برنامج سياحي في القاهرة لمدة اسبوع بأقل التكاليف

برنامج سياحي في القاهرة لمدة اسبوع بأقل التكاليف
احسن برنامج سياحي لمدة اسبوع بأقل التكاليف في القاهرة
دليل كامل لزيارة القاهرة – مصر
لو بتفكر تزور مصر الفترة الجاية ده برنامج ل7 ايام ممكن تعمل فيهم ايه في القاهرة
مساء الفل لما ببقى مسافرة بفضل اذاكر البلد وادور واعمل برنامج قبل ما اسافر ولما بسافر بلاقي الدنيا مش بتمشي دايما 100% زي ما كنت راسماها عشان كده قولت اعمل برنامج لو هتزور مصر كام يوم ممكن تعمل فيهم ايه وهراعي في البرنامج ده ان الاماكن اللي هتزورها تبقى قريبة من بعض عشان وقتك خاصة ان الدنيا في مصر زحمة جدا ووقت كتير ممكن يضيع في الطريق للمكان اللي انت عايزة
بسم الله نبدأ هقولك الايام وانت رتبها بعد كده زي ما تحب يعني ممكن تبتدي باليوم التالت وبعدها الخامس وترجع للاول براحتك

اليوم الاول:

– القاهرة الفاطمية ( قاهرة المعز او القاهرة القديمة)
ممكن تروح على شارع الازهر، وكالة الغوري،، الصاغة، شارع المعز اللي عمره اكتر من الف سنة واللي هتشوف فيه اثار كتير اسلامية جوامع ومدارس بس خلي بالك ان اخر الاثار اللي في شارع المعز لحد الساعة خمسه بس عشان تقدر تدخل ماعادا كام جامع زي جامع الحاكم بأمر الله ده مفتوح في الخمس صلوات ، طبعا وانت في اول المعز تقدر تدخل خان الخليلي وتشتري الهدايا اللي تعجبك ، تروح بيت السحيمي وممكن تختم اليوم على قهوة من قهاوي الحسين (طبعا السهر في رمضان يجنن في المكان ده)، في مطاعم كتير هناك من اشهرها فرحات ده لو بتحب اللحمة المشوية والحمام، كمان في المالكي للرز بلبن والبليلة والحلويات.

– اليوم التاني بمنطقة الجيزة

ابدأ اليوم ده بركوب الاتوبيس النهري من قدام منطقة ماسبيرو في التحرير لمده عشرين دقيقة هتوصل لقدام جنينة الحيوانات والتذكرة ب 3 ج تقريبا للاتوبيس النهري ، ادخل جنينة الحيوانات وسعر تذكرتها 5 جنية وامامها هتلاقي حديقة الاورمان التذكرة ب2ج اللي بيتعمل فيها معرض الزهور فترة الربيع يعني طول شهرابريل، ممكن بعد كده تروح قصر الامير محمد علي بالمنيل تقدر مواعيد الزيارة من تسعه صباحا لخمسه سعر التذكرة للمصريين والعرب 20ج والتصوير 50ج
بعد كده تقدر تركب لكوبري قصر النيل وتتصور مع الاسدين وبعدها دار الاوبر وممكن تقعد في الجنينة بتاعتها وممكن تعرف مواعيد الحفلات في دار الاوبرا وتحضرها ، بعدها ممكن تزور برج القاهرة وتتفرج على القاهرى كلها من فوق وفي مطعم هناك ممكن تاكل فيه بس الاكل مش احسن حاجة هناك بس المنظر من فوق يجنن كمان ممكن تزور قصر عائشه فهمي بالزمالك والدخول مجانا متاح حتى 27 ابريل

اليوم التالت وسط البلد

– ممكن تبدأ يومك بزيارة مجمع الاديان والكنيسة المعلقة والمتحف القبطي في منطقة مصر القديمة (اقرب محطة مترو مار جرجس) بعدها خد المترو لحد السيدة زينب زور مسجد السيدة زينب وبعدها اركب عربية توديك عند مسجد احمد ابن طولون بعدها اطلع على قلعة صلاح الدين الايوبي ( سعر تذكرة الدخول 20 للمصريين و 100 للاجانب ) وجامع الرفاعي بعدها ممكن تروح تقضي باقي اليوم في حديقة الازهر بارك سعر التذكرة بيبدأ من 10-15ج على حسب اليوم اللي هتروح فيه وممكن بعدها لو تحب تزور مسجد السيدة عائشة وقريب منه مسجد السيدة نفيسة

