احلى مكان في مصر
مرسى مطروح
بالنسبة لي مش مصيف عادي لا خالص دي بلدي وعشقي كمان
تخش على شارع اسكندرية احلى شارع تتمشى فيه وتتبسط لمجرد المشي فيه
ولما تقعد على قهوة جالون وتطلب شاي زردة وتعيش مزاج عالي اوي اوي
وبعدين تخش على مفتاح السيد واحلى مشويات في الدنيا ولا الحواوشي بتاعه الله الله الله
ولو عايز تنبسط تاني خش على مطعم الأحرار وقعدته الجميلة في التربيعة والاكل البدوي الرهيييب
وطبعا لو عايز كنتاكي وماك تطلع علطول ع البحر ع الكورنيش جنب فندق ريم
لو عايز أكلة سمك مية مية اطلع على اسماك مجدي وأخواته في السوق اللي في الشارع الموازي ل شارع اسكندرية هتاكل شوية سمك فوق العظمة
اه صحيح عندك فتح الله ماركت لو عايز تجيب حاجات ومحتاجات ع الكورنيش برضه
وانت ع الكورنيش بقى انزل و أجّر عجل و بيتش باجي ودلع نفسك هتلاقي ناس كتيييييير جدا بيأجّروا
ومعلش وانت في اخر الكورنيش هتلاقي ايس كريم و ام على
بتاع عزة دووووس علطول ومتفكرش
وطول مانت ماشي ع الكورنيش هتلاقي العاب كتير عيالك هينبسطوا بيها اوي و ع الرايق في الفلوس برضه
وكمل كده بعد عزة هتلاقي السيرك لو عايز تقضي وقت لطيف كده حيوانات وحركات وكده
وارجع ورا شوية كده قبل السيرك هتلاقي كهف الملح لو نفسك تطلع طاقتك السلبية وكده
تعالى بقى ل الشواطئ
مبدئيا كده كل الشواطئ الجامدة بعيدة عن وسط البلد مسافة النص ساعة و الساعة الا ربع عشان تبقى عامل حسابك في الوقت
نبدأ ب ايه بقى في الشواطئ الجامدة
تعالى نبدأ مع شط الغرام
وطبعا صخرة الغرام والست ليلي مراد وساكني مطروح
الشط ده ليه طريقين يا سيدي
اول واحد واجملهم بالنسبة لي
وهيا معدية الغرام ودي مركب كده جميلة بتركبها من اخر الكورنيش من بعد جيلاتي عزة
ودي الفرد فيها ب خمسة جنيه بس هتتبسط بيها اوي وانت ماشي في وسط البحر كده وحاجة خيال وروقان
حوالي عشر دقايق ربع ساعة
هتنزل ع البحر علطول تاخد شمسيتك وكراسيك وعييش
ب 100 جنيه شمسية وطرابيزة واربع كراسي
الطريق التاني بعربيتك أو مواصلات وهتاخد حوالي نص ساعة
تاني شاطئ وهوه طبعا طبعا
الأُبيّض مالديف مصر يا عم الحاج
هتلاقي
الأُبيّض العام و قصر الأُبيّض و الأُبيّض بلو بيتش و الأُبيّض زمردة
وهتلاقي على نفس الطريق كمان شاطئ أم الرخم
وده لوحده حكاية
اي واحد من الشواطئ ديه هيعجبك بس خلى بالك ساعات من الامواج بتبقى عالية
الطريق ل الشواطئ دي بياخد حوالي ساعه الا ربع
بص بقى اليوم اللي هتروح فيه
الأُبيّض اعمل حسابك في الوقت بدري شوية
و اطلع عجيبة الاول وما ادراك ما عجيبة يعني حتة من الجنة ع الأرض خد صورك الجامدة والبس بدوي وفرح عيالك ب كام هدية حلوة من هناك
وانت راجع بقى اختار اللي يعجبك من شواطئ الأُبيّض
وطبعا طبعا طبعا ما ينفعش ما تعديش على كليوباترا وتشوف الجمال في الحمام اللي هناك والممشى الزجاجي الجديد هتاخد شوية صور مش هتنساها
بس خلي بالك من الزحلقة
تالت شاطئ هوه روميل وده طريقه من ناحية شارع علم الروم
شاطئ لطيف قريب من وسط البلد وهتلاقي متحف روميل ممكن تخش لو ليك مزاج تتفرج على عم روميل ثعلب الصحراء وكده
في بقى شاطيء بره البلد 35 كيلو اسمه شاطئ باجوش أو باغوش بس ده حاجة كده من ورا الخيال عارف الشواطئ البكر اللي محدش زارها كتير
تحفة فنية محصلتش
بس عيبه أنه مفيهوش خدمات
يعني تروح كده
بالمايوه والموبايل تتصور صور عظمة العظمة وترجع
اول لو شباب تقسموا نفسكم ناس تنزل البحر وناس تتصور وتبدلوا
ودي شوية الشواطئ الجامدة
وهتلاقي فيها طبعا كل الالعاب
البنانا بوووت و الجيت سكي و البدال وغيرهم
عايز شواطئ في القريب من وسط البلد
هتلاقي البوسيت و هتلاقي الفيروز و الليدو بس زحمة ومش احسن حاجة في الميه
وطبعا لازم تجرب رحلة اليخت في البحر عشان دي لوحدها متعة تانية وجو تاني وسحر تاني
هتلاقيهم عند معدية الغرام هتطلع رحلة ساعتين ولا تلاتة أو زي ما تحب وهيخش بيك في الميه الفيروزية مية بسين والله
وتقدر تنزل ومعاك لايف جاكت لو مش بتعرف تعوم
ممكن تحجزها برايفت أو تطلع مع ناس بال فرد
تعالى بقى ل شارع علم الروم وطالما اسم الشارع ده جيه يبقى علطول نقول اسم
مقلة نصر
يعنى اللب الابيض الجامد بتاع مطروح وخلى بالك من الاسامي الكتير النصر و نصر اكتوبر والنصر الإسلامية وغيرهم
كلها مش مقلة نصر الأصلية
هسيبلك صورة فيها المحل الاصلي
تعالى بقى نروح ننبسط شوية في سوق ليبيا يعنى
اللبس و زيت الزيتون و الزيتون ومنتجات سيوه الجميلة
طبعا انا مقولتش كل حاجة في مطروح بس حاولت اقولك احسن حاجة واسهل الطرق

افضل شواطئ مرسى مطروح
ازاي تقضي اسبوع في مرسى مطروح
أحلى مناطق في مرسى مطروح
مرسى مطروح – المواصلات والإقامة والأكل وأهم الشواطئ واماكن الخروجات والتسوق والكافيهات