ازاي تقضي اسبوع في مرسى مطروح

ازاي تقضي اسبوع في مرسى مطروح
– مطروح مينفعش تروح و ترجع في نفس اليوم , مطروح لازم تخدها 7 أيام علي الاقل .
– الطريق من القاهره إلى مطروح بيخد حوالي 6 ساعات .
– وانتا مسافر خلي في جيبك جنيهات فكه علشان دخول الحمام في الاستراحه ب 2 جنيه .
– نام , نمت ؟ نام تاني , علشان الطريق غلس فقضيه في النوم علشان متحسش بيه .
– مطروح درجه الحراره فيها اقل من القاهرة فبلاش تروح الا في عز الصيف لو روحت في 5 مش هتعرف تنزل البحر من السقعه .

– الشقق في مطروح اسعارها مرتفعه سيكا و خاصه في شهر 7 و 8 , متوسط اسعار الشقق علي البحر من 600 الي 900 وممكن توصل ل 1200ج حسب الفيو ونظافة الشقة في اليوم , صف تاني 400 متوسط , بعد كده من 200 الي 400 جنيه في الليله .
– افضل منطقة للسكن المصيفي في مطروح منطقة باب البحر الفيروز العوام”منطقة علم الروم”منطقة حي الدولار_منطقةشارع اسكندرية والليدو والبوسيت ولمحبي الهدوء والروقان يبقي قرية بلوبيتش

– اشهر شواطئ مطروح الليدو و روميل و البوسيت و مطروح العام و النخيل و الابيض و عجيبه .
– الشواطئ الكويسه للاطفال الفيروز باب البحر روميل و النخيل المياه مفيش فيها امواج و واطيه .ومناسبة جدا للأطفال
– شاطئ الابيض ( بلو بيتش ) من افضل الشواطئ في مطروح بس مشكلته بعده عن البلد . بس مش كتير
– لازم تروح عجيبه لازم عجيبه ما هو انتا هتروح عجيبه يعني هتروح عجيبه :وتتصور في عجيبة
– الاماكن الي ممكن تخطف رجلك ليها الابيض و عجيبه وام الرخم و الغرام و كليوبترا .
– في سيرك في مطروح زمبقولك كده , بتاع جمال الحلو , هتلاقيه جنب جيلاتي عزه عند فندق المشير احمد بدوي اخر الكورنيش , التذكره تبداء من 50جنيه , حلو للاطفال مش قد كده للكبار ولو روحته مره متروحش تاني مش هيبقي ليه طعم ولا لون ولا رائحه .
– عاوز تأكل ايس كريم ؟ هتلاقي نستله عاملة عربيات في كل أنحاء مطروح متجبش منهم , ايس كريم زي الي في السوبر ماركت بس انا بحبه
– جيلاتي عزه الي عند الكورنيش حلو في واحد تاني عند شارع الاسكندريه مش حلو الاسعار 10 و15 و20 , جرب المانجو حلو و بلاش الشوكولاته طعمه مدي علي كاكاو و هتلاقي عندهم فانيليا و ليمون و شوكولاته و مانجو و فراوله , في عندهم رز باللبن و ام علي بس لو معاك عدد كبر دماغك هتلبس جامد علي ايه .
وفي ابو الدهب في شارع الإسكندرية وفرع تاني جمب سينما السلام عنده ايس كريم وارزبلبن جامد وكمان عنده ايس كريم جريل اه والله
– معاك اطفال ؟ مطروح هتبقي حلوه اوي ليهم لان طول ما انتا ماشي علي الكورنيش هتلاقي ملاهي , الملاهي حلوه , دخلهم الملاهي هينبسطوا و هتنبسط معاهم .
– اكبر ملاهي هتلاقيها جنب جيلاتي عزه في اخر الكورنيش فيها العاب كتير و كبيره ممكن تلعب معاهم انتا كمان يا شقي وفي ملاهي تانية خلف مسجد العوام
وكمان ملاهي تالتة عند كوبري روميل
– في بقي القرية البدوية ودي الدخول ببلاش ممكن تأكل أحلى أكل بدوي وتشرب الشاي الزردة وفيها كهف الملح حاجة كده تحفه لمدة 45 دقيقة مكان القرية بعد سوق ليبيا يمين طريق السلوم الكيلو 8
واوعي تنسي تسألني عن رحلات اليخت
والسفاري من #تماره
ايوه في سفاري في مطروح مستغرب ليه
– في سينما في مطروح , لا حقيقي , هو كان في 3 بس صفصفوا علي واحده , سينما السلام الصيفي ,
– مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرمين محمصه باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر ( انه حقا لب جااااامد)
– اعمل حسابك في ميزانيه مخصصه للكراسي و الشماسي يا زعيم ,
– المم مطروح بلد المم و الاكل كله عاوز اسماك هتلاقي عاوز مشاوي هتلاقي عاوز تكاكي هتلاقي عاوز بيتزا هتلاقي

