الجزيرة زانزيبار او زنجبار في تنزانيا – التأشيرة عند الوصول
الطيران علي حسب ميعاد الحجز لو غالي سافر علي دار السلام و اركب عبّارة ⛴ لزنجبار ب ٣٥ دولار
هيا باختصار مجموعه جزر فشرق افريقيا فالمحيط الهندى ولغتها سواحيلى وبيتكلموا انجلش كويس جدا وعملتها شيلنج ( ١$ يساوى ٢٣٠٠ شيلنج يساوى ١٥ جنيه )
مش محتاج ولا تصريح امنى ولا شركه سياحه ولا تحجز ميعاد فالسفاره ولا اتش ار ليتر ولا كل الهرى ده … باسبورك الحلو الفاضى ابو نسر اخضر واول ماهتوصل المطار هتدفع ٥٠$ و تاخد الفيزا ٩٠ يوم و تنطلق بقاااا
بس عشان تسافر بقا لازم اجبارى تاخد تطعيمات( حمى صفراء وحمى شوكيه وانفلونزا و كوليرا ) و ده فمكان من ٣ ( الحجر الصحى المطار القديم .. التطبيقين جنب محطه قطار الجيزه .. المصل واللقاحً مصر الجديده ) وبتعدى علًى
الصيدليه تشترى اقراص ملاريا
وتبدا بقا تدخل على مرحله الوحش وتحجز تذكره الطيران ( ارخصهم دايما الطيران الاثيوبى ) القاهره اثيوبيا زانزيبار او القاهره اثيوبيا دار السلامً ( تنرانيا ) ومن هناك تاخد مركب ب ٣٥$ ساعتين وهتوصل زانزيبار
وانت بتحجز فندقك كمان خليك عارف انى الجزيره دى متقسمه لشواطى كتيره افضلهم عن تجربه nungewi beach حوالى ١٥ كيلو ومش هتقدر تخلصه و ده شاطىء عام مبتدفعلهوش فلوس ومنه ممكن توصل لشاطى حلو جدا اسمه kendwa beach
حظى كان حلو جدا انى حجزت فندق اسمه Pascha nungewi دقيقه بالظبط مشى من الشاطىء وكان حلو جدا فكل حاجه و جنبه كمان فيه فندق فظيع جدا اسمه makofi beach دول بصراحهً لو لاقيت فيهم امكانيه متفكرش و احجز على طول .. انا كمان معايا ارقامهم فاللى يحتاج يحجز يقولى وانا اساعده
كمان كنت محظوظ انى معايا رقم ولد معاه عربيته شغال بيها تاكسى لفيت معاه فاماكن كتيره جدا فالجزيره و طبعا ساعدنى انى اروح من المطار للفندق ( ساعه ونص )
زانزيبار مكان مناسب جدا لشهر عسل و لناس بتحب الهدوء و لناس بتحب تفصل عن كل الدنيا وبتحب تسافر لوحدها وكمان الحمدلله مفهاش كورونا لغايه دلوقتى وهاكوناً متاتا ^^
فيه حاجات كتير ممكن تعملها فالجزيره دى زى الكروز عشان تشوف الغروب و فيه كمان ال spice market وفيه كمان ال prison island و طبعا جزيره بمباًً و سيتى تور فى ستون تاون واللى فيها تقدر تعمل شوبنج كويس بس طبعا لازم تفاصل فيها فصال مصريين
لو عندك وقت و عرفت تحجز بردو فندق فجزء تانى الجزيره kiwengwa beach اسمه هتتبسط بردو جدا
من احلى الحاجات فالجزيره انها رخيصه جدا يعنى انا دخلت فندق ماكوفى اتعشيت فاوبن بوفيه كويس جدا جدا ب ١٠$ و رحت احسن مطعم فالمدينه وكان مطعم هنذى فستون تاون اتغديت ب ١٣$ فبصراحه البلد مناسبه جدا لاى حد نفسه يسافر ويغير جو برره مصر
اللى يسافر بس اهم حاجه ياخد معاه sun block لانى الشمس هتحرقك