قصر محمد علي في المنيل
اركبوا اي حاجة بتودي القصر العيني أو المنيل أو السيدة زينب ، باصات زي 333 او 2002 و باصات تانية كتير ملهاش رقم معين .
القصر منقسم لمباني و جناين في قمة الجمال🌟
اول ما تدخلوا عاليمين هتلاقوا برج الساعة و المسجد و متحف الصيد.
المسجد عبارة عن تحفة معمارية فريدة ، هتغذوا بصركم بجمال و ابداع مش طبيعي.
بعده على طول متحف الصيد هتلاقي كمية حيوانات و الزواحف وطيور اصطادها الملك ، هتنبهروا بكائنات اول مرة تشوفوها اصلا ، وهتنبهروا اكتر ان كل الحيوانات دي محتفظة بشكلها وكل تفاصيلها إلى الآن.
هتمشوا شوية جمب الجناين الي مليانة زرع وفيها زرع نادر ، هتدخلوا سراي الاقامة .
سراي الاقامة مبنى من طابقين بس الطابق العلوي مقفول ممنوع حد يطلعه، بيتكون من بهو النافورة و حجرة الحريم و صالون الصدف و حجرة الطعام و حجرة المجوهرات و بهو المرايا و الحمامات الخاصة و غرف تانية كتير ..
هتتصوروا صور حلوة جدا فالمكان دا و عند السلم الخشبي من الاخر هتخرجوا بصور خطيرة
بعدين هتمشوا تاني جنب الجناين ، في جناين حقيقي شكلها فخم جدا بس قافلينها للاسف
هتوصلوا لسراي العرش ودا مبنى فيه عرش محمد علي و الامراء وصورهم ، المكان كله عبارة عن فن وإبداع وفخامة ملهاش مثيل 🌟❤️
الناس هناك لطيفين جدا هتتبسطوا بالمكان