رحلة يخت العين السخنة

رحلة يخت العين السخنة

اللى مطلوب منك تجمع أصحابك وعيشوا يوم ميتنسيش
وعلى فكرة دة من أرخص اليخوت اللى فى السخنة وكمان مستواه ممتاز أوى
ما هو مينفعش البط يقوم فرحان من النوم يلعب و يعوم و اخر لعب ?
و انت تقضي اليوم عالكنبة .. مش حلوة في حقك ?
طيب نركز مع بعض واحدة واحدة كدة
دول يختين في العين السخنة:
واحد اسمه فارس (١٠ افراد)
و اليخت التاني اسمه اكوا ( اكتر من ١٠ ل ٣٠)
مع العلم إن اي طفل و لو رضيع يعتبر فرد
المهم، اليختين دول طلعت معاه اكتر من مرة و بصراحة في كل مرة بنبسط جدا خصوصاً إن طاقم البحارة و ريس اليخت ناس في قمة الاحترام
اليوم بيبدأ هناك من ٨ الصبح لحد الساعة ٤ العصر
و اول ما بتوصل المارينا بتدفع تذكرة لكل واحد ١٥ جنيه (ملهاش علاقة باليخت) و لازم كل واحد يكون معاه بطاقته الشخصية و تكون سارية، و بتتسجل البيانات دي في السريع عالبوابة و لازم تكون عارف اسم اليخت (اكوا او فارس)
و لو معاك عربية بتدفع رسوم لل parking ٢٠ جنيه لكل عربية
اول ما تدخل اليخت بتسلم البطايق كلها تاني للريس و بيسجل بياناتها عنده، و بيجي عسكري من المارينا يفتش الشنط و يتأكد إن مفيش سلاح او اي ممنوعات و يعد الناس و البطايق و يتأكد من كل واحد ( كل دا في دقايق)
اول ما يطلع العسكري .. كدة اليخت جاهز للابحار
استعد .. انت هتقضي يوم جميييييييل جدا
اليخت فيه 3 غرف (اكوا) كل واحد يدخل يغير هدومه و يلبس المايو، يدهن ال Sun block ⁦☀️⁩
و هتلاقي الجزء الخلفي من اليخت في سلم لو عايز تنزل في البحر بكل وقار، و ممكن تضرب شقلباظ و تنط في البحر على طول ?
لو بتعرف تعوم عيش حياتك، مبتعرفش تعوم .. في هناك كام لايف چاكيت على سترة نجاة فزيائيا مينفعش تغرق و انت لابسهم فا متخفش خالص و توكل على الله ?
الميزة في الوقت دا في السنة إن المياة بتبقى درجة حرارتها لطيفة جدا .. مفيش لسوعة المياة الساقعة الغلسة دي ?
و الميزة انك بتنزل في البحر على طول فا هدومك و رجلك مبيتبهدلوش رمل
نرجع للمهم
هتعوم و تلعب في البحر ساعة، اتنين، تلاتة الساعة هتيجي ١٢ كدة اطلع خد بريك
تكون جايب معاك لتر عصير (لكل واحد فيكم) و شوية معجنات مثلا او اي حاجة خفيفة عشان تعرف تكمل يومك
على فكرة اليخت فيه تلاجة حفظ للعصير و المياة
حبيت تشغل اغاني مع صحابك و ترقص و تهييص .. هتلاقي سماعات تشغل عليها كل اللي انت عايزه
لو حد عايز يصطاد .. و انت بتتصل تحجز قوله عايز كام سنارة و طبق طعم واحد هيكفيكم و زيادة، و بالمناسبة لو اصطدت اي نوع من انواع السمك مينفعش تخرج بيه من المارينا (تعليمات امنية) مفيش فيها كلام .. طيب هتسألني بصطاد ليه؟ تسلية بس ✋
خلصت بريكك .. انزل عالساعة ٢ كمل عوم و غطس زي ما تحب (بينك و بين القاع من ٦ متر ل ١٨ متر) و غالبا في الوقت دا هتلاقي الدلافين بتعوم جنبك و بتلعب
بالمناسبة .. اليخت ممكن تأجر عليه شواية بالفحم ب 100 جنيه “بس لازم تطلبها و انت بتحجز” عشان يعملوا حسابهم
عالساعة ٤ اليخت بيرجع لمارينا وادي الدوم .. حبيت تضرب اكلة سمك حلوة هتلاقي كذا واحد عالطريق بس ركز في الحساب ?
نيجي للاسئلة المهمة ?? الاسعار ??
الاسعار بتبدأ من 2000 لحوالي 3500 لليخت نفسه حسب العدد و اليوم اللي طالعين فيه (الاجازات بتكون اغلى حوالي 500 جنيه) و لو هتأجروا شواية او سنارة او لايف جاكيت او عدة سنوركلينج كل حاجة بيبقى ليها حساب لوحدها
و انت بتاخد اليخت ليكم لوحدكم .. مبيركبش معاكم حد غريب من برة متعرفهوش
رقم الحجز
01007770860 القبطان محمد القللي
لو اتصلت و لاقيت الموبايل مقفول او غير متاح اتصل بعدها بشوية عشان مش كل الاماكن في البحر فيها شبكة كويسة
العنوان: العين السخنة، مارينا وادي الدوم، امام بورتو السخنة بالظبط

شاهد ايضا

العين السخنة مميزاتها وعيوبها

رحلة يخت العين السخنة
رحلة يخت العين السخنة
رحلة يخت العين السخنة
رحلة يخت العين السخنة
رحلة يخت العين السخنة
رحلة يخت العين السخنة
وسم : /

Leave a Reply

Your email address will not be published. Required fields are marked *