سفرية ب 3000 جنية
ازاي تروح الاماكن دي كلها اللي في الصور ب 3000 جنية بس ويمكن اقل كمان؟
كل المطلوب منك تذكرة طيران لكوالالمبور وهات ورقة وقلم او احفظ البوست وريح دماغك.
مجرد ماهتنزل في مطار كوالا, هتاخد اتوبيس ب 12 ربنجت / 48 جنية لوسط البلد وبعدها مترو ب20 رينجت الكارت وهتستخدم اول رحلة ب2.5 ريجنت/ 10 جنية لمكان الهوستل في بوكيت او عند برجين كوالا, اليوم هيكون في حدود 25 رينجت/ 100 جنية في اليوم.
يبقي انت كده وصلت مكان سكنك وهنبدأ بقي نلف وندخل في المعمعة شوية…
انا مش هتكلم عن كوالالمبور اللي بتشوفها في اي بوست بتشوفه عن المدينة ولا اللي في الافلام… انا هتكلم عن اللي في الصور دي, الجزء اللي اكتر من 99% من الناس مش بتروحه ولا اصلا تعرفه… يلا بينا من غير رغي علشان انا مش بسكت 😀
هتكلم عن مكان مكان بمواصلاته وتكلفه اكلك وشربك وكل حاجة بالجنية.
قبل ما هبدأ انا مش هقدر اتكلم عن كل الاماكن علشان البوست هيبقي طويل السنين والناس هتوه مني.
وبما انك قاعد في هوستيل فالافضل انك تطلع الاماكن دي مع ناس وهتشاركوا مصاريف المواصلات, ده غير طبعا احسن بكتير من انك تطلع اماكن زي دي لوحدك لاول مرة.
نبدأ بالقريب:
1- sungai lepoh waterfall
جراب من مكان الهوستيل هيكون في حدود 50 رينجت يعني الفرد تقريبا 15رينجت/60 جنية دخول المكان ببلاش اكلك وشربك في اليوم في حدود ال 50 رينجت/200 جنية اضربه في 2 علشان الرجوع — هتلف في الغابة برحتك وتطلع لاخر نقطة وعنك شلالات زي الصور والفيديو
2- bukit tabur
دي مشكلتها في صعوبتها شوية لكن تستاهل وعلي حسب قدرتك تختار المدخل او الهايك المناسب ليك
الطريق حوالي 20-30 رينجت زي الصورة يعني الشخص 10رينجت/ 40 جنية ونفس الكلام في الرجوع. وخلينا نثبت الاكل في حدود 40-50 /200 جنية وطبعا في ناس ممكن توفر عن كده بكتير, ده غير ان ماتنساش فطارك في الهوستيل ببلاش
3- bukit batu putih
هنا الافضل تاجر عربية ب 100 رينجت/400 جنية مثلا وتروح ونرجع بيها وهتفضل معاك طول اليوم, وممكن تستخدم ابليكشن اسمه socar
الاسعار فيه رخيصة وطبعا هتشارك المصاريف علي 3 او اربعة ودي حاجة ارشحها جدا هتوفر معاكم كتير لو بتلفوا كتير يعني بعد البنزين والكلام ده قول كل واحد 50 رينجت/ 200 جنية + اكلك زي ماقولنا 40 رينجت / 160جنية
4- templer park
الطريق ب 30 يعني الفرد 10 ريجنت – رايح راجع 20 رينجت / 80 جنية
- اكلك وشربك 40 رينجت / 160جنية + دخول 5 رينجت / 20 جنية وهناك ممكن تقضي يوم كامل هناك وحتي تخيم والمكان ده احسن وقت تروحه وسط الاسبوع علشان لانه سهل في بتلاقي في الاجازات ناس كتير
5- chilling waterfall
نفس حسبة العربية التاجير 100 + قول 100 بنزين (انا كده ببالغ جدا اصلا) يبقي كده الفرد 50 رينجت / 200 جنية + اكلك وشربك 40 رينجت / 160جنية
وفي الطريق في شلالات تانية ممكن تاخد لفه عليهم في السريع
6- broga hill
المواصلات ب 4 مترو + 20 جراب اضربهم في 2 يعني 50 رينجت/ 200 جنية + اكلك وشربك 40 رينجت / 160جنية … ارشح كده التخييم هناك وهحط الفيديو في بوست تاني علشان الدنيا اتملت هنا.
7- genting highland
قولت اختم بحاجة بسيطة او سهلة وفيها دلع في الاخر شوية
عندك خيار الاتوبيس ب 12 رياح راجع يعني 24 رينجت / 100 جنية
مصاريف هناك دي بقي مع نفسك لان في مول في الاخر وفي جزء ممكن تتمشي فيه او تقعد تستمتع بالطبيعة + اكلك وشربك 40 رينجت / 160جنية
كل الاماكن دي دخولها ببلاش الا مكانين اتنين الدخول ب 2 رينجت/8 جنية
بعد الاماكن دي كلها انت في معظم الاوقات لو مش هتعمل كامب يبقي الرحلة بتخلص علي الساعة 4 العصر ولما تروح الهوستيل وتريح شوية هيبقي عندك من بعد 6 المغرب وقت كفاية انك تلف بليل وتشوف المدينة بقي وتعمل اللي انت عاوزه لحد بليل الساعة 12 علشان تجهز لليوم اللي بعده.
انت كده شوفت كل خرم في المدينة لان معاك اسبوع تقريبا وزرت 7 اماكن طبيعية من غابات وجبال وشلالات وده كله ب 3000 جنية اللي هو انت هتصرف اكتر منهم لو طلعت العين السخنة.
قبل ما تتفرج علي الصور بنرشحلك المكان ده
رحلة يخت العين السخنة
