قصر عابدين
واحد من القصور الملكية في مصر، وكان قصر الخديوي إسماعيل.
خروجة قصيرة وحلوة في قلب القاهرة ومش هتكلفك اكتر من ٦٠ جنيه
اركب المترو وانزل محطة محمد نجيب واسأل عن بوابة دخول قصر عابدين للجمهور اقطع تذكرة ب٢٠ جنيه للدخول و٥ جنيه للموبايل وهتنبهر بمجموعة من المتاحف جوه القصر ، وهتاخد حبة صور هتفرحك
وكمان هتعجبك القعدة وسط الورد والخضرة في جناين القصر
خلي بالك القصر فاتح من ٩ ل٢ونص كده ماعدا يوم الجمعة روح السبت احسن يوم وهتلاقي جوه مرشدين شغالين في القصر متعاونين جداا بيفرجوك علي المتاحف ويشرحولك ببلاش
سبب تسمية القصر بالإسم ده هو إن صاحبه كان إسمه عابدين بك، وكان أحد القادة الأتراك، والمكان ده كان فيه بيت صغير ملك عابدين.
بعد وفاته إشتراه الخديوي إسماعيل من زوجته، وإشترى الأرض اللي حواليه وبنا عليه القصر ده.
أنا يعتبر ملفتش جوه القصر، بس اللي شوفته فيه خلاني منبهر جداً من المنظر، وإن إزاي الجمال ده كله مش قادرين نشوفه.
ده إسمه “كشك الموسيقى”، وده اللي كان بيتعمل فيه الحفلات الموسيقية، وقدامه بالظبط حمام السباحة.
القصر مليان نقوش كتير وجميلة جداً، ولسه محافظ على المعمار الخاص بيه.
حقيقي كانت تجربة حلوة جداً أقضي يوم في المكان ده، وأتمنى إن كل القصور الملكية تتفتح للناس عشان يشوفوا عظمتها ♥️
تعرف ايضا على
أسرار قصر البارون إمبان
