قرية الريف العربى elreef elaraby village
اكتر سؤال بيجيلنا الفترة دي عن اماكن مناسبة للعائلات لتقضية اجازة نص السنة
يوم بالفطار و الغدا واللعب والحفلات ب 250 جنية
قرية الريف العربي مخصصة ((للعائلات فقط))
انت تعمل حسابك تروح تقضي يوم كامل مع اسرتك و تبدأ اليوم من بدري (الساعة 9 الصبح) تفصلوا فيه من الجو المكهرب بتاع الامتحانات و تاخدوا جرعة Refreshment للعيلة كلها
اليوم بيبدأ بالفطار الفلاحي (فطير مشلتت و عسل نحل او عسل اسود و جبنة قريش او جبنة قديمة) و ممكن كمان تختار الفطار العادي (فول و طعمية و عيش ريفي و سلطة)
بعد كدة خد لفة استكشافية في القرية، هتلاقي القرية مساحتها كبيرة جدا و فيها اماكن حلوة اوي تتصوروا عندها زي ابراج الحمام، و الشجر و الزرع اللي في كل مكان، و شوف المكان اللي تحب تقعد فيه
كل القعدات فيها بتطل على view مميز، بس اكتر مكان الناس بنحب تقعد فيه الاماكن اللي عند حمامات السباحة عشان يكونوا قريبين من المسرح و يتفرجوا على العروض اللي بكون مستمرة طول اليوم زي الاراجوز، و عرض الساحر، فقرة السيرك و المونولوجيست “نكت” و من اكتر الفقرات اللي الناس بتستناها فقرة الفنان ماندو
دا غير ال DJ اللي هتلاقي فيه ميكي و بطوط و سلاحف النينجا واقفين عالمسرح و مبيبطلوش رقص على الاغاني مع الاطفال
و طبعا لازم تعمل حسابك في مايوه عشان عندهم 5 حمامات سباحة و اكوا بارك .. هتتشجع انك تنزل في المياة لما تشوف الناس و هما بيبلبطوا و مبسوطين باللعب في المياة و بمجرد ما تنزل هتنسى البرد و تاخد عليها حسيت إنك بردان او قلبك مش مشجعك مش لازم تنزل، كدة كدة هتلاقي انشطة تانية كتير تنبسط بيها زي ركوب الخيل و الجمل و السينما ال 7D و في كمان عمل اشكال بالفخار و ستوديو بالملابس التاريخية و ملاهي للاطفال و اي نشاط من دول ب 10 جنيه
بعد كدة بقى استعد للغدا عشان الغدا عندهم قصة لوحده انت بتختار نص فرخة/ ميكس جريل/ ربع فرخة و سمانة و سيخ كفتة “وجبة الريف” كدة كدة اي وجبة من دول بيتقدم معاها طاجن خضار، رز و 2 سلطة و عيش و ممكن كمان تزود 50 عالوجبة و تخلي الوجبة جوز حمام او نص بطة “مفيش دلع اكتر من كدة بقى” ?
طبعا بعد الاكلة دي الواحد بيبقى محتاج يحبس سواء ب شاي او حاجة ساقعة و الحاجات دي اسعارها من 5 ل 10 جنيه للمشروب
البرنامج دا بياخد اليوم كله من 9 الصبح لحد 6 المغرب و سعر الفرد 250 جنيه السعر دا شامل وجبة الفطار و الغدا و مفيش زيادة للخدمة او الضريبة الاطفال من سن 4 سنين ل 10 سنين ب 100 (وجبات الاطفال كمياتها اصغر بس مناسبة لاكلة طفل)
الدخول بيبقى مجاناً للاطفال الاقل من 4 سنين
بص دي بقى عشان مهمة جداً (( لازم تحجز)) ? القرية كبيرة بس في نفس الوقت بيحجزوا حسب الطاقة الاستيعابية للمكان عشان تجهيز الوجبات كمان و الاماكن، فا بمجرد ما اليوم بيتحجز بالكامل بيتقفل الحجز فيه و تقدر تحجز في اي يوم تاني
الاتصال للحجز بيكون من الساعة 9 الصبح ل 10 بالليل
رقمهم 01211113182
العنوان: محافظة الجيزة، المريوطيه في اتجاه طريق سقارة السياحي، شبرامنت، اول طريق يمين بعد معاهد الفراعنة و المدينة
تعرف ايضا على
نايل اكوا بارك الجيزة
