رحلتي الى شرم الشيخ بالتفصيل

رحلتي الى شرم الشيخ بالتفصيل

من واقع شغل 5 سنين فى شرم الشيخ أقدر أقولكوا اللى جاى وانا مستريح .
مبدأياً للي مايعرفش ..
شرم الشيخ مشتى مش مصيف.. لكن طبعاً لو انت واحد من اللى أجازتهم فى العيد بس وهتسافر ركز فى اللى جاى !
وانت بتجهز شنطتك اعمل حسابك تشحن تليفونك والباور بانك واللاب لو مسافر بيه وتأهل نفسك انك هتقعد فى الطريق فى متوسط من 8 ل 11 ساعة .
وبالمناسبة الطريق الجديد لسه ما اتفتحش !
تفتيش النفق ورأس محمد دلوقتى بقوا احسن من الاول بكتير وجابوا أجهزة يفتشوا بيها بس برده بيبقي فى زحمة … فأصبروا إن الله مع الصابرين . 😇
– لو مسافر لوحدك مش مع شركة سياحة طبيعى هاتحتار تسافر مع انى شركة شحن ؟! 🚌
سوبر جيت الأرخص
بلو باص الأنضف
وجو باص ماتسافرش معاهم إلا لو هاتحجز باص غالى
وطبعاً أتوبيسي لسه جديدة ومستواها حالياً كويس جداً
غير كده أوعى تبص لاى شركة تانية إلا لو انت فى أقاليم .
أفضل وقت تحجز فيه من القاهرة من 12 بالليل ل 3 الفجر علشان تلحق النفق قبل ما يتزحم من العربيات النقل وكمان علشان ما تستناش كتير قبل معاد دخول الغرف فى الفندق .

– هاتوصل فى شرم فى الرويسات ولو ملكش حد هناك يستقبلك طبيعي هتاخد تاكسي يوصلك لفندقك..فاصل معاهم جاامد جداً 🤓وحاول ماتركبش تاكسي كتير فى شرم المايكروباص بربع بيلف شرم كلها وب 6 جنية ماتزوقينى يا ماما 🚎

شرم يعنى الاماكن دى : 😊😌
– الهضبة : القعدة على البحر فى فرشة وساندويتشات شرماوى والاكوابارك والف ليلة وليلة …
– السوق القديم : خليط حضارى مصرى تركى خطير .. مسجد الصحابة والتمشية فى السوق واحلى أكلة سمك من فارس أو حلقة السمك ومشويات بقا عند
المصريين رحلة الغواصة وشاطيء تيراسينا لو ينفع ولو عايزين تشتروا أدوات غطس او هدايا السوق احسن مكان …
-خليج نعمة : أشهر مكان بس مش الاحلى الممشي السياحى الجميل وقعدة الارجيلة شواطيء رملى وفنادق قديمة شوية
-خليج القرش : شواطيء صخرية زي 90% من شواطيء شرم بس فيه قطعة من أوروبا ( ميدان سوهو ) وما أدراك بجمال سوهو 😁
-الغرقانة أو خليج نبق : فنادق جديدة وفخمة أغلى شوية بس هادية كتير أخر حدود شرم بعديها بتيجي السعودية بس عندك سوق العرب سات وعرض الدولفين وطريق دهب .

كل ده جميل لكن ……….

ماينفعش تروح شرم الشيخ وماتطلعش رحلة سفارى ورحلة بحرية باليخت !! وبالمناسبة رأس محمد أجمل من تيران وفى رحلات بحرية ليلية حلوة جداً للعائلات …
ماينفعش ماتطلعش يوم رحلة دهب تشوف الجبال الملونة والبلو هول .. دهب دى لوحدها حكاية تانية خاالص 😇
ماينفعش تبقي فى البلد دى وماتحضرش الشروق من على الهضبة أو ماتشوفش الدور التانى فى مسجد الصحابة وقبة المسجد …
ماينفعش تبقي هناك وماتباتش يوم فى المحمية وتعقد تعد النجوم طول الليل🤩
أوانك ماتوديش أولادك الف ليلة وليلة أوهوليوود يتصوروا مع الديناصورات والتماثيل الحديد أو أكوابارك يفضلوا يلعبوا طول اليوم لحد ما تلاقيهم ناموا على الزحليقة 😆
ماينفعش تروح شرم وتسيب الاماكن دى وتفضل قاعد فى الفندق !
مع احترامى الكامل الناس اللى بتحب تسافر علشان تستجم فى الفندق طول الاجازة ، نصيحتى ليك خليك فى السخنة او الساحل هاتستجم برده ومش هاتتعب فى الطريق زى شرم يأاما توكل على الله وروح دهب 👈👌
غالباً مش هاتحب ترجع ! 😁
سافروا وأطلعوا رحلات وأتفسحوا وفاصلوا مع مكاتب الرحلات فى الاسعار وبالمناسبة معظمهم فى خليج نعمة ..
لو بتدور على فندق رخيص على الهضبة ولو فندق فخم وهدوء فى الغرقانة ولو عايز زحمة وناس ودوشة خليك فى نعمة .
يارب اكون قولت أى معلومة جديدة عليكوا …
أجازة سعيدة وكل عام وانتم بخير ❤️

ومن هنا هاتعرف
اماكن الفسح في دهب

وسم : / /

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*