اليوم الرابع : اهرامات الجيزة

– طبعا محتاج تنزل من الصبح قبل الحر عشان تعرف تستمتع بالاهرامات وركوب الخيل والجمال دخول هرم خوفو 200 للاجانب الدخول من 8ص لحد 5م الدخول لهرم خفرع سعر التذكرة 40ج والدخول لهرم منقرع 40ج وطبعا زيارة تمثال ابو الهول ، ممكن تلحق تزور القرية الفرعونية بالبحرالاعظم واللي سعر التذكرة فيها مختلف على حسب البرنامج بيبدأ من 100ج والمواعيد من 9ص حتى 7م في الصيف
– او تطلع على بركة الملك فاروق اللي بيبعد ساعة تقريبا عن الجيزة وفيه هتشوف اهرامات تانية زي الهرم الاحمر والهرم المنحني والهرم الاسود وبركة الملك فاروق اللي كان بيصطاد عندها الطيور مكان ساحر وينفع يتعمل فيه داي يوز بس لازم تاخد اكل وماء معاك عشان مافيش خدمات ويستحسن ما تتأخرش هناك وطبعا الافضل يتراح كمجموعة

اليوم الخامس : جوله ترفيهية والعاب للاطفال

لو معاك اطفال ممكن تاخدهم كيدزانيا يقضوا اليوم هناك وبعدها ممكن تطلع بقى على كايرو فستيفال ، الداون تاون وشارع التسعين اللي هتحس فيه انك في دبي مش القاهرة كله كافيهات ومطاعم
اختيار تاني : ممكن تروح دريم بارك في سته اكتوبر وهنا انت والاطفال ممكن تلعبوا طول اليوم في الملاهي وهتستمتعوا جدا من عشره صباحا لحد 8م وفي الصيف بتفتح لوقت متأخر عن كده سعر التذكرة بيبدأ من 130ج وبتختلف على حسب الفئة اللي مختارها وكم الالعاب اللي هتلعبها بعدها ممكن تطلع على مول العرب او مول مصر في سته اكتوبر تتمشى وتعمل شوبينج وتاكل وتلعب بردو :Dاو تتزحلق على الجليد في سكيب ماكس اكبر صالة تزحلق في مصر في مول سيتي سكيب سته اكتوبر الاسعار بتبدأ من 30ج

اليوم السادس : محمية وادي دجلة بالمعادي

– محمية طبيعية بمنطقة المعادي ممكن تركب المترو وتنزل محطة المعادي وبعدها تاخد ميكروباص لاقرب منطقة او اوبر هناك ممكن تعمل تخييم، باربكيو، ركوب دراجات وصعوب جبال وطبعا الاستمتاع بالطبيعة الرائعة ووجود حيوانات ونباتات مختلفة هناك بعدها ممكن تنزل على شارع تسعه في المعادي اللي مليان مطاعم وبعدها تاخد راحة على النيل في جزيرة المعادي الدخول فيها ب 20 ج كلها حدائق على النيل وفيها مطاعم لان ممنوع دخول المأكولات ومكان عظيم للصور
– او ممكن تروح اي من الاماكن على كورنيش المعادي زي مثلا ذا بلاتفورم كافيهات كلها على النيل

اليوم السابع ميدان التحرير وقصر عابدين

بالمترو ممكن توصل لميدان التحرير وزورالمتحف المصري بعدها اتمشى في شارع محمد محمود لحد ما توصل لقصرعابدين وادخل المتاحف بتاعته لان القصر غير متاح للجمهور حاليا بعدها ممكن تاخد جوله تمشية في شوارع وسط البلد شارع سته وعشرين يوليو، سليمان باشا، طلعت حرب، عماد الدين، وممكن تقعد على قهوة من قهاوي التوفيقية وماتنساش تاكل ايس كريم من قويدر او العبد كمان ممكن تجرب حلويات ايتوال ، في وسط البلد محلات ملابس واحذية كتير باسعار متوسطه بعد كده ممكن تطلع على الزمالك شارع ابو الفدا على النيل هتلاقي كافيهات ومطاعم كتير ممكن تقعد قعده حلوة على النيل وممكن تروح ساقية الصاوي في الزمالك بيقدموا عروض يومية في كل المجالات الفنية من مسرح، حفلات، ندوات ، شعر هي مكان ثقافي على النيل فهتستمتع فيها جدا

