بورسعيد وازاى تقضى فيها يوم علشان الناس اللى رايحة تشترى لبس
-الانتقالات
في اتوبيسات سوبرجيت و شرق الدلتا بتطلع من الموقف بتاع ألماظه. انا هتكلم عن السوبر جيت اول اتوبيس بيطلع الساعه 6:15 صباحا و تاني واحد ٧ صباحا و بعدها كل ساعه في باص بيطلع علي هناك لحد الساعه ٩ مساءا اخر باص بيتحرك من القاهره لحد بوسعيد.
و برده من بورسعيد نفس المواعيد و الاسعار و اخر باص راجع القاهره بيكون الساعه ٩ مساءا.
الباص بياخد وقت من ٢:١٥ الي ٢:٣٠ و بيكون الطريق سهل و سالك.
*ملحوظه
في قطار بيطلع الساعه ٦:٣٠ صباحا و الساعه ١١ صباحا و سعر التذكره ٣٢ جنيه و بياخد الطريق في ٤ ساعات و قطار من غير تكيف و بيقف في مراكز كتيره عشان خط مراكز فهتحس انه شبه قطار الصعيد الي في فيلم ساعه و نص الي اتقلب في اخر الفيلم. فبلاش نفكر فيه عشان مضيعش وقت.
انا ركبت باص الساعه ٧ صباحا و وصلت بوسعيد الساعه ٩:٣٠ بالدقيقه.
الموقف عند النادي المصري البورسعيدي فهتنزل الموقف و تخليه علي يمينك و تطلع اول الشارع و تركب مايكروباص قله عايز تنزل شارع محمد علي عند الكنيسه.
*ملحوظه
المواصلات رخيصه جدا في بوسعيد يعني المايكروباص سعره موحد 2 جنية لاي مسافه.
التاكسي رخيص جدا و اكبر مشوار هياخد منك ١٥ جنيه.
الشعب البورسعيدي بيبدا حياته متاخر يعني هتلاقي الشوارع فاضيه لحد الساعه ١٢ و ٩٠٪ المحلات مغلقه فانت ممكن تفطر هناك و في محلات فول و طعميه كتيره.
خد فطارك و روح اركب العباره الي هتوديك مدينه بورفؤاد.
انت هتتمشي من منطقه محمد علي الي منطقه البحر حوالي ١٠ دقائق.
المعديه ديه بتركبها ببلاش و ممكن تقعد فيها يوم كامل من غير ما تنزل و محدش هيكلمك.
المعديه ديه بتاخدك الي مدينه بورفؤاد في حوالي ١٠ دقائق و طبعا كل اما العباره تتملي بتتحرك و مش بتاخد وقت.
افطر علي المعديه و لو معاك عيش ابقي ارمي في البحر عشان تتفرج علي طيور النورس و هي مجمعه و بتاكل.
خد رحتك علي المعديه لحد ما تزهق و بعد كده انزل مدينه بورفؤاد و الي هتحسسك انك دخلت اوربا من تصميم المساجد الي هتتخيل انك في تركيا او شكل المباني الي هيخليك تحس انك في اوربا.
هتتمشي في المدينه تقريبا ساعه او ساعه و نص خصوصا لو بتحب التصوير.
هترجع بوسعيد تاني عن طريق المعديه ..
الحلويات البورسعيديه
اشهر حلوي هناك هي الكاساده و ديه بتكون ايس كريم قشده مع فراوله مع مانجو مع فسدق و هتلاقيه موجود في اغلب محلات العصير و خصوصا سلسبيل و هتلاقي فرع منه اول ما تنزل من المعديه اتجاه بورفؤاد علي الشمال.
و في حلوي تانيه اسمها سمنيه بيكون شبه المهلبيه بس قطع بيشوحها علي الجريل و ديه مش هتلاقيها غير هناك في بورسعيد ناحيه الكورنيش بس في راجل معروف جدا هناك مش فاكر اسمه بس اسال اي بورسعيدي هيقولك عليه.
خلصنا اكل و اتمشينا من منطقه البازار الي منطقه طرح البحر و هتتمشي حوالي ٢٠ دقيقه و هتعدي علي اعرق كنيسه هناك.
هتوصل لشط و هتلاقي هواء نقي مش هتشم زفاره ممكن تتمشي شويه او تقعد علي الرمل و لو عايز تاجر كرسي هتدفع ١٠ جنيه او ممكن تقعد علي كافيه من الكافيهات علي البحر.
نصيحه احضر الغروب من علي اللسان الي من خلاله هتتفرج علي قناه السويس و علي القواقع الي بتغطي الرمال.
لو لسه بدري علي الغروب ممكن تطلع من ناحيه نادي الصيد و تمشي علطول و توصل الي الكورنيش بتاع ديليسبس و تاكل ترمس بالحمص بالعدس و الفول ب ٢ جنيه.
هناك هتلاقي علي السور بتاع الكورنيش اقفال الحب الي عامل زي بتاع فرنسا بس هتلاقوا السور مصدي شويه ? بس هتلاقي حبيبه كتير.
طبعا المكان ده اتصور فيه فيلم المشبوه بتاع عادل امام و سعاد حسني و فيلم ابو العربي بتاع هاني رمزي.
احضر الغروب هناك
قبل ما ترجع لازم تعدي علي شارع البازار و تروح ماركت علوش تشتري شكولاتات و جبن بربع التمن
بتخلص اركب لموقف عشان تحجز و ترجع القاهره.
قبل ما تتفرج علي الصور بنرشحلك المكان ده
أماكن الخروج و الشوبينج في بورسعيد
