الاسماعليه ليها طابع تانى مختلف عن بقيه مدن مصر وبالذات لما تروح مدينه فايد اللى للأسف ملحقتش أشوفها غير من بعيد
أولا الطريق للأسماعليه
طبعا بما أنى جاى من طريق بورسعيد الإسماعليه مشيت جمب قناه السويسوطبعا كان منظر تحفه .. انك تشوف ماشى جمبك سفينه عملاقه متعدده الطوابق بتتحرك منظر جميل جدا
الحاجه التانيه اللى ممكن تشوفها على الطريق ده هو كوبرى السلام وده كوبرى معلق ضخم جدا بيعدى فوق قناه السويس أتعمل أيام الرئيس مبارك منظر جامد جدا وحاولت أطلع علشان اتفرج عليه بس للأسف مقفول لدواعى أمنيه بس صورته على قد ما أقدر
وأنت داخل البلد ماتنساش تعدى على محطه القطار وتشوف المكان اللى صور فيه أحمد عز فيلم الشبح لما أنضرب بالحنفيه على دماغه
ثانيا تبه الشجره
من وجهه نظرى الشخصيه أن ده أهم مكان ممكن تروحه فى الإسماعليه وأعذرونى لو هاطول فى الكلام عنه لآنه يستاهل أن كل المصريين يعرفوه ويشوفوه وأنا شايفه أنجاز للمصريين لايقل عن الأهرامات..ملخص المكان أن ده كان مركز قياده ست نقط من حصون خط بارليف قدرت القوات المصريه تسطير عليه فى الأيام الأولى من حرب أكتوبر وقرر بعد الحرب الرئيس السادات بتحوليه إلى متحف ليكون شاهد وعلامه على عظمه الجيش المصرى والإنجاز اللى أتعمل فى الوقت ده
أتسمى المكان بتبه الشجره لآن الطيران المصرى لما شافهه خلال الطلعات الجويه شبهه بجذور شجره ومن هنا طلع الأسم ده وكمان اليهود كان مسمينه الأفعى المنطلقه وبصراحه مش عارف ليه وجابوا الأسم ده منين بس أكيد فى سبب مش عايزين نعرفه ربنا ياخدهم ويريحنا منهم بحق الأيام المفترجه دى
تقع تبه الشجره داخل سيناء على بعد 10 كم من مدينة الإسماعلية تتكون من حصنين يضمان (مركز إدارة العمليات – الموقع الإدارى عرض الغنائم – قاعة كبار الزوار – مبنى إدارة الأثر التاريخى – غرفة طبية – سينما – مطعم – مبيت) وقد تم الاستيلاء عليه بالسلاح الأبيض وشهدت معركة باسلة لأبطال القوات المسلحة المصرية أثناء معارك أكتوبر وكمان هتلاقى فيها هياكل معدنيه لدبابات وناقلات جنود ومجموعه من غنائم الحرب زى أسلحه وأجهزه إرسال أستولت عليها قواتنا الباسله أثناء عمليه الأقتحام وهتلاقى فى بانوراما فى المكان بتوضح إزاى تم الإستيلاء على الحصن
كمان هتلاقى هناك نصب تذكارى لأسماء الأبطال والشهداء من جيشنا العظيم اللى ماتوا فى عمليه الأقتحام ولوحه تانيه للابطال من الظباط والجنود اللى عاشوا علشان يحكوا إزاى عمليه الأقتحام تمت (كل تحيه لآبطال الوطن)
الناس اللى شافت فيلم الممر ….الفيلم بالكامل متصور فى نقطه أخت تبه الشجره أسمها رأس العش يعنى لما تروح هناك كانك بتتفرج على فيلم الممر على الواقع وهتشوف فيه الزنازين والخنادق اللى تم تصوير الفيلم فيها أو اللى زيها بالظبط
دلوقتى ممكن تروح تبه الشحره عن طريق معديه نمره سته واللى بالمناسبه فيها نصب جميل جدا وبيقال ان ده المكان اللى أستشهد فيه الفريق عبد المنعم رياض رحمه الله عليه بس لللأسف مقدرتش أروحه لأن المعديه كانت مقفوله لسوء الأحوال الجويه وبالمناسبه تبه الشجره المكان اللى أتخطط فيه لأغتيال الفريق عبد المنعم وممكن برده تروحه عن طريق النفق الجديد وده جميل جدا يعتبر دخوله فسحه لوحده فممكن تروح عن طريق المعديه وترجع من النفق (خدوا بالكوا من جهاز كشف المعادن الحوامل والاطفال ممنوعين من دخوله وكمان أى منتجات ألبان ممنوعه تعدى تحت الجهاز لأنها بتمص الأشعاع)
أخيرا أنا كنت باتمنى أن المكان ده يكون واخد حقه من الأهتمام من الدوله ويتعمل مزار عالمى بس اللى أنا أقدر أعمله أنى أحكيلكم عليه واقولكوا أن المكان هيتحفر فى ذاكره كل واحد يزوره وهتحس فى كل شبر بريح الشهداء والأبطال من جيشنا العظيم اللى نسيوا كل حاجه و افتكروا بس أسم بلدهم قدامهم وضحوا بأرواحهم علشان يحرروه
وتحيه منى للمجند يوسف اللى لف فى أرجاء المكان وشرحه بالتفصيل
وأخر حاجه بحيره التمساح
ودى بقى بحيره فى وسط قناه السويس وهتشوف حوليها شركات تصليح السفن وكمان ممكن تتطلع على الكوبرى الوحيد اللى معدى فيها وتأكل قصب وتدعيلى وتصور هناك مع الغروب منظر جميل جدا
بس بالمناسبه فى أماكن كتير فى الاسماعليه بس مكنش فى وقت وإن شاء الله هبقى أشوفها وأجى احكى عنها ليكوا ومتنسوش تيجبوا مانجه من الإسماعليه ولا تنسوا تروحوا تبه الشجره