خروجة مدغشقر بارك

Madagascar Park
حاجة كدة خروجة جديدة للأسرة كلها
خلي اولادك يشوفوا الحيوانات و يأكلوهو بإيديهم و يتصوروا معاهم كمان .. يوم ميتنسيش و الكبار كمان بيستمتعوا جدا
اول ما تدخل هتلاقي بيت الفلاح، تقعد تريح فيه، و تلبس الملابس الفلاحي و تتصور بيها
بعد كدة تخرج تتفرج على حيوانات المزرعة زي الخروف و المعزة البلدي (العاديين بتوعنا) و تأكلهم و تتصور معاهم
و في المعيز الفرنساوي ” اللي بيبقى عنده دقن دوجلاس ”
بعدها تروح لبحيرة البط و تلاقي البط بيغطس و يعوم و هات يا لعب ? و صوتهم المضحك دا كاك كاك
بعدها تدخل بيت الدواجن البلدي (فراخ و ديوك)
و تدخل عالنعام و تلاقي النعامة الذكر بترقصلك رقصة التحية (معرفش المذكر بتاع النعامة اسمه ايه)
في بيت الطاووس الازرق بألوانه الجميلة
و الديوك الرومي .. دول بقى نكتة، كل ما تقول حاجة او تعمل حاجة بصوت عالي هتلاقيهم ردوا عليك كوركوركوركور

و هتلاقي جنبهم الفراخ الفرعوني
دي سلالة فراخ فرعونية نادرة و شكلها فعلا مختلف و بتعمل صوت مميز اوي عامل زي صوت القرود شوية و على فكرة عندهم قفص نسانيس و ممكن تأكلهم بسكوت و شيبسي
بعدها بشوية تلاقي بحيرة الوز و برج الحمام تاخد هناك احلى صور خصوصاً وقت الغروب
عندهم كمان غزال و دا من الحاجات اللي في ناس كتير بتطلبها منهم عشان يشتروها و النعام كمان، و عموما لو حبيت تشتري اي حيوان سواء موجود عندهم او مش موجود يقدروا يحيبوهولك و تشتريه
من الحاجات المميزة اوي عندهم
نسر العقاب الذهبي (( اللي على علم مصر )) .. دا ممكن يشيل فريسة لحد 75 كيلو و يطير بيها عادي، بيقدر يلف راسه 360 درجة و تحس إن وقفته كدة فيها هيبة

و بعد كدة هتلاقي قفص فيه ديبين صغيرين، و الديب اول ما يحس بالقلق تلاقيه عمال يلف في القفص رايح جي بسرعة اوي
و في حمام شقلباظ و هزاز و القفص متزين بريش النعام، دا كمان الصور عنده تطلع حلوة اوي
في بعد كدة منطقة الخيول و ال” بوني ” شبه الحصان ( نمشية بونى ومتدقش )اوي بس صغنن اوي و جريته عسل ? وعلى فكرة ركوب الخيل مجانى
اخر حاجة بيت الزواحف فيه
سلاحف، تمساح، ورل صحراوي (كومودو) و و في كمان كذا حرباية و بومة و صقور مصري