ملاحظات :

– ابعد عن الاتوبيسات، الميني باص (البنات) ، والتاكسي الابيض ممكن لو حابب تستخدم مواصلات يبقى المترو او اقصاها الميكروباصات والافضل طبعا اوبر وكريم
– ماتشيلش فلوس كتير معاك وانت نازل
– القاهرة صاحية 24 ساعة في اليوم بس يفضل البنات ما تتأخرش برة الفندق عن الساعة 10-11م لو لوحدها
– المطاعم والدليفري متاحة على مدار اليوم
– القعده على النيل والتمشية على الكورنيش متاح طول اليوم
– فاصل في السعر خاصة في الاماكن السياحية زي الهرم واوصل للنص
– ماتشتريش من اول واحد يقابلك لف واسأل خاصة لو في مكان زي خان الخاليلي
– اوعى تاكل من كنتاكي وماك او عربيات الشارع ايا كانت خليك في المضمون بس ممكن تاكل ترمس، ذرة مشوي وتين شوكي خاصة لو بتتمشى على الكورنيش
– افضل الاماكن اللي ممكن تحجز فيها فنادق عشان تبقى قريب من كل حاجة احجز في مناطق وسط البلد، الدقي، العجوزة، المهندسين، الزمالك
– افضل المولات للتسوق كايرو فيستيفال بالتجمع الخامس، سيتي ستارز مدينة نصر، مول العرب ومول مصر في مدينه سته اكتوبر
– افضل حدائق في مصر الازهر بارك في الدراسه، الحديقة الدولية في مدينة نصر، جزيرة المعادي على كورنيش المعادي والقعده على النيل واسعار الدخول ما بتزدش عن 40ج لكل واحد فيهم
– اقرب محافظات ممكن تروحها وترجع في نفس اليوم ومواصلات سهلة وهتمبسط فيها (الفيوم، اسكندرية) بس دول عايزين لهم بوست لوحده
من المدن اللي ممكن تزوروها في مصر كمان مرسى علم، الاقصر ، اسوان ، النوبة، دهب ، شرم الشيخ، الغردقة، سهل حشيش بس كل حاجة من دول على الاقل تقضي فيهم 3 ايام عشان تقدر تستمتع بيهم
طبعا دي اهم الحاجات اللي ممكن تشوفها في اسبوع لكن في حاجات تانية لسه كتير في القاهرة لوحدها تحتاج لها وقت اكبر اتمنى يكون البوست ده مفيد لكل الناس اللي بتخطط تزور مصر الفترة الجاية ولو في حد قرر يجي واحتاج اي مساعده ممكن يتواصل معايا بدون اي مقابل نهائيا وان شاء الله اقدر اساعده في اي حاجة

قبل ما تتفرج علي الصور بنرشحلك المكان ده
اتفسح فين في القاهرة أفضل أماكن الخروجات والفسح في القاهرة
اماكن خروجات مميزه في القاهرة
افضل اماكن الفسحه والخروج في وسط البلد بالقاهرة
أماكن الخروج في وسط البلد

برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
برنامج سياحي في القاهرة لمدة اسبوع بأقل التكاليف
وسم :

2 thoughts on “برنامج سياحي في القاهرة لمدة اسبوع بأقل التكاليف

  1. انا نازله مصر ٣١ اكتوبر وباقيه هناك ٢٠ يوم مع الاب والام وطفلتين

    هل ممكن ان اجد دليل سياحي بسعر مناسب

  2. احنا شركه سياحه في اليمن ونريد نعمل رحلات سياحية إلى مصر ممكن اعرف البرامج السياحية لديكم وكيف يكون العمل معاكم

Leave a Reply

Your email address will not be published. Required fields are marked *