افضل محميات فى مرسى علم

افضل محميات فى مرسى علم

مرسى علم
من افضل شواطئ البحر الاحمر وبتشتهر مرسى علم بأن بها أفضل محميات علي مستوى العالم.
المحميات اللي هنكلم عنها النهارده
محمية صمداي Shaab Samadai Reef
شعاب سطايح Sataya reef Dolphin house
بحيرة النيزك Meteor lake
======================================
محمية صمداي Shaab Samadai Ree
◼️ هو بيت الدولفين Sha’ab Samadai Reef
هو أشهر مكان للغطس في مرسي علم، ميزته الكبيرة هو قربة الشديد من الشط وسهولة الوصول له، ده بالإضافة للشعاب المرجانية اللي تعتبر بيت الدلافين هناك وده بيخليها مكان مثالي للسنوركلنج أو الغطس وعشان كده هنتكلم عن محمية صمداي بتفاصيل أكتر وموقعها وأفضل مواعيد الزيارة.
▪️ محمية صمداي
هي واحدة من أهم المحميات الموجودة على البحر الأحمر وده بسبب وجود شعاب مرجانية نادرة بتاخد شكل حدوة الحصان عرضها 500م وطولها 900م
وده خلاها بيئة خصبة جدًا لوجود الدلافين اللي بتعيش وتتحرك هناك في مجموعات كبيرة جدًا.. والمنطقة هناك متقسمة ل4 أجزاء..
منطقة (A) : وهي منطقة مخصصة لراحة الدرافيل مغلقة تماماً أمام جميع الأنشطة.
منطقة (B) : وهي منقطة مسموح فيها فقط بالسباحة وغير مسموح بأي أنشطة أخرى.
منطقة (C) : وهي منطقة مخصصة لانتظار اللنشات السياحية.
منطقة (D) : وهي المنطقة الخارجية ومسموح فيها بجميع الأنشطة.
وتسميت المحمية بالإسم ده تيمنًا بطائر ” الصمد ” اللي كان بيزور المنطقة في موسم هجرته.
▪️ محمية صمداي فين بالظبط؟..
موجود في قلب البحر الأحمر على بعد 7 كم من الشاطيء، قريب جدًا من مرسى علم حوالي 10 -15 دقيقة بالعربية ودي ميزة كبيرة جدًا.
احسن وقت اخر البوست
▪️المواعيد في محمية صمداي
بننصح دايمًا إنك تروح شاطيء النيزك في نفس اليوم اللي هتعمل فيه سنوركلنج او تغطس في شعاب صمداي وده لإنهم قريبين جدًا من بعض، ممكن تبدأ بالنيزك وهناك هتقضي ساعة أو اتنين بالكتير وبعدين تتحرك على محمية صمداي .. المواعيد المسموح بيها لنزول المياه في صمداي بتبدأ من 9 الصبح لحد 3 العصر..
ممكن تسأل قبل ما تروح ممكن يكون حصل تحديث ع المواعيد دي
=====================================
بحيرة النيزك Meteor lake
▪️ بحيرة النيزك
حمام سباحة في قلب البحر الأحمر، واحد من أجمل الأماكن وأغربها اللي ممكن تزورها في مرسى علم، حمام سباحة طبيعي. وموجود علي مقربة من محمية صمداي حوالي 5 دقايق زي ما وضحنا فوق.
▪️ سبب التسمية:
فيه قصص وحكايات كتير بتقول إن السبب في التسمية هو سقوط نيزك في المنطقة دي وهو اللي سبب الحفرة الكبيرة جدًا دي واللي عمقها من 8م ل 10م، ومع إن علماء الجيولوجيا نفوا إن ده السبب الحقيقي، إلا إن اسم المكان وجماله بيجذب ناس كتير حوالين العالم إنها تزور الشاطيء وتستمع بالسباحة والغطس فيه بيجيله الناس اللي تعرف قيمة الجمال وقيمه السباحة في مكان فريد زي ده.
▪️ بحيرة النيزك فين بالظبط؟..
شاطيء النيزك موجود على البحر الأحمر داخل نطاق محمية وادي الجمال وقريب جدًا من مدينة مرسى علم اللي بيبعد عنها حوالي 13 كم وبتاخد تلت ساعة بالعربية، ومن مميزات موقع شاطيء النيزك انه في طريقك لو رايح شاطيء حنكوراب أو القلعان فتقدر تخليهم كلهم في يوم واحد، تبدأ من النيزك وتاخد لفة في حنكوراب وتقضي ليلتك في القلعان.
معظم اللي بيروح النيزك بيكون موجود بالفعل في مرسى علم ومبيروحهاش لوحدها، لإنك بعد ما هتخلصها هتغطس في صمداي او العكس وبعد كداهتكمل على الطريق للجنوب وتقدر تزور شاطيء حنكوراب وتعمل سنوركلنج هناك وتختم بالقلعان وتبات هناك سواء في الكامب أو حتى تخيّم!