عاوز تأكل سمك عليك و علي ( اسماك مجدي – واسماك خالد و- اسماك طعيمة – واسماك ابو شعفة – وباسط العوامي واسماك الواردة البيضاء)
مكانهم في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك في 3-4 ساعات هتقعد تستني السمك يتعمل بس هتأكل سمك تحلف بيه طول حياتك و بلاش تجيب من عندهم شوربة سي فود غاليه و طعمها وحش و كلها اخطبوط متقطع .وفي اسماك ابوشعفة برده جامدة
وعندك برضه اسماك ابو العربي و حمو التمساح قدام بعض سمكهم حلو بس يتأكل في المطعم
عاوز تأكل مشاوي عندك كمنه و عبده كفته و مشويات سحر.. عندهم فراخ مخلية مشوية علي الفحم.. اوعي وشك.., لا دول مش ولاد خالتي دول بتوع مشويات , مشوياتهم حلوه و خاصه عبده كفته و لو حبيت تأكل هناك كمان احلي و القعده في الشارع مع الجو الحلو ليه مذاق تاني .
بلاش تأكل من الدمياطي حوادق كل من الدمياطي حلويات بس ,
متريش ؟ شكلك متريش , عليك و علي مطعم لواحه العرب اكل بدوي بقي من الاخر , حلاوتك يا مندي و انتا معدي , وقعده عرب علي الارض كده و انزلي بالصواني و الطواجن بس تقل جيبك علشان واحه العرب بيزعل جامد
وكمان عندك مطعم الأحرار أكل بدوي حكاية والقاعدة في المربوعة
جوووو جامد عند محلات السيوية

عاوز حلو ؟ في حلو يا حبيبي , عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير وحلويات وفطائر ابو حلاوة اسعار الاكل في مطروح غاليه
– مطروح الصبح حاجه و بليل حاجه تانيه خالص ❤ , جمال مطروح و هواء مطروح و عليل مطروح , روح الكورنيش , الكورنيش حلو اضرب ترمس , كل دره , اقعد علي السور الي عند البحر علشان الكرسي علي البحر ب 10 جنيه بليل ( ياعم مش هنقعد )
اركب بيتش باجي تجربة حلوة و ممتعه النصف ساعه ب 50 جنيه معلش مش هتركبه كل يوم , سهل مش قصه , ايدك اليمين بنزين ايدك الشمال فرامل زييييييييط يا معلم
العجل حلو برضه ابقي ركب الاولاد عجل و اقعد اتفرج عليهم متبقاش بخيل متركبش لوحدك

الكافيهات حلوه في مطروح و كتير و القعده حلوه في الهواء الطلق و هتلاقي الكافيه الي علي قد الايد و الكافيه الي ممكن يخد ايدك رهن علي ما تجيب الباقي و ترجع كله بالحب .
– بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه و علي وضعها .
– متنساش تجيب زيتون , الزيتون جميل بتاعهم و الكيلو ب 25 جنيه تقريباً هاتلك شويه روحهم معاك يمكن يغلي زي الدولار من عند سوق ليبيا كده .
– متنساش تبقي تتمشي في شارع الاسكندريه و تشتري شوية لبس و حاجات ملهاش لزمه بس اهو اسمها اشتريت حاجه من المصيف 🙂 اه والاسعار اغلي مش ارخص ولا حاجه .
– مطروح مش بتنام 24 ساعه هتلاقي كله في الشارع و كله فاتح مادما انتا في الصيف انسي .
– فاكهتين مينفعش تبقي في مطروح و متعديش عليهم التين البرشومي و التين الشوكي عسل مخلوط بسكر حاجه كده الواحده بواحدتها و طعمها من الاخر , وبيقولوا البطيخ حلو بس مجربتوش .
– مطروح اوضه و صاله يوم فالتاني هتكون عارف شوارع مطروح شارع شارع .
– التاكسيات في مطروح بيتسغلوا الصيف فحاول قبل ما تركب تقوله هتخد كام و ريح دماغك . وحاول تخلية يشغل العدد وفي رقم للشكاوي بس مش فاكرة – مترميش حاجه في الشارع , المحافظه هناك نظيفة فبلاش تبوظ الي هما بيعملوه في باسكت ارمي فيه الزباله .
– ابقي اعمل ميزانيه علشان ( غزل البنات ) و ( البلالين ) ده لو عندك عيال لو مش عندك بوس ايدك شعر و دقن .
– لو ديه اول مره ليك في مطروح اعرف انك مش هتعرف تروح مصيف تاني علشان مطروح فعلا جنة الله في الأرض

