ازاي تقضي يوم في الاسماعيلية

ازاي تقضي يوم في الاسماعيلية

ازاي ممكن تقضي يوم في الاسماعيلية
اسماعيلية مدينة هادية وصغيرة ويكفي زيارتها مرة واحدة فقط لان اماكن الزيارة محدوده وكلها متجمعة في طريق واحد وهو طريق البلاجات وامتداده طريق نمرة ٦ يلا نبتدي يومنا ?

اماكن الزيارة :
ابتدي جولتك من معدية نمرة ٦ لانك لو اتأخرت لحد الساعه ٢ او ٣ مش هتلحقها بس ده لو ليك نصيب تركبها اصلا لانهم مشددين جدا جداا وتفتيش علي اللي هيركبوا المعديه وهيقابلك ضباط في الممرات وهيسالوك انت عايز تركب المعدية ليه
فلازم تخرج الحتة الوطنية اللي جواك وتقوله عمري ما ركبتها ونفسي اشوف العبارات وهي بتعدي من قناتنا وكمان حابب اشوف النصب التذكاري
هيتحقق من بطاقتك وهويتك وهيبص في عنيك ? ويا تاخد التأشيرة يا تترفض
انا الحمد لله اخدت التأشيرة ? وركبت المعدية
كان فيه مكان مفتوح هناك للزيارة من سنين اسمه ” تبة الشجرة ” انا زرته من سنين لكن للاسف مغلق حاليا
… وانت راكب المعدية هتشوف استراحه الريس

لما تخلص المعدية وانت خارج هيقابلك جنينة كبيرة وجميلة جداا هتاخد فيها احلي صور
هتدي نمرة ٦ والجنينه ضهرك لانها اخر نقطه وهنكمل مشي لحد ما توصل وتبقي ادام فندق ” تيوليب الفرسان ” وده بقي هتقعد ادامه ساعة تأمل كده وحواليك شباب بعربيات قهوة وهتشرب من ايديهم احلى كوباية قهوة مستوية على الرمل
خلي بالك القعدة دي لازم تقعدها مرة بالنهار ومرة بالليل لان الفندق بيشغل اضاءات بالوان مختلفه علي الفندق رووعة بالليل .. فاحلي وقتين للقعدة دى وقت الغروب ووقت الليل
ادام الفندق فيه جنينة تانية كبيييرة جداا وجميلة وفيها حمامات كبيرة ونظييفه جداا
هنكمل مشي. هتلاقي ناس كتير واقفة تصطاد طول الطريق وبتطلع سمك بلطي وقارووص
هنكمل هتلاقي فندق ميركيور وده من احلى الاماكن اللي ممكن تقضي فيه داي يوز وعلي شاطئ بحيرة التمساح .. الفرد 275 بعصير وساندوتش
وكمان تيوليب الفرسان الداي يوز جميل وممتع
الفرد ب 300 علي بول الفندق بعصير وساندوتش
والفندقين ممنوع دخول المأكولات لكن فيه كافيتريات جوا بيتزا وساندوتشات وفطائر

بردو هنكمل مشي لحد ما تلاقي الجانب التاني منزل ديليسيبس وبيوت الفرنسيين اللي ساكنهم موظفي الهيئة زى بورفؤاد .. هتتفرج عليهم وترجع تاني للجانب اللي كنا ماشيين عليه .. عشان هيقابلك كل المطاعم اللي ممكن تسمع عنها للاسماك زي اشهرهم مطعم الفنار وكابوريا وفارس لكن الصلاة علي النبي في اخر البلاجات لسه هنجيله
كده احنا خلصنا طريق نمرة ٦ وداخلين على طريق البلاجات اللي اوله كوبرى البلاجات وده هتقضي فيه معظم الوقت لانك هتتفرج علي بياعين السمك وبياعين كل انواع القواقع البحرية .. هتلاقي عربية الحمص الشامي ” الحلبسة ” ..
هتلاقي الكوبري مليان بالشباب اللي بيصطادوا بالصنارة وتحت الكوبري احلي مشاهد لقوارب الصيد
مفيش حاجه بعد الكوبري غير قرية النورس وشاطئ الاسرة لو حابب تدخل البلاج
وقدام شويه هتلاقي مطعم ” الصلاة علي النبي “
لما توصله ارجع بقي المشوار ده كله تاني عشان اللي شفته بالنهار تروح تشوفه بقي بالليل ?
نصيحتى بالنسبة للاكل لو حد جاي يزور الاسماعلية بالعربيه يجيب لحمته وشوايته وعندك الجنانين واديها واحد باربيكيو هتلاقيها امتع من اكلة السمك
ولو مصمم علي اكلة السمك اشتريها من سوق السمك وسويها وكلها في الجناين بلاش الشواطئ
لان الشواطئ مش حلوة والمية سودااا غير خالص شواطئ اسكندرية ?✋
نيجي بقي علي اسوء حاجه في الاسماعيليه
التاكسيات ??
اخر استغلال واقرب مشوار بيطلب فيه 25 جنيه
ولو عطيته 20 بيحسسك ان الموضوع جاي معاه بخسارة غير ان اسلوبهم مش حلو
فالافضل تتفق معاه قبل ما تركب هياخد كام
طبعا غير بورسعيد خااالص لان رحلتى كانت بورسعيد و اسماعيلية

قبل ما تتفرج علي الصور بنرشحلك المكان ده
الدليل الشامل للسويس

ازاي تقضي يوم في الاسماعيلية
ازاي تقضي يوم في الاسماعيلية
ازاي تقضي يوم في الاسماعيلية
ازاي تقضي يوم في الاسماعيلية
ازاي تقضي يوم في الاسماعيلية
ازاي تقضي يوم في الاسماعيلية
وسم : /

Leave a Reply

Your email address will not be published. Required fields are marked *