عامةً النيزك ملوش أي مصاريف لدخول الشاطيء ومش هتحتاج معاك دليل او مرشد، كل الحكاية هتكون تكلفة المواصلات واللي بتتراوح بين 500 جنيه وحتى 1000 جنيه بداية من مرسى علم وحتى نهاية يومك في قلعان وانت وشطارتك بقى وانت بتتفق مع السوق وهتتقسم عليكم لو مجموعه. متفوتش منك وانت هناك انك تروح
مرسى مبارك سعرها حلو جدًا وقريبة وهتشوف فيها حاجات مش موجودة في العالم كله
▪️(لو عاوزين تقسيمة لرحلة بعدد الايام وتعملوا ايه وتحجزوا في كامبات ايه؟ قولوا في كومنت تحت وانا اجهزلكم بوست بالكامبات)
▪️احسن وقت طبعا اخر البوست.
=====================================
شعاب سطايح Sataya reef Dolphin house
▪️ شعاب سطايح
بيت الدولفين أو Dolphin Reef House
هو من أكبر واشهر مكان تجمع للدلافين في البحر الأحمر، وموجود في منطقة شعاب سطايح في محمية وادي الجمال، والمنطقة فيها أعداد كبيرة جدًا من الدلافين (على حد قولهم اكثر من 5000 دولفين بانواع مختلفه) اتعودت كل يوم على إنها تنط بره المياه وتلعب مع الناس.
ومن شهرة المكان بيجيله سياح من دول كتير حوالين العالم وبشكل خاص من إيطاليا وفرنسا وألمانيا.. ومن المعروف عن عُمر الشعاب الموجودة في المنطقة إنها موجودة من ملايين السنين ده غير الكائنات البحرية النادرة الموجودة في المنطقة زي الدلافين عروسة البحر والقروش والسلاحف انواع مختلفه ونادرة
▪️ شعاب سطايح فين بالظبط ؟..
بيت الدولفين موجود في قلب البحر الأحمر، بتروح من مرسى علم لمارينا حماطه ومن هناك بتتحرك بمركب أو يخت (داي يوز) في رحلة بتبدأ من 8 الصبح تقريًبًا لحد بعد العصر..
حماطه نفسها بتبعد عن مرسى علم حوالي 100 كم وبتاخد تقريبا ساعة ونص بالعربية.. ومن القاهرة حوالي 850 كم وتقدر تروحها بالمواصلات عن طريق أي اتوبيس رايح الشلاتين .
▪️أسعار زيارة بيت الدولفين شعاب سطايح
معظم اللي بيروح سطايح أو بيت الدولفين، بيكون موجود بالفعل في مرسى علم وعشان وأحسن سعر لسطايح من مرسى علم،بتقدر تحجز من مكان اقامتك (داي يوز يخت) ودا بيتضمن الانتقالات بميني باص مكيف بياخدك من مكان اقامتك لحد مارينا حماطه ومن هناك بتطلع على المركب اللي هتقضى عليه اليوم كله.. بتنزل في اماكن مختلفة تعمل سنوركلنج وبيتوفرلك كل المعدات اللي هتحتاجها زي الماسك والزعانف غير الغطس في منطقة سطايح نفسها مع 60 – 80 دولفين وأخيرًا مع المياه والمشروبات هتاخد وجبة الغداء بتاعتك على المركب وترجع آخر اليوم للفندق من تاني .. اليوم بيبدأ من 6 الصبح وبتقضي اليوم كله في البحر وترجع تاني مرسى علم على المغرب تقريبًا واليوم بيكلفك حوالي 1000 جنيه وانت طالع علي حسب الفندق واقامتك عامله كام 😂
او علي حسب عدداكم بتتفق مع عربيه وقبل ما بتتفق بتكون مظبط مركب تبقى معاك وانت وشطارتك.
▪️احسن وقت لزيارة مرسى علم
الصيف نهاية مايو، الجو مشمس وحر جدًا خاصة بالنهار حتى 40 درجة،
أما في الشتاء فالجو لطيف جدًا، دافي ومشمس بالنهار وبارد شوية بليل والمطر احيانا.
لكن من بداية من شهر مارس وحتى ديسمبر بيكون أعداد الدلافين أكتر بكتير مقارنة بباقي شهور السنة..
============================================
محميات مرسى علم من الأماكن اللي مش واخده حقها للأسف في الدعاية ..
يكفي إنك تكون بعيد عن العالم كله وبتعوم مع مئات الدلافين.

قبل ما تتفرج علي الصور بنرشحلك المكان ده
ملخص رحلة مرسى علم ثلاث أيام ب ٣٠٠ ج في الليلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*