مبدأيا كده البلد دي بتشدك حرفيا ليها بكل تفاصيلها الوانها بحرها جوها اهلها روحها وانت ع البحر هتحس بجمال وراحه مش طبيعيه انا حضرت شروق كتير بس من اجمل المناظر اللي شفتها للشروق ع البحر هناك هحطلكو صور من غير اي ايديت الصور بتنطق لوحدها
وانت بتتمشي ف الممشي هتلاقي كل الطبقات والجنسيات كل واحد ف حاله الكل بيحترم التاني بغض النظر هو بيعمل ايه مدام مش بيضرك.. مجتمع اتجمع علي حاجه واحده بس هي حب وعشق البلد دي ?
مبدايا كده انا كنت عايزه اروح ف العيد والاسعار زادت فقعد ادور علي ارخص عرض موجود خصوصا اني مش فارق معايا الفندق يبقا واو ولا الاوبشنز الكتير اللي بتبقا ف الفنادق وده لان حلاوه دهب ف بساطتها مكان تنام فيه يبقا نضيف وخلصت ووفر فلوس اللي هتدفعها ف خدمات مش مهمه للفسح والخروج وانك تبسط بكل دقيقه هناك
سمعت عن كامبات كتير وكنت مقلقه من فكره الكامب لحد ما مافيه حد رشحلي كامب طلع بالصدفه هو تفس الكامب اللي الشركه اللي صحابي طالعين فيها بتتعامل معاه وبتسكن فيه فقولت تمام واتوكلت ع الله وروحت حجزت وهناك ارتحت اكتر من حسن استقبال الناس هناك واحترامهم..
الرحله كانت شامله الاقامه ف الكامب بالفطار و 3 رحلات للبلوهول والثري بولز وجبل الطويلات
اول يوم روحنا استلمنا الغرف زي ماقولت مش هتحتاج اكتر من سرير و دولاب وتكيف وميني بار الاوضه كانت نضيفه وتكيف شغال وكله تمام حطينا الحاجه و طلعنا علي الشاطيء العام او البيبي فيش وده الشاطىء الرملي الوحيد ف دهب وبعده يجيه شاطي البلولاجون وده تبع نوبيع
بليل روحنا حفله جبل الطويلات ودي حفله بيبقا فيها كذا فقره منها الفاير شو ودي مبهره جدا بحبها ??وفقره التنوره واخر فقره اغاني البدويه الجميله جدا الممتعه اللي تلاقي كل الشباب هناك حافظينها وبيغنوها من كتىر مابيجو دهب وف الاخر بيشغل اغاني بقا شعبي وحركات.. جو مختلف ?
تاني يوم روحنا الثري بولز وده مكان بنعمل فيه سنوركلينج ومن هناك بتطلع رحلات البيتش باجي لوادي جني وده مكان جميل جدا وسط الوادي هتلاقي النخل طالع سبحان الله بتقعد هناك تشرب شاي بالحبق جميل جدا رغم ان مش بشرب شاي بس طعمه حلو وتستريح شويه وتطلع الوادي تاخد صور من فوق خيال وتنزل تركب البيتش باجي وترجع.. بليل بقا براحتك احنا كنا بنتمشي ف الممشي نقعد علي كافيه ع البحر ممكن تركب عجل
ثالث يوم روحنا البلوهول وده مكان بتعمل فيه سنوركلينج بتاجر هناك لايف جاكت والماسك وهناك الشعب جميله جدا وعالم تاني تحت الميه فعلا
من البلوهول ركبنا لانش ف الميه عشان نوصل لابوجالوم ورحله الانش دي متعه لواحدها بنوصل ابوجالوم ودي محميه طبيعيه بنعمل فيها سنوركلينج بردو ومن هناك ركبنا عربيه عشان نروح البلو لاجون ❤️❤️❤️❤️ عن جمال الميه هناك ولونها اللبني الفاتح العوم فيها جميل وامان مفيش موج وده الشاطي الرملي اللي قولت عليه ف الاول وف ناس بتعمل تخيم هناك ف عشش ع البحر حقيقي مكان ساحر
رابع يوم كانت رحله باليخت بنتحرك من المارينا الساعه 5 بتركب يخت وبنقف ف منطقه معينه واللي عايز ينزل الميه بينزل حوالي ساعه ونص ساعتين وبعدين بتطلع تغير هدومك و تتعشي منظر الاكل وهو بيتشوي والميه قدامك مود تاني خالص الرحله دي كانت شامله الغدا والمشروبات اوبن بوفيه حاجه سقعه شاي نسكافيه ورجعنا من رحله اليخت طلعنا الجبل مكان اسمه وادي ستار وده كان اول مره اسمع عنه بتبقا قعده كده وف النص النار مولعه عشان تنور المكان واغاني بدويه بعد شويه دنيا هديت فالمشرف اللي معانا قالنا هنطلع جبل اللي عايز يطلع فقولنا يلا طلوع كان صعب وبتعدي علي مدقات ضيقه جدا وبتطلع سلالم وقصه كبيره ? كانت ممتعه وجديده والجروب كان متعاون جدا والمشرف كان اول حاجه حريص عليها هي سلامتنا طالعين طبعا بالكشافات واول ما طلعنا طفينا الكشافات وقعدنا الله علي الهدوء والسلام وانت باصص للسما والقمر منور حاجه خيال ❤️❤️ قعدنا بتاع ساعه ونص فوق وبعدين نزلنا والنزول اصعب من الطلوع ?? بس تستاهل جدا
