خروجه ب 5 جنية بس
متحف ركن الملك فاروق
الاستراحة الشتوية للملك فاروق على النيل في كورنيش حلوان، من أول ما بتلاقي رمز التاج ? و كرسي عرش مصر و فخامة المكان، لا اراديا بتقول الملك ملك بردو ✋
قصة المكان دا إنه كان مجرد “كشك شاي” بس كدة!
و كان تابع لفندق و الملك اشتراه ب 2000 جنيه “كان ملبغ ضخم وقتها” و تحولت من كشك شاي لاستراحة شتوية للملك ..

مكان الاستراحة على كورنيش حلوان و يطل على النيل بشكل مباشر، حتى في 5 مراسي خاصة بيخت الملك، يعني ممكن الوصول للاستراحة من النيل على طول او من الكورنيش “دا بالنسبة للملك فاروق طبعا مش لينا أحنا” لكن دلوقتي الدخول من بوابة المتحف على طريق كورنيش حلوان بس

مساحة المتحف 11600 متر و مبنى الاستراحة نفسه 440 متر مكون من 3 ادوار ” طابقين وروف” على شكل سفينة راسية على النيل والحديقة تضم نباتات وأشجار نادرة و حاليا فيها حوالي 35 شجرة مانجا، و من أشهر معالمها نافورة “فيلم نهر الحب” اللي في رقصة الحياة اللي قدمها الفنان عمر الشريف و الفنانة فاتن حمامة

الدور الارضي
أول ما بتدخل هتلاقي تمثال بالحجم الطبيعي لعازفة الهارب و اللي صممه الفنان الفرنسي تشارلز كوردييه اللي من أشهر أعماله تمثال إبراهيم باشا في ميدان الاوبرا
بعدها غرفة هي نسخة مطابقة لغرفة توت عنخ آمون بالظبط و فيها كرسي عرش مصر و الدفاية الخاصة بالاستراحة الشتوية، و أمامها هواية من النحاس على شكل طاووس

في مقابلها سفرة الملك ” الخاصة باستراحة الهرم” لان سفرة استراحة حلوان متهالكة، السفرة عليها بونبونيرة عبارة عن 11 كيلو “فضة” و عليها زخارف في منتهى الابداع، و في نفس المكان لوحة لمراسم الزواج الفرعوني و لوحة تانية للمحمل الخاص بسترة الكعبة المشرفة اثناء مرور الموكب من أمام الاهرامات، لوحة قمة في الابداع

و في نهاية الدور الارضي 5 “بلكونات” تطل على النيل و فيها كراسي من جلد الغزال عليها خرطوشة “رمز مكتوب فيه اسم الملك فاروق” باللغة الهيروغليفية و تمثال للمرأة المصرية و السودانية لان وقتها كانت مصر و السودان مملكة واحدة، و بينهم طاولة مخصصة للعبة الشطرنج باستخدام رموز فرعونية مختلفة عن التقليدية

الدور الاول فيه غرفتين نوم
غرفة نوم جلالة الملك فاروق و غرفة الملكة ناريمان “الزوجة الثانية للملك فاروق” و فيها سرير ولي العهد “أحمد فاروق – أمير الصعيد” العامل المشترك في الغرفتين “البساطة” على عكس حياة القصور الفخمة، الغرف تشبه غرف الفنادق بطراز حديث و بسيط، و غرفة الملك فيها صورته و هو في عمر ١٢ سنة و الغرفة فيها حمام خاص و يقابله حمام الغرفة المقابلة بنفس التصميم كإنه مراية

و من العلامات المميزة في الدور الاول لوحة الموناليزا المصرية موجودة في الصور (حتى الان لم يتم التعرف على الفنان اللي رسمها) و غرفة حمام الشمس اللي كان بيستخدمها الملك بعد الاستحمام

الدور الاخير عبارة عن رووف يكشف النيل كله، و وعلى كل دة الملك زار الاستراحة مرتين فقط، و معظم المقتنيات نسخة طبق الاصل من الاثار الفرعونية الموجودة في المتحف المصري، و أغلب القطع الموجودة في الاستراحة خاصة بإستراحة الهرم

من الانشطة اللي بيقدمها المتحف ((مجانا))
ورشة تدريبية للمصنوعات الجلدية – يوم الثلاثاء من كل اسبوع
ورشة كتابة الاسماء باللغة الهيروغليفية
و كل يوم بيكون في جولات إرشادية للشرح للزوار المصريين و العرب مجانا ?
التذكرة للطلبة 3 جنيه
للمصريين 5 جنيه
تصوير بالموبايل للمصريين 20 جنيه
تذكرة الزائر الاجنبي 50 جنيه
التصوير للاجنبي 50 جنيه
الطالب الاجنبي 25 جنيه
دخول كاميرا لسيشن تصوير 300 جنيه

⁦☎️⁩ التليفون
0227104218
الاستفسار من خلال أ. محمود سيد
01007613694

المتحف مفتوح كل يوم مفيش أجازات نهائي
المواعيد من 9 ل 4 داخل الاستراحة
5 خارجي – في الحديقة

عنوان المتحف : كورنيش النيل – بجوار عزبة الوالدة – مدخل مدينة حلوان

قبل ما تتفرج علي الصور بنرشحلك المكان ده
جولة في شارع المعز