الناس اللى بيحبوا الروقان والانفصال “التام” عن ضوضاء المدينة وصخب الحياة واللى طلبوا بوست عن راس شيطان
البوست ده فيه كل التفاصيل فى الـdetails ?
مبدأياً راس شيطان مكانها شمال شرق خليج العقبة جنب طابا ب٢٠ كيلو ومن معالمها الشهيرة فيورد باى fiord bay
سيادتك هاتسيب همومك عند نفق احمد حمدى وتدخل لعالم تانى بتاعك انت بس
طريق وصحرا وبحر وسما بتوعك لوحدك.. عالمك الخاص بالمعنى الحرفى..
ويكون معاك عربية ثقة ومظبوطة وفيها ساوند سيستم محترم??
وميزة العربية عن السوبر چيت ان فيه اماكن هاتبقى اول مرة تشوفها فهاتحب تركن على جنب وتنزل تصور
وراس شيطان اجمل حتة تتراح عالسريع لو انتوا عرسان جداد قبل الرحلة الاساسية عشان تفضوا دماغكوا من زحمة الافكار والناس والارهاق بتاع تجهيز الشقة والفرح ..وبجملة المصاريف، روح اجر عربية peugeot 307 cc تفتح سقفها واتمتعوا بمنظر الجبل على يمينكوا والبحر على شمالكوا والهوا النضيف وهو بيخبط فى وشكوا….
هاتروحها ازاى؟
هاتطلع من نفق احمد حمدى وتمشى فى وشك ٣٠٠ كيلو فى طريق طابا لغاية ماتشوف بحر ..بس كدة ..انت كدة وصلت ..او شغل الGPS احسن
المسافة ٩٠٠ كيلو رايح جاى يعنى اقل من٩٠ لتر بنزين ب٤٥٠ جندى ..ولو اربع افراد، كل واحد هايدفع توتال١٢٠جنيه
– هاتقعدوا فين؟؟
فيه حاجات كتير بس احنا روحنا ميشو كامب اللى دلوقتى بقى اسمه المجرّة كامب
ميزته ان وراه جبل بيضلل عليه بعد العصر فاللى جلدهم حساس وبيتعذبوا فى المصايف هايتجنبوا الحكاية دى
وفاضى مش زحمة وشطه نضيف وموفرلك كل حاجة ببلاش للسنوركيلينج او غيره بس عن نفسى باحب التجديف قكنت راشق ٢٤ ساعة على قارب التجديف بس ? الحمام منفصل عن الكوخ
عشان تشحن لازم تسيب موبايلاتك فى المطبخ فخد معاك باور بانك احسن
الشط فى راس شيطان مليان شعاب مرجانية بس هما عاملين منطقة للعوم
الليلة ب٢٠٠ شاملة وجبتين حلوين كدة من ايادى روسية وازازة ميا ومشروب
رأيى الخاص انه اجمل مكان شفته فى حياتى مع العلم ناقصلى سيوة ومحافظة البحر الاحمر وابقى لفيت كل شبر فى مصر بس المكان ده علّم فى الذاكرة