دليل زيارة الأهرامات نصائح قبل ما تروح

دليل زيارة الأهرامات نصائح قبل ما تروح

أهم نصائح قبل ما تروح الأهرامات و اهم حاجات عشان نروح ونقضى يوم وننبسط فى مكان من اجمل الاماكن فى ام الدنيا
١- خد ميه معاك وعصيير وسناك بسيط والكاب والصن بلوك فى شنطه ظهرك
٢ لو رايح بعربيتك هتلاقى ناس كتير على اول الرمايه بتقولك وبترمى نفسها على العربيه ان الدخول بالعربيه ممنوع اول مره من كام سنه صدقناهم لانهم مقنعين كدا واتدبسنا بكرتات قالولنا مبلغ صغير فى الاول وفى اخر اللفه طالبونا بمبلغ مريب جابلنا صدمه عصبيه وقتها وبعدها عرفنا انهم بيكدبوا ومسموح دخول العربيات عاادى فامهما حاولوا يوقفواك اقفل ازاز عربيتك واجرى يامجدى
٣- يستحسن ماتروحش بشنط سفر فى عربيتك اليوم ده لان النظام الجديد انك بتنزل كل شنطتك من العربيه وبتمشى بيها مسافه لحد البوابه وبتتحط على اجهزه تفتيش وبتاخدها وبترجع بيها تانى لعربيتك وده مجهود فناخد بالنا
٤- وقت الزياره
الأهرامات بتفتح من الساعة 9 لحد الساعة 4 مساءً ودايما بتكون حر فحاولوا روحوا بدرى خالص قبل مالشمس تسخن وتزعلك
٥- سعر التيكت
سعر التيكت لكل اخواتنا العرب زى المصريين ٦٠ جنية و للطلاب ب ٣٠ جنية و سعر تذكرة العربية 5 جنيه للعربيه
٦-اللبس
نلبس لبس خفيف وطبعا نظاره الشمس والكاب ولو صيف الصن بلوك وشوز رياضي وكوتشىبالنسبه للبنات ممنوع منعا بتا الجزم العاليه اسمعوا منى هاتندموا
٧-افضل مكان للتصوير:
طبعا منطقه البانوراما ده بتجيب التلات اهرامات الكبار والاتنين الصغيرين وده بنروحها يا بالكرته او الحصان او الجمل يااما بعربيتنا عادى
٨- قولتلك متنساش المياه وعصاير وسندوتشات والكاب والصن بلوك لو هاتقعد وقت طويل
لان جوه لو لقيت مشاريب مع الحر هتلاقى سعرها اغلى بكتير
٩- المرشد السياحي في الأهرامات:
لو محتاج اتفق معاه على السعر قبل ماتتحركوا عشان ودانك ماتوجعكش من المبلغ اللى هاتسمعه من غير اتفاق
١٠- تجربه ركوب الجمل والحصان
تجربه لذيذه بس لو معاك عربيه مش هاتحتاجها لو حبيتوا بقى تجربوا فاصلوا من هنا للسنه الجايه يقول ٢٠٠ جنيه قوله مفيش غير ٣٠ جنيه هايقولك اتفضل ااباشا
ركزوا جدا فى اتفاقكم على السعر قبل ماتركبوا ولو مثلا نزلك من الكرتا وقالك اصورك جمب الجمل وانت واقف ماترضاش لان بعد مايصورك صاحب الجمل هايجى يبلطج عليك وعايز فلوس
١١- الناس السخيفه ونركز اوى مع بعض فى النقطه ده
من اكتر الحاجات السخيفه اللى بتقابلنا وبتضايقنا ان كل سم حد يطلعلك من تحت الارض ويقولك اصورك اباشا او لو شافك بتصور حد يقولك لا ياباشا مش كدا هات اصورهالك صح واجيبلك وانت بتاكل وبتبوس وبتحضن ابو الهولوكانه بيقدم مساعده مجانيه
بمجرد مابيصور يقولك هات ياعم اجيب ايه يرد بكل ثقه هات اباشا حق تصويرى ليك تقوله بعفويه هو انا طلبت منك تصورنى مش انت اللى اتطوعت وقولت تصورنى
يرد بثقه اكتر ويقولك هو فيه حاجه ببلاش دلوقتى اباشا وكل سنه وانت طيب وقتها بتتعلم ان مافيش حاجه فى الدنيا ببلاش وبتتدفع زى الباشا فالاحسن تعمل اطرش مع كل واحد بيقرب منك ويقولك اصورك يابيه
١٢- أبو الهول
قبل بوابه الخروج على طول هتلاقى منظر ابو الهول انزل خدلك صوره بسرعه وخلى عربيتك على جمب لانهم بيدوا مخالفات فخلوا بالكم
١٣-لو حد ضايقكم شرطه السياحه هتلاقوها فى كل حته روح اشتكى وعلى صوتك وماتسيبش حقك
١٤- تجربه زياره الاهرامات من اجمل الزيارات اللى هاتعملها فى حياتك هاتنبهر قدام عظمه البناء الاسطورى والخرافى كل مره بروح بنبسط وبنبهر كانها اول مره ومستغربه ازى فيه مصرييين لسه مافكروش طول عمرهم يشوفوا المكان العريق ده روحوا الاهرامات ياجماعه هاتنبسطوا اوى

افضل اماكن الفسحه والخروج في اهرامات الجيزة

الفطار فى حضن الاهرامات وابو الهول افضل مطاعم فى الجيزة

أسباب تخليك تزور المتحف المصري بالتحرير

دليل زيارة الأهرامات نصائح قبل ما تروح

وسم :

Leave a Reply

Your email address will not be published.