ريفيو عن رحلة ” شهر العسل ” في شرم الشيخ
بعد بحث و ريفيوهات كتير شوفتها قررنا نطلع رحلة شهر العسل في شرم
حجزنا باكدج ٥ ايام ٤ ليالى فندق الجافي ريزورت مع رحلة بحرية و رحلة لدهب شاملين كل الانتقالات والفطار والغدا والعشا
ب ٥٢٠٠ج
الفندق
الفندق ٤ نجوم على البحر في خليج نعمه الشاطيء رملي الاكل كويس جدا كل الوجبات اوبن بوفيه فيه ٢ حمام سباحه كبير وواحد صغير واكوا بارك للكبار وواحدة للاطفال
الغرف معقولة جدا كان ناقصها كاتيل بس وعندهم فريق انيمشين لذيذ بيعمل كل يوم فقرات الساعه ٩ بليل غير فقرات الشاطئ الصبح
اول يوم وصلنا الفندق الساعه ٥ المغرب بسبب الشبوره استلمنا الغرفه واتعشينا وطلعنا على الممشي السياحي في خليج نعمه
تاني يوم صحينا الساعه ٧ الصبح فطرنا والعربيه كانت مستنيانا قدام الفندق واتحركنا للرحلة البحريه يخت اسمه روما كان ممتاز جدا سواء فالكرو او المدربين او الاكل
وقفنا ٣ وقفات للسنوركلينج والدايفنج منها واحدة في الجزيرة البيضا دي الي روعه جدا ومختلفه عن اى مكان نزلنا فيه
رجعنا الفندق الساعه ٥ اتعشينا وطلعنا على سوهو سكوير ( لاس فيغاس العرب ) المكان مبهج جدا وفيه عروض كتير بتتعمل واكتر مكان فيه زحمه
تالت يوم صحينا بدري فطرنا وروحنا الشاطئ وبعدها طلعنا سفاري بالبيتش باجي وحضرنا عشا بدوي فالجبل
سفاري البيتش باجي كانت روعه لكن العشا البدوي معجبنيش اوي ( كنا حاجزينه لوحده مش مع الشركه)
رجعنا ٨ بليل
رابع يوم رحلة دهب وجمال دهب
العربيه اخدتنا الساعه ٨ الصبح واتحركنا على دهب وصلنا منطقه البلوهولعملنا سنوركلينج واتعورت من الشعب المرجانيه 🤣 وبعدها طلعنا على جبال الكانيون وبعدها الممشى السياحي في دهب والى محتاج يوم لوحدة من جماله
رجعنا الساعه ٧ وبعدها طلعنا اتمشينا في السوق القديم وزورنا المسجد الى هناك
خامس يوم بقى كان المغادره
بس شهادة من اجمل الرحلات الى طلعتها وان شاء الله تتكرر كتير
** بالنسبة للمواصلات استخدموا المواصلات الداخليه ( الميكروباص) هتروحوا اي مكان ب ٥ج او اقل كمان