تفاصيل السفر لجورجيا بتكلفة ١٢٥٠٠ جنية بس لما تفتح للسفر ان شاء الله
نعمل ايه في أسبوع هناك
العاصمة تبليسي :
اتفرجتو علي أفلام من العصور الوسطي في أوروبا طب بلاش حد لعب Assassin’s creed كأنك ماشي هناك في الحقبة ديه خصوصاً في المدينة القديمة حاجة وهمية 🤷‍♂️ شكل المباني ابراج الكنائس المعمار الشوارع تحفة.
كازبيكي:
الطريق لكازبيكي اللي عملة الروس اثناء حربهم مع تركيا وكان للأمدادت من روسيا لحد جبهة الحرب الطريق علي الجبل غاية في الجمال و الروعة في رحلات يوم واحد بتروح انانوري و جوداوري و كازبيكي 🍃.
بورجومي و باكورياني:
ايه الموضوع ده بعد منخلّص علي تبليسي و كازبيكي ناخد اتوبيس ب ٤٠-٥٠ جنية هيودينا بورجومي المدينة صغيرة جداً فيها بارك تحفة و مياه كبريتية بس الاجمل هو القطر اللي بيوصلك من بورجومي لباكورياني و بياخد ساعتين و نص من الروعة و الخيال القطر بانوراما و قديم جداً و بيمشي بالراحة علشان تتفرج و تستمتع هناك في باكورياني تقدر تعمل تزحلق علي الجليد للمبتدأين في الشتاء. يومين هناك كفاية .
كوتايسي:
بعد كده نطلع علي كوتايسي و هي الأجمل في جورجيا بس في الصيف لأنك لو رحت في الشتاء مش هتشوف حاجة الكانيون الماية اللي فيها هتكون متجمده 🙈😅
في هناك مارتيڤيلي كانيون و اوكاتسي كانيون و بعض الكهوف الخيالية 🙌🏽.
باتومي:
تقع باتومي في اقصي الغرب وعلي الحدود التركية، المدينة علي البحر الاسود، فيها مساجد كتير و اكل تركي اكتر البحر صخري شوية مش أحسن حاجة كبحر بس الڤيو و الجو في المدينة حلو جداً
•••••
التكاليف 👇🏽و التأشيرة
الطيران:
الطيران لجورجيا من ٧٠٠٠-٨٠٠٠ تقريباً
السكن:
انسب حل هوستيل من ٧-١٥ دولار شامل الفطار اللي عاوز خصوصية ياخد غرفة خاصة في الهوستيل بمتوسط ٢٥ دولار
الاكل:
من أكتر الحاجات اللي بتتميز بيها جورجيا هو الأكل اشكال و انواع وطرق مختلفة عن اي أكل أكلناه قبل كده حتي أسامي الاكل زي خينخالي, خشابوري, شيفشتاري, كوبداري وحجات تانية كتير 😂
•••••
أيوه من الاخر كده لو حسبنا التكاليف الاساسية مع شوية أكتيفيتي هنتكلف كام في أسبوع
٨٠٠٠ طيران
١٢٠٠ هوستيل
١٣٠٠ أكل و شرب
٧٠٠ مواصلات و انتقلات بين المدن
١٣٠٠ أكتيفيتي
١٢٥٠٠ توتال أسبوع في جورجيا 💪🏼
•••••
التأشيرة:
السفارة في الدقي بس قبل منروح السفارة هنجز شوية حجات اونلاين
١- تملي الاستمارة من علي الموقع و توقيعها و اعادة تحميلها
٢- ايداع ٢٠ دولار في حساب السفارة في بنك CIB.
٣- تحميل ايصال البنك, تحميل صورة جواز السفر, تحميل حجز مبدأي طيران و فنادق, تحميل صورة شخصية خلفية بيضاء مقاس ٤*٥
٤- كشف حساب آخر ٣ شهور لايقل عن ١٠ الاف جنية.
٥- شهادة التأمين السياحي عن نفس الفترة.
هنحتاج تصريح أمني بعد التأشيرة
•••••
تنبية ⚠️
*** الاسعار قد تختلف من موسم لآخر رجاء مراجعة الاسعار قبل السفر.
*** التكاليف قد تختلف من شخص لآخر علي حسب طريقة السفر المفضلة من أكل و سكن و طريقة المواصلات.
*** التكاليف محسوبة كسفر أقتصادي فردي ليس عائلي !!