لبنان
لما فكرت اسافر لبنان سالت هنا علي الجروب و بصراحه مكنتش متخيل الاستجابه و الاستفادة اللي تيجي من خبرات بعض
شكرا لكل اللي ساعد
باختصار هكتب تجربتنا في لبنان
»المعاد : اخر شهر ١٢ و بدايه السنه الجديده(راس السنه)
»الفندق :بيروت منطقه الحمرا من بوكينج و براحتك و علي حسب الميزانيه كنا حاجزين بالفطار ، قريب من كل حاجه و بليل تقدر تتحرك و تسهر.
»الطيران :حجزنا طيران الشرق الأوسط MEA كان ارخص من مصر للطيران من علي sky scanner و علي الموقع كان ارخص من الشركات
»الڤيزا: من المطار و مشافش الفلوس ( و كان في طابور طويل محدش اترفض واللي كان مش معاه المبلغ 2000$ كان بيقول للظابط معايا كروت )
»التحرك من المطار للفندق : كان في حد كتب علي تجربه Allo taxi جربناها و كانت ب 20$ (في العوده اتفقنا مع تاكسي ب 10$)
»العمله :1 دولار ب 1500ليره
و ممكن تتعامل بالعملتين في نفس عمليه الشراء
»»»المعالم السياحيه :
المعالم السياحيه الاساسيه تتلم في ٣ ايام لو قاعد زياده ممكن تشوف أماكن تاني
يوم ١: كنا قرينا حد كاتب عن الست لينا (لولو تورز) هي بتعمل رحلات كل سبت و احد وبيكون برنامج جميل جدا جدا و فعلا يبهج الواحد و التكلفه اقل من لو هتطلع لوحدك ، كان حظنا أن الرحله لمنطقه الشوف و ملتقي النهرين (دير القمر -قلعه موسي -بيت الدين) و كمان روحنا صيدا و سيده مغدوشه
و كان سعر الانتقالات 10$للفرد و اللي عايز غدا متاح، سعره مميز جدا و كمان الست لينا كانت بتجيب اسعار مخفضه للجروب في المزارات “من الاخر لازم تجرب رحله لولو تورز “
يوم ٢ : جعيتا (المغاره العليا فقط عشان منسوب المياه كان عالي ف السفلي مغلقه 7$ للفرد )
حريصا التلفريك ذهاب اياب 7.3$ للفرد
و بعدين بيبلس “جبيل” و دي حاول تقعد فيها وقت مش اقل من ٤ ساعات جميله فعلا
و مارشيربل
تاكسي مخصوص
يوم ٣ : كنا متفقين مع جروب اسكندراني رحله الي فرايا
التلج و التزحلق، اليوم فعلا يستحق الفلوس اللي تدفع فيه
بتوصل الي فريا في شركات يتاجر منها لبس ب 30 $ أو تكون لابس تقيل ، و تأجر ادوات التزلج أو ال skydoo من 30-60$ حسب الوقت اللي تحبه و الشركه
بعد ماتتزلج و تخلص و تنزل من علي الجبل في حد بيعمل مناقيش تحفه اسمه ابو ارتين لازم تجربه
في شركات سياحه في الحمرا بتطلع رحلات ل فرايا ب 25$ انتقالات فقط
يوم ٤ : down town -ميدان النجمه -ميدان الشهداء- جامع محمد الامين – شارع الجميزه – شارع مار ميخائيل – الروشه -الكورنيش- شارع الحمرا ( و طبعا ممكن تنزلهم بليل بعد ما ترجع من الايام السابقه)
»رحلات اضافيه
*غابات الارز (ظروف الجو منعت المواصلات من الوصول إليها)
*تنوربن العليا و السفلي – بالوع بالعا – سيده القرن مغاره و شلال افقا
*طرابلس
*صور
*بعلبك
»»»Shopping
مبدأيا انسي التوكيلات عشان فرق العمله و التضخم هناك صعب
سوق الكولا
برج حمود
ولازم لازم El Dorado shopping center موجود في حتت كتير (الحمرا – الكولا)
Brands for less
»»»الاكل
ممكن تاكل ب دولار و ممكن ب عشرين و خمسين
انت اللي تختار
بربر و غيلياني في الحمرا (مناقيش و مشاوي)
سندوتش و نص – ملك الطاووق بالحمرا أو اي فرع تاني
بربر الكورنيش
امل بحصلي – قصر الحلويات الحلاب
و اي شاورما حلوه عندهم
»»»المواصلات و الانتقالات
العربيه ب نمر حمرا سرفيس ب ٢٠٠٠ ليره للفرد داخل بيروت
اوبر و الو تاكسي من و الي المطار و ابقي شوف سعرهم عشان تعرف متوسط السعر
تتعرف علي حد يعدي عليك و تقضوا اليوم