بالصور دليلك للسفر إلى نوبيع

بالصور دليلك للسفر إلى نوبيع

رحلتنا النهارده عن مدينه مش واخده حقها في السياحه بالرغم من انها مدينه جميله جدا و ليها طابع خاص لا يقل عن مدينه دهب و اتوقع خلال ال ٣ سنوات الجايين المدينه ديه هتكون ليها مستقبل كبير في السياحه.
هنتكلم النهارده عن الكنز المدفون نويبع.
من المدن الي ممكن تستجم فيها لو بتدور علي الهدوء تام و شاطئ رملي.
 اولا المواصلات
لو انت هتتحرك من القاهره:
*ممكن تركب من موقف اتوبيسات الدلتا او جو بص و بيكون سعر التذكره حوالي ١٠٠ جنيه بتركب الباص الي متجه الي طابا و بتكون حوالي ٨ ساعات.
* ممكن تركب من موقف المرج عربات High S الي هي مكروباصات تويوتا سياحه و ديه بتكون واسعه جدا و مريحه و سعر الفرد حوالي ٧٠ جنيه و بتاخد من ٦ الي ٧ ساعات.
-ثانيا الاقامه:
نويبع معروفه بالكامبات البدائيه الي بتكون عباره عن غرف من الخوص او الخيم و في اماكن فيها شاليهات عشان الناس الي مش بتحب انواع الاقامه البدائيه.
في كامبات كتيره جدا هناك بس واحد من اشهر الكامبات المصنفه (عالميا) هو كامب بساطه Basata
عارفين ليه مصنف عالميا؟؟
عشان يعتبر كامب صديق لبيئه يعني ضد التلوث و موفر لطاقه و موفر لماء.
كامب بساطه هو مكان هادئ جدا و يناسب الشباب الي بيحب يجرب تجربه جديده بعيده عن جو الفنادق و تعلمك الاعتماد علي نفسك في كل حاجه زائد ان المكان امان جدا جدا.
المكان مقسوم الي:
-المين هت (اللوبي)
و ده المكان الرئيسي لكامب و ده ممنوع تمشي بجزمتك او شبشبك جوه المكان فبتسيبها بره المكان.
هتلاقي جوه المطبخ الي فيه البوتاجاز و التلاجه و الحوض و الاطباق و هتلاقي خباز بيعمل كل شويه بعمل مخبوزات طازه و اجمل حاجه العيش و البتزا.
هتلاقي مكان فيه اكياس المكرونه و الصلصه و الرز و التونه و النودلز و الخل و الزيت و فول.
هتلاقي تلاجه كبيره فيها مشروبات و فاكهه و خضار و بيض.
هتلاقي مكان لعمل المشروبات الساخنه.
هتلاقي مكان لشيشه.
انتم عارفين من كتر ما المكان واثق فيك بيسيبك تاخد اي حاجه و تتعامل كانك في بيتك و انت بتروح تكتب في ورقه الي انت اخدته او استعملته و كل حاجه ليها سعرها و تحاسبك و انت ماشي بناءا علي الورقه الي انت كتبت فيها.
-ملحوظه
*انت ممكن تيجيب اكل معاك و تسويه بنفسك
*متنساش اي حاجه هتستخدمها من حلل و اطباق و طاسات و معالق انك تغسلها بنفسك بعد الاستعمال.
*كل حاجه هترميها ليها الباسكت بتاعها يعني الزجاجات ليها مكان خاص و البلاستك ليه مكان و الطعام المرمي ليه مكان عشان ياكلوها لحيوانات.
هتلاقي برده مكان وحيد لشحن الموبايلات و الباور بانك و هتلاقي مشترك كبير عشان يشحن كذا حاجه يعني ممكن تشحن ١٥ جهاز في نفس الوقت و ممكن تسيب موبيلك في المكان ده و مكشوف من غير ما تخبيه تسيبه علي الطرابيزه لتاني يوم يتشحن و محدش هيسرقه منك او ييجي جنبه عشان امان بس خد بالك ان الكهرباء بتفصل ٤ ساعات في اليوم مقسمه فترتين صباحيه و مسائيه و ده توفيرا لكهرباء.
هتخرج بعد كده هتلاقي اماكن لجلوس بالطرابيزه و الشلت الي ممكن تاكل عليها.
-اماكن الاقامه
مقسومه الي ٣ انواع و هي :
*خيام و ديه بالرغم انها رخيصه بس لا انصح بيها عشان هتكون حر اوي بس بتطل علي البحر.
*عشش و ديه مصنوعه من الخوص و فيها مخدات و حصيره و جوانب التهويه حلوه جدا و تنفع الشباب جدا بس ناخد بالنا مفيهاش كهرباء و لا نور و لا مروحه و ميزيتها انها بتطل علي البحر.
ملحوظه
-مكن تخليهم يوصلولك فيشه كهرباء و مروحه و نور
-الخوص و الخيام امان لبنات جدا و مش مكشوفه.
*شاليهات و ديه بتكون اغلي عشان فيها مروحه و سرير و حمام و بتكون صف تالت علي البحر.
**طبعا في حمامات كبيره و نظيفه جدا علي يمين و شمال و كل واحد فيهم مقسوم الي رجالي و حريمي و كل ساعه تقريبا بيدخل حد يمسح و ينضف الحمامات و يزودها ببكره مناديل فعشان كده مش محتاج تاخد مناديل معاك الحمام.
 الشاطئ
اجمل حاجه في المكان هو الشاطئ بتاعه رملي مش صخري و المياه نقيه جدا جدا و امان لاطفال.
*ملحوظه
-المكان بيسمح ليك بدخول الكلاب و القطط لو معاك.
-لو انت عايز ترجع القاهره مواصلات ممكن تنزل وسط المدينه عند الموقف و تتفق مع سواق الباص و هو نازل من طابا الي نويبع يكلمك و ياخدك من امام الكامب و اديله ١٠ جنيه عشان يفتكر😃😃
طبعا الصور هتخليك تعيش الحياه الي شرحتهالك.
** و ديه قائمه بالاسعار و رقم التلفون لحجز
نظام الإقامة
التخييم: ٧٠ جم/ الليلة/ الفرد
عشة فردية: ١٥٠ جم/ الليلة/ الفرد
عشة 2 فرد او اكثر: ١١٠ جم/ الليلة/ الفرد
الشاليه: ٥٤٠ جم/ الليلة/ حتى 3 افراد
١٣٠ جم/ الليلة/ شخص زيادة
نظام الأكل:
اخدم نفسك بنفسك. الثلاجات فيها مياه ومشروبات واكل علشان تطبخوا. المطبخ مفتوح 24/7
و الحد الأدنى 70جم/اليوم/الفرد.
فيه عشاء اختياري الساعة سابعة
نباتي: 110جم أو سمك:170جم حسب اليوم

قبل ما تتفرج علي الصور بنرشحلك المكان ده
ازاي تسافر نويبع وراس شيطان بأقل تكلفة في مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*