فن مصرى راقى ومحترم مناسب للمسلم والمسيحى ولكل الديانات يعنى مش مقتصر على ديانة محددة ويا سلام بقى لو معاك اجانب هينبهروووووووو جدا جدا جدا بالمكان والعرض لدرجة فوق ما تتخيل .
ملحوظة .. التصوير متاح داخل العرض سواء بكاميرا احترافية او عادية او تليفون ولكن يمنع تماما تصوير فيديو .
نصيحة فى رمضان حاول تروح بدرى جدا حتى لو هتضطر تفطر فى الحسين يومها عشان تروح بعد الفطار على طووول هتلاقى الباب مغلق اقف عالباب لحد ما يفتحو لان وقت فتح الباب بيكون الدنيا زحمة جدا وممكن التذاكر تخلص ومتلحقش تدخل ..
العرض دا شغال طوال العام مش فى رمضان بس وبيكون فى نفس الايام بس الساعة 7 م بدلا من 9 م فى ايام رمضان .
ممنوع انك تقطع تذاكر مسبقة ومافيش حجز لحفل قبل يومها ووقتها .. الا وقت فتح الباب لان التذاكر عليها كود وتاريخ وكل حفل بيكون ليه تذاكر غير ال قبله او ال بعده .

قبل ما تتفرج علي الصور بنرشحلك المكان ده
جولة في شارع المعز

أحلي خروجة في وكالة الغوري
أحلي خروجة في وكالة الغوري
أحلي خروجة في وكالة الغوري
أحلي خروجة في وكالة الغوري
وسم : /

Leave a Reply

Your email address will not be published. Required fields are marked *