حديقة الحيوان بالجيزة
الخروجة اللى على أد الأيد أوى واللى كل ما نروح وأحنا معانا أطفال لازم نستمتع بيها
كان لازم نعمل زيارة للحديقة بعد إعادة فتحها للجمهور من تانى بعد ما اتقفلت فترة بسبب الكورونا الحقيقه انى بقالى سنين كتير مروحتهاش فبالنسبة لى مش هعرف في فرق حصل من قبل الكورونا ولا لا روحتها عن طريق الاتوبيس النهري من التحرير للجيزة التكت ب٤ جنيه ومحطه الجيزة قريبه جدا من الحديقه وكده تبقى خروجتين في خروجه
التكت ب٥ جنيه ومواعيد من ٩ ل٤
اوقات الدراسة بيكون الثلاثاء اجازة وبيستقبلوا فيه الرحلات فقط
طبعا الدخول لازم ارتداء الكمامه بس كله جوة من غيرها عادى
اول ما تدخل وتشوف حنفيات المياه كل اللى بيجي في بالك صوت سناء يونس وهيا بتنادى يا نسسسسسمه انتى فين يا نسمه
اغلب الاقفاص كانت فاضيه ومكنش في لوحات شرح كتير بس كان في حاجات حلوة صورت منها شوية
في ملاهي للاطفال جوة والتكت حسب اللعبه في ب١٥ لغايه ٢٥ جنيه
دخلت بيت الزواحف فيه حاجات مختلفه كان ظريف انبسطت بس للاسف مفيش لوحات ارشاديه اوى وأغلب الغرف فاضيه أو مكررة التكت كانت ب٥ جنيه ولو عايز تتصور مع الثعبان الكبير الصورة ب٣٥ المكان طبعا كبير ماشاء الله ومتوفر ترابيزات وكراسي في اكتر من مكان للاستراحه والأكل
في كمان جوة حديقه مغلقه التكت ب٢٠ جنيه للتعامل المباشر مع الحيوانات واطعامهم بس طبعا في اهتمام بالمكان جوة عن الحديقه من بره سواء التنظيم أو الاهتمام بالحيوانات أو حتى الشكل الخارجي
طبعا كان في بين الأسد والضباع وحاجات كتير ملحقتش اشوفها لانى كنت رايحه متأخر بس ان شاء الله اكلمهم في زيارة تانيه
علشان تلف الحديقه كلها الافضل تروح من بدري علشان ماشاء الله مساحتها كبيرة
المكان يستحق التجربه وتقضيه اليوم فيه وطبعا سعره مناسب جدا واتمنى الفترة الجايه يبقى في تجديد وتنظيم للمكان لانه بجد حلو جدا بس محتاج اهتمام
قبل ما تتفرج علي الصور بنرشحلك المكان ده
حديقة الميريلاند بارك
