تجربة البالون في الأقصر
أول ما بنوصل بيكون في منسق من الشركة بيراجع البيانات وبيبدأ الكابتن المسئول عن البالون يشرح تعليمات الإقلاع والهبوط وإجراءات السلامة
وتعريف كل واحد بأهمية الإلتزام بالتعليمات خصوصًا وضع الهبوط
والصراحة ده فرق معانا جدًا وطمنا واحنا طالعين واحنا نازلين
بمجرد ما تبدأ عملية نفخ البالون بتلاقي حواليك أعداد رهيبة من البالون بألوان وأشكال كتير وكل بالون في فريق كامل بيحضر للعملية دي ناس بتفرش وناس بتنفخ وناس بتجمع التيم اللي هيطلع بتحس إن خلية عمل كل واحد عارف هيعمل ايه بالظبط وفجأة وفي ثواني .. هوب .. في بالون جنبك طار والناس بتهلل من الإنبساط
يبتدي قلبك يدق زي حالاتي ويتوتر أكتر يادي النيلة عليا وعلى خيبتي
وتخش في ضحك متواصل بدون سبب
وبدون مقدمات فجأة بتلاقي نفسك جوه الـ BOX والبالون بيبدأ يترفع تدريجيًا لحد ما تكتشف إن ايه دا احنا طلعنا كدا بمنتهى السلاسة وتبص لصحابك الثلاثة تلاقيهم بردو مستغربين
طب ما الموضوع طلع سلس ولطيف اهو مفيهوش أي رعب ولا قلق الحمدلله
بتبدأ الأرض تحتيك تبعد وتبعد ويكأنك Google Maps بس الجميل والممتع في نفس الوقت إن دا بيتم في هدووء وسلام رهيييب
هتلاقي الكابتن بيشرحلك المزارات والمعالم اللي بنعدي عليها وانت بتشوف كل حاجة من فوق
وأول ما تبدأ تفوق الحق خد صور و Reels كتير
واستمتع بجمال شروق الشمس والهدوء اللي فوق بعيد عن دوشة العربيات وزعيق الناس في الشغل
📍البالون بينزل في مكان غير اللي كلنا أقلعنا منه وده بناءًا على سرعة الهوا ومناسبة المكان اللي ينفع ننزل فيه
وحظنا كان حلو عشان نزلنا في أرض فيها قصب وأصحاب الأرض قابلونا بقصب وكله نزل مصمصة
بعدها الشركة بتبعت العمال عشان يفكوا البالون ويلموه لإن حجمه كبير جدًا وهتلاقي أكتر من 10 لـ 15 واحد بيشتغلوا في الموضوع دا
ولو حابين تدولهم تيبس دي حاجة منكم ذوق وكرم
بتاخدوا بعدها شهادات من الشركة إنكم طلعتوا الرحلة دي ودا في حد ذاته حاجة حلوة
الرحلة مدتها تقريبًا 45 دقيقة من أروع ما يكون بجد
الأسعار بتبدأ من 400 للفرد على حسب السيزون والشركات وتوقيت الرحلة
(رحلة أولى ولا تانية ولا تالتة)
إزاي اسافر الاقصر واسوان ب ١٠٠٠ جنيه
أسعار تذاكر وادي الملوك مدينة الأقصر
