منتجع الحمرا إيكولودچ

El – HAMRA Eco-Lodge
في اماكن كدة مدكنينها للحبايب بنطلع بيها في المناسبات الجميلة .. كل عام و انتم بخير

المكان عبارة منتجع صحي تقضي فيه Day use مختلف عن اي مكان تاني في مصر، بالفطار والغدا والعشا ب ٥٠٠ جنية ??

اول ما دخلت لاقيت الريسبشن فيه جلود تعابين اناكوندا و تمساح متحنط حسيت فجأة اني في فيلم افريكانو او في رحلة مع ناشونال جيوجرافيك تدخل بعد كدة على مطعم كبير يكفي حوالي 150 فرد و مليان تحف و انتيكات متخطرش على بالك، و الاكل هناك مش مختلف عن الاكل بتاعنا بس طعمه مختلف جدا، انا كلت فراخ و مولوخية جمالهم ميتوصفش مش عارف بقى دي تتبيلة ولا الفراخ هناك عشان اورجانيك طعمها مختلف و حلو اوي كدة

تطلع بعد كدة على حمام سباحة جميل وسط النخل و الزرع و القعدات اللي حواليه شكلها حلو اوي وفي Kid’s Area للاطفال و جنبك كمان ال Juice bar عشان لو حبيت تطلب اي حاجة تشربها و انت قاعد بتفسي دماغك “التعبير دا دقيق مش مبالغة”

و بعد كدة تاخد الطفطف و تطلع على كهف الملح، و دا قصة تانية لوحده، بتلبس قبقاب خشب و مجرد ما تدخل هتلاقي الإضاءة كلها لونها ازرق و موسيقى مريحة جدا للأعصاب، اقعد و غمض عينك و استجم عشان الملح دا فايدته انه بيسحب الطاقة السلبية من جسمك و تخرج منه كإنك مولود من جديد

و هتلاقي في نفس المكان ساونا و جيمانزيوم صغنن كدة بس الاهم من كل دا موضوع الدفن في الرمل، مبدأيا كدة الرمل دا نوع معين من سيوة عشان رملة سيوة مفعولها سحري في علاج الروماتيزم و سحب الرطوبة من الجسم، الجلسة بتبقى عبارة عن انك بتنزل في الرمل لمدة ساعة و تشرب مشروبات معينة في الفترة دي و تخرج تقعد في خيمة و تتلف ببطانية لحد ما جسمك بيرد شوية و دا بيكون في فترة معينة من 15 يوليو لحد 15 سبتمبر كل سنة

عاملين تحت الارض افران للمندي بالشبكة بتاعتهم و في كمان قعدة بيعملوا فيها شاي على الراكية (شاي على قوالح الذرة) و ممكن تعمل حفلة شوي مارشمللو او ذرة او بطاطا حتى، و تقعد في “المربوعة” حاجة زي الخيمة كدة بس كبيرة اوي و تقعد فيها مع صحابك او اسرتك تشربوا فيها الشاي

بين كهف الملح و حمام السباحة هتلاقي مزرعة مانجو و رمان و في النص شجرة ظل عاملين هناك قعدة اسمها “قاعدة النم” تقعد فيها زي الباشا و شجر المانجا حواليك في كل مكان

الغرف هناك (بانجلوز) السراير خشب و متزينة بخشب بامبو، و الدولاب عبارة عن صندوق في الارض بيتفتح بحبل، و كل غرفة فيها الحمام الخاص بيها، و قعدة برة زي التراس، و في الغرف اللي عند كهف الملح و دي فيها السرير نفسه عبارة عن قوالب ملح لما بتدخل تنام عليه بيسحب الطاقة السلبية من جسمك و يعملك Refreshment

المكان اسمه الحمرا ايكولدج على اسم بحيرة الحمرا “او بحيرة النطرون” و دي بحيرة نسبة الاملاح فيها عالية عشان كدة الناس بتجيلها من كل دول العالم عشان دي الاملاح اللي في البحيرة بتشد البشرة و تخليها تلمع و تقريبا بتعالج كل الامراض الجلدية زي حب الشباب و الصدفية و معروفة بكدة تخيل بقى إن في قلب البحيرة دي في بئر مياة عذبة “في وسط البحيرة المالحة” و الحمرا ايكوليدج هو المكان الوحيد الموجود قرب البحيرة، تجربة مختلفة و في لسة تفاصيل اكتر لما تعيشوها هتستمتعوا بيها جدا خصوصا انها مختلفة عن اي مكان تاني

ال Day use ب 250 جنيه شامل فطار و غداء و حمام السباحة ( بدون غرفة)
و ايجار الغرفة ب 100 بحد اقصى 4 افراد
و ايجار الشاليه ب 150 جنيه بحد اقصى 8 افراد
تكلفة اليوم هناك Full board (فطار + غدا + عشاء ) + مبيت ب 500 جنيه للفرد
ال Half Board ( وجبتين ) + المبيت ب 400 جنيه
و دخول كهف الملح ب 100 جنيه
جلسة حمام الرمل ب 200 جنيه