اسكندريه في الشتا احلا بكتير دا دليلك ليوم تقضيه ف اسكندريه
بدانا بفطار من جاد علي البحر view وهمي
وبعدها روحنا قصر المنتزة وده أكبر حديقة موجودة في إسكندرية فيها قصر الملك فاروق وشوية قصور جمبها وفيها مرسى يخوت وبحر وجناين كتير تنفع لو عايزين تعملوا حفلات باربيكيو و سعر التيكيت ٢٥ جنيه!
و بعد كده زورنا مكتبة اسكندرية مكان عظمة و جواه أكتر من متحف وهتلاقي جمبها القبة السماوية دي بتعمل عروض كأنك في الفضاء بالظبط .
اللي مشافش متحف المجوهرات فايته كتير جداً المكان ده هيعجب البنات اوي و التذكرة ب ١٠ جنيه .
عندك بقي كوبري إستانلي لو حابب تاخد صورتين حلوين أو تاكل هناك حلبسة
طبعاً لازم تزور قلعة قايتباي خصوصاً إنه أحلي مكان تعمل فيه فوتو سيشن و التيكيت ب ٥ جنيه
:لو حابب تفصل بقي و تلعب إطلع علي ملاهي المعمورة هتتبسط غير إن المعمورة كبيرة ونضيفه وممكن تروح تركب فيها عجل وتلف براحتك هناك كتير
نيجي للغدا بقي
و لو بتجب الجبن السايحة علي طاسات مختلفة عليك و علي ألبان سويسرا أو مطعم طاسة بيعملوا طاسات ب ١٢ نوع جبنة هتدوب في حلاوتهم
لو مدمن كبدة فا طبعاً هتاكل من أشهر واحد في مصر كبدة الفلاح ،بتروح تاكل ١٥ نص رغيف كبدة وتلاقيك لسه جعان من كتر ماهي حلوة وبعدين جمبها تشرب من خروب أمال و تطري علي قلبك
لو جاي في أكله سمك عندك بقي أماكن مختلفة و كله حسب ميزانيتك عندك مطاعم زي إيلع و اللول و قدورة و بلبع و الكتعة و غيرهم كتير و نضمنلك تاكل أكله سمك تحلف بيها
و عشان نحلي بعد الأكل جرينا علي الشيخ وفيق هتروح تطلب واحد رز بلبن بالمكسرات أو بليله بالمكسرات أو أم على بالايس كريم و أتحداك تكون أكلت واحد زيه قبل كده في حياتك
عندك بقي سان ستيفانو وجرين بلازا وكارفور أشهر ٣ مولات لو حابين تعملوا شوبنج و فيه فود كورت و سينمات لو حابين تتفرجوا علي الافلام الجديدة .
لو حابب تتمشي في أوروبا فا هتنزل شارع فؤاد و ده أقدم شوارع اسكندرية هتشوف فيه الفن المعماري القديم وفيه مطاعم كتير حلوة وكتير وتقدر تتصور فيه فوتوسيشن حلوة جداً
مدمنين القهوة تقدروا تروحوا البن البرازيلي أو سوفيانو بولو و ريحتهم هتشدكم من علي بعد كيلو
و هتشربوا أحلي قهوة في حياتكم!

قبل ما تتفرج علي الصور بنرشحلك المكان ده
اماكن خروجات الاسكندرية