كل اللي محتاجه علشان تخطط رحلتك في دهب (الجزء الاول )

اي حد بيحب السفر يا اما راح دهب او نفسه يروح دهب فالكلام ده كده لكل الناس اللي بتحب السفر
اولا كده مصر من البلاد اللي كل مكان فيه بطبيعة مختلفة عن التاني .. يعني من الاخر بلاش نقارن دهب باي مكان تاني ( شرم او الغردقه او نويبع …)✋✋
ثاني حاجه دهب مكان بسيط جدا ال nightlife فيه قليل … اسعار دهب عاديه مش سياحية الجو العام هادي الفنادق في المجمل بسيطه و مش كبيره
فبرده من الاخر دهب للاستجمام او للأنشطة زي الغطس ( من اروع الاماكن للغطس )

ازاي بقا تعمل رحله تناسبك في دهب :
اي رحله عباره عن 4 حاجات
1 الانتقالات (من و الى المكان )
2 الاقامه (فنادق شقق كامبات )???
3 أنشطة ( غطس -سافاري -يخت – سنوركلينج…)
4 مواصلات داخليه ( جوه المكان)

البوست ده علشان يوضح لك ازاي تظبط ال 4 دول

اولا الانتقالات :

فيه 3 اختيارات قدامك بناء على حاجتين مهمين
1 السعر
2 مده الاقامه

لو هسافر من اسكندريه
قدامك اول حاجه gobus >>> و ده الذهاب و العودة هتعمل 630 تاني حاجه blue bus >>> و ده اريح اكتر و عدد كراسي اقل في الاتوبيس بس هيعمل ذهاب و عودة 870 تالت حاجه شركات اتوبيسات السياحة >>> و ده هتعمل ذهاب و عودة 450 بس لازم تكون رحلتك 3 ليالي بس

طيب لو مسافر من القاهرة :
برده قدامك نفس ال3 حاجات اول حاجه gobus >>> و ده الذهاب و العودة هعمل 530 تاني حاجه blue bus >>> و ده اريح اكتر و عدد كراسي اقل بس هيعمل ذهاب و عوده 920 ( علشان من القاهره مفيش غير بيزنس) تالت حاجه شركات اتوبيسات السياحة >>> و ده هتعمل ذهاب و عودة 400 بس لازم تكون رحلتك 3 ليالي بس

طيب رايي ايه :
لو رحلتكم 3 ليالي اطلعو اطلعو مع شركه سياحه (انتقالات فقط) بس تكون شركة سمعتها كويسه .. اما لو اكتر من 3 ليالي خليكو في الـ go bus

تاني حاجه بقى الإقامة
عندكم 3 انواع حاجات ممكن تقعدو فيها في دهب
1 فنادق
2 كامبات
3 شقق

يلا نتكلم علي الفنادق علشان الاغلبيه بتحب تقعد فيها

في دهب الفنادق بسيطه يعني اغلب الفنادق 3 نجوم ونجمتين بس في الاغلب بيبقى الفندق نظيف جدا
اما فنادق 4 و 5 نجوم فيتعدو علي الصوابع
فنادق 5 نجوم في حدود 2000 double room /night
Le Meridien Dahab Resort
فنادق 4 نجوم في حدود 1200/1700 double room/night
Swiss Inn Resort Dahab
Jaz Dahabeya
Tirana Dahab Resort
Ecotel Dahab Bay View Resort
Dahab resort
و فنادق 3 نجوم : علي سبيل الذكر مش الحصر 800/1200 double room/night
Happy life
Tropitel oasis
Daniela
Negma dahab
Shams hotel
Dahab paradise
Ganet sinai
فيه بقى فنادق الممشى اللي فيه ناس كتير بتحبها علشان قريبه من كل المطاعم و الكافيهات و night life من 400/900 double room / night
Diarna hotel
Oricana
Nesema hotel
Dahab holiday
Roketa
Larine

نيجي بقي علي الكامبات

السعر في اليوم بيبدا من 90 جنيه الي 150 جنيه و ديه انصح بيها الناس اللي بتسافر Low Cost و هنا
هرشح:
-كامب Charlie house dahab و ده خيام شبابيه
-كامب Fighting kangaroo camp و ليه اسم تاني و هو Oasis
الاتنين جنب بعض قريبين من الممشي بالظبط 3 دقائق تمشيه من عند مطعم علي بابا.
و طبعا الكامب الغني عن التعريف
Seven heaven ⁦♥️⁩?
كمان ممكن تخيم في أبو جالوم ( جربت كامب لواحد اسمه طارق من اسكندريه … كانت تجربه حلوه جدا)??

اخر حاجه الشقق
الشقه كلها من 250 /400 على حسب السيزون و الشقة
بس في الاغلب بتكون اوضتين و مكيفة .. و الاغلب بيكون شايف البحر .. يعني لو لك مزاج تشوي و الكلام الحلو ده يبقي ده انسب اختيار?
كمان ممكن تأخر فيلا ببيسين برايفت ده هتكون غاليه شويه في حدود 1500 في الليله بس تجربه متتعوضش

نصيحتي
لو عايزين حاجه low cost >>> الشقق تجربه حلوه و علي قد الايد ومش متعبه
أما لو عايزين فندق في الممشى عندكم oricana او nessma >>> دول احسن اللي دخلتهم من حيث النضافه
اما بقا لو عايزين فنادق مميزة اكتر تعالو اقولكم شويه فنادق و ايه يميزها :
فندق زي Daniela >>> من احب الفنادق على قلبي : بعيد عن الممشي بس ده مخليه فيه خصوصيه بشكل حلو .
الفندق كله 40 اوضه كلهم على البحر . بحر الفندق صخري و مليان شغب و ينفع للغطس كمان
فندق تاني زي tirana >>> شطه رملي و ده قليل جدا في دهب و كمان فيه خدمات كتير زي جيم و بار و بيسين كبير و مطعم حلو جدا يعني ينفع للعائلات
فندق happy life >>> فندق في قلب ال3poles و فيه اكوا بارك
و لو honey moon >>> جربو الفيلا في دهب ب private pool مفيش حد معجبتوش
كده اول جزء من مقال دهب خلص لو حد عنده تجربه في فندق او طريقه مواصلات متكلمتش عندها ممكن يقولي و نستفاد من بعض .

شاهد ايضا الموضوع ده
دهب مكان مفيش زيه في العالم