مميزات السفر داخل مصر او السياحة الداخلية:

1- مش محتاج ورق ولا فيزا و لا مواعيد ولا رصيد في البنك ولا انترفيوهات ولا تأمين ولا جواب اتش ار ولا ترجمة ورق ولا حتى باسبور 😁 .. انت مش محتاج اي حاجة خالص غير انك تنوي و تسافر !

2- مش محتاج تغير عملة .. هو الجنيه المصري ابن الحلال بتاعنا شغال في كل حتة 😂

3- مش هيبقى فيه عندك اي مشكلة في الاكل .. لا تقعد تدور على اكل حلال ولا تروح بلاد تلاقيهم بياكلوا كلاب او رجلين فراخ او شوربة خفافيش

4- تنوع كبير في السياحة يعني هتلاقي الاثار الفرعونية والاسلامية والمسيحية ده غير الطبيعة والصحراء و الجبال والشواطئ 🏄.. و ده تنوع نادر جدا تلاقيه في معظم دول العالم

5- المسافات بين الاماكن مش كبيرة لان مصر مساحتها متوسطة مش مترامية الاطراف زي دول تانية كتير .. يعني ممكن تلف معظم البلد بالعربية او الاتوبيس او ساعة واحدة طيران تقريبا تجيبها من اولها لأخرها .. ده غير النايل كروز و حلاوته 😍

6- طبعا مش محتاج اقولك ان الناس في مصر كلها بتتكلم عربي 😎 .. وبالتالي مفيش اي عقبات قدامك في التواصل لو انت معكش لغات وكمان مفيش عنصرية ضد دينك او شكلك او لبسك و ده للأسف ممكن تقابله في دول كتير

7- مش محتاج تاخد اجازة طويلة من شغلك .. لان في اماكن كتير ممكن تروحها في يوم واحد و ترجع او تقضي فيها ويك اند

8- في دول كتير السياحة فيها بتبقى مقتصرة على موسم واحد عشان الجو سواء الحر او البرد او الامطار .. احنا في مصر السنة كلها سياحة لان كل وقت في السنة ليه الاماكن بتاعته

9- الناس اللي ليها في دراسة التاريخ او العمارة او الاثار بشكل عام بالنسبالها مصر كنز ملوش اول من اخر وتشكيلة أثار على مدار اكتر من خمس الاف سنة

10- السفريات داخل مصر تكلفتها اقل نسبيا من السفر الخارجي (طبعا على حسب اماكن الاقامة) يعني تتبسط و توفر كمان ✌️

السفر برة أكيد جميل و مختلف بس فعلا مصر بلدنا حلوة بجد و اعرف ناس كتير برة أمنيتها انها تيجي تتفرج عليها في يوم من الايام .