ليه الطيران الاقتصادي رخيص

ليه الطيران الاقتصادي رخيص

ليه الطيران الاقتصادي رخيص وازاي قادر ينافس ويستمر قدام العمالقة الكبار وكمان ارباحه تبقي اعلي منهم
سعره بيوصل لسعر وجبة في بعض الاحيان بالذات داخل اوروبا ممكن التذاكر توصل ل٢٠ يورو يعني خمس سعر الطيران العادي
ازاي بيعملوا كده
ببساطة كل حاجة مكلفة في الرحلات بيشيلوها او يخففوها
اولا بيشتروا عدد كبير جدا من الطيارات فبياخدوا تخفيض كبير جدا
بيطلبوا طيارات صغيرة وموديل واحد علشان يشتروا قطع غيار واحده لكل طياراتهم فيوفروا طبعا وكمان يوفروا اماكن تخزين كبيرة
والسبب التاني ان الطيارين والمضيفين وعمال الصيانة ياخدوا نوع واحد من التدريب وطبعا تكلفتة اقل
المرتبات منخفضة
والمضيفات هم اللي بينضفوا الطيارات فبيوفروا خدمات النضافة في المطارات
بيطلبوا طيارات بمساحات ضيقة بين الكراسي فيزيد عدد الركاب
والكراسي مش بتتحرك فطبعا تكلفتها وصيانتها اقل
جيب خلفي صغير وشفاف في الكراسي فيسهل علي المضيفين عملية التنضيف اخر كل رحلة
مفيش اكل علي الطيارات
مفيش عندهم مكاتب كله اونلاين وكول سنتر بعماله رخيصه
السفر من غير شنط كبيرة ولو معاك شنطة حتدفع كتير اوي علشان هم بيدفعوا للمطارات نظير خدمة نقل الشنط
مفيش عندهم ترانزيت لانها كمان مكلفة جدا
بينزلوا مطارات صغيرة وبعيدة علشان تبقي ارخص لهم واوقات بيشغلوا مطارات صغيرة مش شغالة ويشغلوها علي رحلاتهم فتنتعش وتشتهر
لكن بسبب كتر رحلاتهم بيقوا مسيطرين علي المطارات دي وبيطلبوا تخفيضات من وقت للتاني والمطارات بتوافق لانها ممكن تقفل من غيرهم
ولو اضطروا لاستخدام مطار كبير بينقوا اوقات الليل علشان سعر خدماتها ارخص
بيشغلوا الطيارات بلا توقف الطيارة بتعمل حوالي ٨ رحلات يوميا
وطياراتهم احدث طيارات بتطير في العالم عمرها بيبقي متوسط ٥ سنين
الشركات الكبيرة بيبقي ١٠ سنين
وده بيخلي استهلاك الوقود اقل بكتير

طبعا الاكل بفلوس والهيدفون بفلوس وطبعا الفري شوب ودي حاجات بتعمل ربح زياده للشركة
بعضهم مفيش عنده ارقام كراسي للحجز
اللي يوصل الاول يقعد في اي حته لذلك تلاقي الناس بتيجي بدري والرحلة تبقي جاهزه في وقت قصير
مفيش عندهم ديسك شيك إن كله اونلاين او ماكينات الشيك إن في المطار وطبعا بيوفروا موظفين وعماله وايجار مكاتب
مش بيستخدموا الممرات المتحركة لدخول الركاب للطيارة لانها غالية عادة بيخلوا الناس تمشي للطيارة او بالباص لو واقفه بعيد
احد الاعضاء الكرام اضاف اضافات مهمة
زي ان طياراتهم فيها سلالم داخلية مش محتاجين استخدام السلالم التابعة للمطارات
وان مفيش عندهم سياسة استرجاع التذاكر
وانهم مش مشتركين في منظمة أياتا العالمية ومش بيدفعوا اشتراك سنوي للعضوية

ارباحهم السنوية اعلي كتير من الشركات الكبيرة
رايان اير مثلا بتعمل ٢٤٪؜
ويزاير ١٠٪؜ ايزيچيت ١١٪؜
ايرفرانس ٢٪؜ لوفتهانزا. ٤٪


كده عرفنا ايه اسباب رخصهم واستمراريتهم والسبب الاهم طبعا هو ان الناس مابقتش تفرق معاهم اكل ولا شرب ولا فخامة قد مابقي السعر هو العامل الاساسي في قرار السفر
واتمني لكم رحلة سعيدة

وسم :

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*