– ثانياً الشواطئ
انا مش هفرض عليك فالبرنامج شواطئ معينه عشان ميتاخدش علينا أننا بنعمل دعاية لحد علي حساب حد هنسبلك المجال مفتوح و اختار
– نبدأ بشواطئ الأبيض و هما ( المروه . الزمردة . الأصيل . البلوبيتش . القوات المسلحة )
و من الأبيض هنروح لشواطئ الكورنيش ( العام . الليدو . العوام . الهنا )
و بعدين هنروح علي شواطئ ( الغرام . كليوباترا )
و بعدين نطلع علي عجيبة و ( عجيبة . ام الرخم )
و بعدين ننزل علي ( روميل . الفيروز . البسنت )
هقولك انا بقي لو هختار مثلاً هعمل اية ..
اول يوم هخلية خفيف عشان السفر و التعب هنزل علي شاطئ علي الكورنيش مثلاً هختار
الليدو
و تاني يوم هروح عجيبه اتصور فيها ساعه او اتنين بعدين انزل علي شاطئ ام الرخم هو مش بعيد تقريبا مسافة ٢ كيلو
تالت يوم بقي هروح حمام كليوباترا اتصور بقي و امتع نظرى في البحر الكبير شوية و بعدين اكمل علي الغرام مش بعيد عن بعض تقريبا مسافة كيلومتر
رابع يوم بقي هروح شاطئ الزمردة او المروه انا بحب الاتنين زى بعض
خامس يوم بقي هروح روميل ادخل الأول الكهف و اسمع شوية عن التاريخ و بعدين انزل البحر
سادس يوم بقي هروح شاطئ الأبيض للقوات المسلحه
لو في سابع يوم هروح شاطئ الهنا علي الكورنيش بردو
– اهم حاجة لو لقيت اي شاطئ من شواطئ الأبيض الموج فيه عالي متنزلش متنزلش متنزلش و لو حسيت و انت في البحر ان في سحب من غير موج خلي بالك بردو هتلاقي نفسك مكانك بيتغير مش لازم بقي تعمل فيها بطل عالم في السباحه و تدخل جوه البحر ملوش كبير عوم لحد طولك و عمر ما هيحصلك حاجة طول ما رجلك لامسه الأرض حتى لو حصل حاجة هتعرف تتحرك دى نصائح مش بخوفكم من الشاطئ لأن الي مرحش شاطئ الأبيض معناها انه مدخلش بحر بس من غير ما تعمل فيها بطل عالم
كدة تقريباً غطينا كل الشواطئ لو نسيت حاجة قولولي

– ثالثاً المطاعم اغلبيتهم في شارع اسكندريه و نبدا ب ( كمنه . سحر . عبده كفته . كوكو العربي . واحه العرب )
– الأسماك ( حمو التمساح . مجدى . ابو شعفه . عفيفي . خالد و اخواته . العوامي )
– بالنسبة للمطاعم العالمية للوجبات السريعة اغلبيتهم علي الكورنيش العام ( ماكدونالدز . مؤمن . كوك دور . كنتاكي بيتزا هت )
– نروح بقي علي الخروجات بليل و كل الناس مستنيه النقطه دى
– عموماً ان شخصياً بعشق القاعدة علي البحر بليل و اكتر حاجة بتخرج الطاقة السلبية منى
في كافيهات علي البحر ممكن تقعد و تشوف شكل البحر و تستمتع بالموج و ممكن تاخد أطفالك و تروح الملاهي او ممكن تروح السينما و في واحدة جنب عزة و التانيه السينما الصيفي امام عمر افندي شارع الجلاء ⁦☺️⁩ او ممكن تركبهم عجل او بيتش باجي في ميدان الليدو او في روميل بليل و كمان في كافيهات ف روميل بليل بيعملوا سهرات يوميه ..
ممكن بقي تخرج من كل الدوشة دي و تروح القرية البدوية مكان هادئ و جميل جداً و مفتكرش انك هتندم انك روحت بالعكس هتندم انك مروحتش في مطاعم هناك علي الطريقه البدوية مبكبكه او جارية علي كلامنا و الرز الاحمر بالضاني و الشوربة المغربي و هتشرب كمان احلي فنجان شاى زردة و كل ده غير القاعدة البدوية و الراحه النفسيه و في كمان ملاهي لو معاك أطفال يلعبوا ..
بس كدة لا لسه في كمان في كهف الملح الي يعتبر التاني علي مستوي الجمهورية لاستخراج الطاقة السلبية و كمان التصميم هناك جميل جداً هيجبرك انك تتصور في كل متر فيه
اكيد كلنا عارفين سوق ليبيا و شارع اسكندريه و جمالهم بالليل و اي حاجه تحتاجها هتلاقيها فيهم و ممكن بردو فالصبح تركب يخت يلف بيك ساعه او اتنين مش فاكر الصراحه ب 80 جنيه للفرد

أحلى مناطق في مرسى مطروح
صخرة ليلى مراد شاطئ الغرام بمرسى مطروح
مالديف مصر مرسي مطروح

ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح
ازاي تقضي اسبوع في مرسى مطروح

Leave a Reply

Your email address will not be published. Required fields are marked *