قصر الأمير محمد على بالمنيل
طريقه الوصول: من محطه مترو السيده زينب تركب عربيه من قدام المحطة او تتمشاها او اي مواصله من رمسيس او عبد المنعم رياض رايحه القصر العيني
الناس للوهلة الأولى لما بتسمع اسم “محمد علي” بتفتكر انه محمد علي الكبير، بس هو مش كده ده محمد علي ابن الخديوي توفيق.
بدون مبالغة ….واحد من أجمل الأماكن السياحية اللى موجوده فى القاهرة واللى للأسف ناس كتير مسمعتش عنه حاجه قبل كده ?
القصر كان ملكا للأمير محمد على توفيق الإبن الثانى للخديوى توفيق اللى كان ولى عهد مصر وقتها .
القصر تحفة معمارية بكل ما تحمله الكلمة والسبب إنه بيضم طراز فنون إسلامية متنوعة ما بين فاطمى وعثمانى ومملوكى وأندلسى وفارسى ….غير إن القصر فيه 47 سقف كل واحد بشكل وتصميم مختلف ….يعنى مفيش سقف فى القصر شبه التانى
لما تزور القصر هتلاقيه متقسم لمناطق رئيسية وهى :
1.سراى الإستقبال : كانت مخصصة لإستقبال الضيوف الرسميين من كبار الدولة والسفراء وهى مكونة من دورين علوى وسفلى وفيها طبعا كمية تحف وسجاد ونجف ومشغولات ذهبية وفضية بالهبل
2.المسجد : من أجمل مبانى القصر ….المنبر والمحراب معمولين من الذهب ….السقف معمول من قباب صغيرة من الزجاج عشان ضوء الشمس ينور المسجد بالكامل عن طريق القباب الزجاجية ?
- برج الساعة : معمول على شكل الأبراج المغربية وفيه برج شبه البرج ده أوى فى مراكش بالمغرب …كان بيستخدم للمراقبة…. وفيه ساعة كبيرة محفورة على البرج لمعرفة الوقت ….قمة فى الروعة بجد ?
- سراى الإقامة : ودى كانت مقر الإقامة للأمير محمد على …بتتكون من طابقين يصل بينهم سلم خشبى وبتتقسم ل : بهو النافورة و حجرة الحريم وحجرة المدفأة وحجرة المرايات و حجرة الطعام اللى فيها أوانى فضية وذهبية خرافة وفيه أناء الفاكهة من الفضة الخالصة ويزن حوالى 52 كيلو?
- الحديقة : حديقة للقصر مساحتها كبيرة جدا وبتضم أنواع من النباتات المختلفة جمعها الأمير بنفسه من مختلف دول العالم ??
- سراى العرش : تتكون من طابقين سفلى وعلوى …الطابق السفلى ده يسمى طابق العرش وفيه صور حكام مصر من أسرة محمد على وكان مخصص لإستقبال الضيوف فى المناسبات والأعياد الرسمية ….الطابق العلوى بقى كان مخصص للجلسات الشتوية وفيه حجرة نادرة اسمها حجرة الأوبيسون لأن جميع جدرانها مغطاه بنسيج الأوبيسون الفرنسى.
- متحف الصيد : معروض فيه أكثر من 1180 قطعة من الحيوانات والطيور والفراشات المحنطة من مقتنيات الصيد الخاصة بالملك فاروق والأمير محمد على ?
تذكرة دخول المتحف ب 20 جنيه ولو عايز تصور هتدفع كمان 20 جنيه تذكرة تصوير …بجد القصر تحفة معمارية ويستحق الزيارة جدا وهتبسط أوى فى المكان عشان منظم والناس هناك محافظه عليه أوى وهتلاقى واحد فى كل حتة من القصر متطوع كده لوحده بيشرحلك تاريخ المكان وايه التحف اللى موجوده فى القسم ده
تعرف ايضا على
أسرار قصر البارون إمبان