وده كان البرنامج واتبسطت جدا جدا اولا من التنظيم انا لما روحت قبل كده مكنش فيه تنظيم ولا الامان ده رغم اني كنت طالعه فندق حظنا طلع كويس ان كان معانا شيبو حد جدع جدا محترم جدا امانك وسلامتك اولا مقصرش ف حاجه تاتي يوم عمل حفله شوي ف الكامب ووقف يشوي بنفسه للكامب كله ومخلاش حد يساعده وتعب جدا بس كان بيعمل ده بحب
اول مابتروح اي مكان بيشرحلك قبل ماتنزل المكان ازاي تلبس الماسك ازاي تتنفس تحت الميه ازاي تحمي نفسك من الشعب وتحميها هي كمان لان دي ثروه مهمه جدااا لما نزلنا البلوهول كان معانا كلنا ماسكين ف بعض ماشين line واحد وهو ماسك ف رنج وشاددنا بيه وانت مستمتع لانك ف امان بتتفرج وبتعوم وانت مش خايف
واحنا ف الكانيون ستار كان مخلي حد قدام نمشي وراه والبنات قدام والشباب ورا عشان يطمن علي كل اللي معاه
لو الرحله كانت تحفه فعشان هو اللي سهل ونظم كل حاجه خلانا مبسوطين ومستمتعين فبجد بشكره جدا ونفيش حد راجع من الجروب الاوعايز يروح تاني عشانه
ولو حد تعب حصله مشكله كان ع اتم استعداد يوديه مستشفي يطمن عليه فبجد انا بشكره جدا جدا
نيجي للممشي بقا والاكل والكافيهات والحاجات اللي بحبها ? دي
اولا كان ف ناس بتقول ع مطعم يم يم وده مطعم فول وطعميه للاسف مش حلو خالص منصحش حد يجربه
ف مطاعم بيتزا زي بشيكها ده قبل يلا بار بشويه يعني شغاله بس بلاش السوسيس وجربنا فطيره السكر باللبن كانت حلوه جدا
ف مطعم اسمه ابوزيد حنب غزاله ماركت بتاع كريب جامد جدا جربوه وعجينه طريه ونضيف
بالنسبه للحلويات ف مكان إسمه قشطه وعسل اخر الممشي اسال عليه عنده اختراعات بقا تشيزكيك اناناس وتراميسو وكيك بالتفاح والقرفه و كيك الاوريو جربوا ?
تيجي للمكان اللي لازم تروحوه عشان فظيييع German bakery احلي فطار ممكن تاكله وهمي جدا طلبنا فطار طبق واحد وشير انا واختي وخدنا باقي تيك اواي عباره عن اومليت ولانشون و قطعه سلامي وتركي مدخن وجبنه شيدر و بطرمان صغير مربي كريز و زبده و نوتيلا وبينزل معاه عيش ومشروب نسكافيه او شاي وجبت معاهم كرواسون بالزبده والنوتيلا رهييب وعنده حاجات تانيه مخبوزات حادقه بيعملو عجينتها بالجبنه غير الحشوه ف جربوه مش هتندمو وبيفتح من 7 الصبح واغلب الاجانب بيفطرو عنده
وفيه مطعم كينج تشيكن احلي اكل تاكله ويشبعك ويعجبك بس خليك ف الفراخ بلاش لحمه بتطلب الربع فرخه بينزل معاها رز وسلطه وشوربه وخضار وكميات حلوه يعني السنه ال فاتت مكنتش باكل غير عنده تقريبا ?
بالنسبه للكافيهات اللي ع البحر فيه كتير جدا وكل واحد ديكور مختلف وأغلبهم فيهم مراجيح بس مخبتش ايفري داي عشان زحمه طول الوقت وفيه كذا كافيه بيقو عندهم باند يوميا
اللي قعدت فيهم كان الفيروز وده قعدته حلوه اوي ورايقه وبيشغل فيروز ع طول او موسيقي
وقعدت ف dahabian house وده منك للبحر كده ع طول ف كان جميل وتحفه
نصيحه بلاش تاكل من كافيهات ع البحر يعني خليك ف المشروبات هتعجبك وده عن رايي كذا حد
بالنسبه للسمك انا مجربتش بس هناك قالولي عروس البحر حلو وعلي بابا حلو بس يعتبر اغلي واحد ف دهب وفيه نيمو والفنار بردو